منی لانڈرنگ کیس وچ مسلم لیگ (ن) دے وڈے وڈے آگو اشتہاری مِتھ دِتے گئے۔۔۔٭رویل نیوز٭

لاہور (نمایندا رویل) احتساب عدالت نے منی لانڈرنگ کیس وچ مسلم لیگ (ن) دے صدر شہباز شریف دے صاحبزادے سلمان شہباز‘ دھی رابعہ عمران‘ جوائی ہارون یوسف‘ طاہر نقوی تے علی احمد خان نُوں اشتہاری متھ دِتا‘ عدالت نے نیب دے 3 گواہاں دے بیانات قلمبند کرن دے بعد سنوائی 3 دسمبر تک ملتوی کر کے وکیلاں نُوں جرح لئی پابند کر دِتا۔ احتساب عدالت دے جج جواد الحسن نے منی لانڈرنگ کیس دی سنوائی کیتی۔ شہباز شریف تے حمزہ شہباز نُوں عدالت وچ پیش کیتا گیا۔ فاضل عدالت نے حاضری مکمل کروان دے بعد سنوائی شروع کیتی۔ شہباز شریف دے وکیلاں ولوں کارروائی مؤخر کرن دی استدعا کردیاں ہویاں مؤقف اپنایا گیا کہ پنجاب بار کونسل نے ہڑتال دی کال دے رکھی اے جہدے اُتے فاضل جج نے کہیا کہ کوئی گل نہیں گواہ موجود نیں اوہناں دے بیانات قلمبند کر لیند آں تُسیں جرح نہ کرو۔ نیب 3 گواہان طیب زوار‘ خالد محمود تے فیصل بلال بیان دین لئی ذاتی حیثیت وچ احتساب عدالت وچ پیش ہوئے۔ نیب دے گواہ بلال فیصل نے احتساب عدالت وچ اپنا بیان ریکارڈ کرواندیاں ہویاں کہیا کہ 2019 توں میں بطور ڈپٹی سیکرٹری بجٹ اینڈ اکاؤنٹس پنجاب اسمبلی تعینات آں‘ نیب لاہور ولوں شہباز شریف تے حمزہ شہباز دے حوالے توں لیٹر موصول ہویا جہدے وچ اوہناں دے بطور ممبر صوبائی اسمبلی دوہاں ملزماں ولوں موصول ہون والیاں تنخاہواں تے سہولتاں دا ریکارڈ منگیا گیا جد کہ میں دوہاں دا ریکارڈ اکٹھا کر کے نیب لاہور نُوں گھل دِتا۔ ایس توں بعد نیب لاہور ولوں ٹیلی فون اُتے رابطا کیتا گیا کہ تہانوں ریکارڈ جمع کروان لئی ذاتی حیثیت وچ پیش ہونا پوے گا۔ میں 29 اپریل 2020 نُوں تفتیشی حامد جاوید نُوں نیب لاہور وچ اصل تے مکمل ریکارڈ وصول کروایا۔ ڈیفنس کونسل ولوں گواہاں دے بیان قابل مطالعا نہ ہون دی دی شکایت وی کیتی گئی۔ نیب دے گواہ اسسٹنٹ ڈائریکٹر صوبائی الیکشن کمیشن خالد محمود نے اپنا بیان ریکارڈ کرواندیاں ہویاں کہیا کہ نومبر 2018 توں صوبائی الیکشن کمیشن پنجاب وچ تعینات آں۔ نیب ولوں شہباز شریف تے حمزہ شہباز دے 2008 توں 2017 دے دوران اثاثا جات دے ریکارڈ لئی رابطا کیتا گیا۔ میں سرٹیفائیڈ کاپیاں نیب تفتیشی افسر نُوں نیب لاہور وچ فراہم کیتیاں۔ 2008 توں 2017 تک دے ریکارڈ دیاں سرٹیفائیڈ کاپیاں جہڑیاں کہ ملزماں دے اثاثیاں اُتے مشتمل سن نیب تفتیشی افسر دے حوالے کیتیاں تے بیان ریکارڈ کروایا۔ اسسٹنٹ ڈائریکٹر صوبائی الیکشن کمیشن سید طیب زاور نے اپنے بیان وچ کہیا کہ میں پچھلے وزیر اعلا پنجاب شہباز شریف تے حمزہ شہباز دے 2019 دے اثاثا جات دیاں سرٹیفائیڈ کاپیاں بذات خُد تفتیشی افسر نُوں 17 مارچ 2020 نُوں جمع کراوئیاں۔ فاضل عدالت نے پیش نہ ہون والے ملزماں دے حوالے توں ریمارکس دِتے کہ 30 دن مکمل ہو گئے نیں پر ملزمان عدلت وچ پیش نہیں ہوئے‘ سارے ملزماں نُوں اشتہار راہیں وی سدیا گیا پر پیش نہیں ہوئے جہدے بعد سلمان شہباز‘ رابعہ عمران‘ ہارون یوسف‘ طاہر نقوی تے علی احمد خان نُوں اشتہاری متھ دِتا گیا۔ نجی ٹی وی دے مطابق نصرت شہباز دی طلبی لئی لائے گئے اشتہار د ے 30 دن مکمل نہ ہون اُتے اوہناں نُوں حالے اشتہاری قرار نہیں دِتا گیا۔ فاضل عدالت نے نیب گواہاں دے بیاناں اُتے ملزماں دے وکیلاں دی جرح لئی کارروائی 3 دسمبر تک ملتوی کر دِتی۔