قوم کرونا وباء دے باوجود منفی سیاست کرن والیاں نُوں کدی معاف نہیں کرے گی:عثمان بزدار۔۔۔٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار نے کہیا اے کہ اپوزیشن جماعتاں دا کرونا اُتے سیاست کرنا المیا اے‘ اپوزیشن آگوواں نے پہلے وی اہم ترین قومی مسئلے اُتے سیاست چمکان دی کوشش کیتی۔ وزیر اعلا نے کہیا کہ قوم کرونا وباء دے باوجود منفی سیاست کرن والیاں نُوں کدی معاف نہیں کرے گی۔ دُکھی انسانیت دی خدمت لئی اوہناں دے نال کھلونا پیندا اے تے پاکستان تحریک انصاف دی قیادت نے کرونا وباء وچ لوکائی نُوں کلّا نہیں چھڈیا جد کہ دوجے پاسے اپوزیشن آگو مشکل دی گھڑی وچ لوکائی نُوں کلّا چھڈ کے صرف بیان داغن تک محدود نیں۔ اپوزیشن جماعتاں نے ثابت کیتا اے کہ اوہ صرف ذاتی مفاد دا تحفظ چاہندے نیں پر ایہ ویلا سیاست توں اُچا ہو کے قومی مسئلیاں اُتے اکٹھیا ہون دا اے۔ اوہناں نے کہیا کہ کرونا دے کارن دنیا بدل گئی پر بدقسمتی نال پاکستانی اپوزیشن دی منفی سیاست نہیں بدلی۔ ازمایش دی گھڑی وچ اپوزیشن ولوں قوم نُوں ونڈن دی کوشش افسوسناک اے۔ ایہناں خیالاں دا اظہار وزیر اعلا پنجاب سردار عثمان بزدار نے سنٹر پوائنٹ گلبرگ اُتے لعل شہباز قلندر ؒ (فردوس مارکیٹ) انڈر پاس منصوبے دا افتتاح کرن توں پہلاں کیتا۔ لعل شہباز لندر انڈر پاس دا افتتاح کرن ویلے وزیر اعلا پنجاب دا کہنا سی کہ حکومت نے شفاف ٹینڈرنگ راہیں تعمیراتی لاگت وچ 13 کروڑ رُپئے دی خطیر رقم دی بچت کیتی۔ سنٹر پوائنٹ گلبرگ توں ایم ایم عالم روڈ تے کیولری گراؤنڈ ول جان والی ٹریفک وچ روانی آئے گی۔