kraamaat@gmail.com
+ +92 333-430-6384


پی ڈ ی ایم دے پورے ٹولے دا اپر چیمبر خالی، راج کماری تے کنیزاں خُد فریبی تے خوف دا شکار نیں: فردوس عاشق اعوان۔۔۔٭رویل نیوز٭


نمائندا رویل December 04, 2020


لاہور (نمایندا رویل) وزیر اعلا پنجاب دی معاون خصوصی برائے اطلاعات ڈاکٹر فردوس عاشق اعوان نے کہیا اے کہ ملتان دی جلسی دے بعد جاتی عمرا دی راج کماری تے کنیزاں دیاں نیندراں حرام ہو چکیاں نیں۔ راج کماری تے کنیزاں خُد فریبی تے خوف دا شکار نیں تے لاڈلا شہزادا وی ہُن چین دی بانسری وجا رہیا اے۔ سیاسی تماشا لان والے بڑی چھیتی آپ تماشا بنن والے نیں۔ اِک بیان وچ اوہناں نے کہیا کہ بین الاقوامی منی لانڈر اسحاق ڈار دا بی بی سی نُوں دِتا گیا انٹرویو جھوٹھ تے سچ دی آپ گواہی دے رہیا اے۔ اسحاق ڈار دے مونہ توں ڈر دے مارے سچ نکلیا تے اِک واری فیر ”شریف سیاست“ دا پردا چاک ہویا۔ 30 سال تک پاکستان نُوں بے دردی نال لُٹن والے کسے صورت راہنما نہیں سگوں راہزن نیں۔ 22 کروڑ لوکائی راج کماری تے شہزادے دے خانداناں دی لُٹ مار کدی نہیں بھُل سکدی۔ ڈاکٹر فردوس عاشق اعوان نے کرونا دی صورتحال دے حوالے توں کہیا کہ اپوزیشن کرونا کھلارن توں باز رہوے۔ صورتحال ہر لنگھدے دن نال خراب ہو رہی اے تے متاثرا روگیاں دی گنتی ودھ رہی اے۔ پچھلے 24 گھنٹیاں دے دوران کرونا دے 727 کنفرم کیسز ساہمنے آئے تے 25 روگی وصل ہوئے۔ پنجاب وچ کرونا دے ایکٹو روگیاں دی گنتی 19 ہزار ہو چکی اے تے کرونا نال 3 ہزار 91 روگی واصل ہو چکے نیں۔ ایہناں حالات وچ عوامی اجتماع دا انعقاد لوکائی نال کھلی دشمنی اے۔ اوہناں نے کہیا کہ اپوزیشن نُوں لوکائی دی نہیں سگوں لُٹی ہوئی دولت بچان دی فکر اے۔ پی ڈ ی ایم دے پورے ٹولے دا اپر چیمبر خالی اے۔ پی ڈی ایم دے عاقبت نا اندیش عناصر ہوش دے ناخن لین تے لوکائی دیاں زندگیاں نہ نہ کھیڈن۔