سردیاں  وچ گیس لوڈ شیڈنگ نہیں ہوئے گی:وزیر منصوبا بند ی اسد عمر۔۔۔٭رویل نیوز٭

اسلام آباد (نیوز ڈیسک) حکومت نے موسم سرما وچ گھروکے ورتارےتے صنعتی شعبے لئی گیس لوڈشیڈنگ نہ کرن دا اعلان کردیاں ہویاں پٹرولیم ڈویژن نُوں ہدایت کیتی کہ تعطل بغیر گیس دی فراہمی ممکن بنائی جاوے۔ وزیر منصوبا بند ی اسد عمر دی صدارت ہیٹھ کابینا کمیٹی برائے توانائی دا اجلاس ہویا جہدا اعلامیا جاری کر دِتا گیا۔ کمیٹی نے پٹرولیم ڈویژن نُوں ہدایت دِتی کہ گھریلو تے صنعتی شعبے نُوں بلا تعطل گیس دی فراہمی ممکن بنائی جاوے۔ پٹرولیم ڈویژن ولوں موسم سرما وچ گیس دی لوڈمینجمنٹ اُتے غور کیتا گیا تے سیزن لئی وادھو گیس دے حصول دا معاملا وی پیش کیتا‘ پٹرولیم ڈویژن نے آر ایل این جی دے استعمال دا پلان پیش کیتا۔ کمیٹی نے پٹرولیم ڈویژن توں گھریلو آلات لئی توانائی ایفی شنسی پروگرام منگ لیا۔ جاری کردا اعلامیے دے مطابق گھریلو تے برآمدی صنعت لئی موسم سرما وچ گیس دی لوڈشیڈنگ نہیں کیتی جاوے گی۔کمیٹی نے کمپریسر راہیں گیس چوری روکن دی وی ہدایت دِتی۔ کمیٹی نے آئی پی پیز نال ہون والے معاہدیاں دی توثیق دی منظوری وی دے دِتی۔ ایس توں وکھ وزیراعظم عمران خان دی صدارت ہیٹھ قومی کمیٹی برائے ہاؤسنگ‘ کنسٹرکشن ڈویلپمنٹ دا ہفتا وار اجلاس ہویا۔سیکرٹری پٹرولیم نے اجلاس نُوں دَسیا کہ گیس دے نویں کنکشنز لئی درکار این۔او۔ سیز لئی آن لائن طریقا کار وضع کیتا جا رہیا اے جہدے نال صارفین لئی اسانیاں پیدا ہون گیاں‘ چیئرمین پاکستان ٹیلی کمیونیکیشن اتھارٹی نے اجلاس نُوں سٹیٹ بینک آف پاکستان دے نال نواں پاکستان ہاؤسنگ سکیم لئی طے پان والے آپسی تعاون بارے اگاہ کیتا۔ اوہناں نے دَسیا کہ دلچسپی رکھن والے درخاست گزاراں دے حوالے توں اتھارٹی ضروری معلومات بنکاں نُوں مہیا کرے گی۔ وزیراعظم نے واضح ہدات کیتی کہ ایس ویلے ملک وچ بجلی دی کوئی کمی نہیں اے ایس لئی نویں کنکشنز دین وچ دیر دا کوئی جواز نہیں‘ اوہناں نے ایس ضمن وچ جاری ہون والے این۔او۔سیز تے منظوری دے طریقا کار نوں صارفین لئی سوکھا بنان دی ہدایت کیتی۔ وزیراعظم نے ہدایت کیتی کہ سکیم دے تحت اپنے گھر دے حصول لئی بنکاں توں سوکھیاں شرطاں اُتے قرضے لین والیاں اُتے کسے قسم دا وادھو بھار نہ پایا جاوے۔ اوہناں نے کہیا کہ حکومت دا مقصد بے گھر لوکاں لئی اپنی چھت مہیا کرنا اے‘ ایس لئی ایس گل نُوں یقینی بنایا جاوے کہ ایہناں نُوں آسانیاں تے سہولتاں ملن۔ وزارت توانائی نُوں نویں گرڈ سٹیشن بنان دے حوالے توں سٹینڈرڈ طریقا کار وضع کرن تے مستقبل وچ ایہدے اُتے عمل پیرا ہون دی وی ہدایت کیتی گئی۔ وزیراعظم نے واضح کیتا کہ مختلف یوٹیلیٹی سروسز حاصل کرن لئی منطوریاں لین دے لمے مرحلیاں نُوں سوکھا بنایا جاوے کیوں جے مروجا طریقا کار نال تعمیراتی شعبے لئی اوکڑاں پیدا ہو رہیاں نیں۔ وزیراعظم نے چیئرمین ایف بی آر تے ہور متعلقا اداریاں نُوں سرمایا کاری کرن والے اوور سیز پاکستانیاں لئی سہولتاں فراہم کرن دی وی ہدایت کیتی۔ وزیراعظم نے تاکید کیتی کہ بیرون ملک وَسن والے پاکستانی ساڈا قیمتی سرمایا نیں ایس لئی اوہناں لئی ملکی کاروبار ی سرگرمیاں وچ حصا لین دی راہ وچ حائل رکاوٹاں نُوں ترجیحی بنیاداں اُتے دور کیتا جاوے۔