بھارت افغان دھرتی استعمال کر کے سی پیک نُوں نشانا بناندا اے‘ بھارت کول دہشتگرد نیں: میجر جنرل بابر افتخار ۔۔۔٭رویل نیوز٭

اسلام آباد (اچیچا نمایندا رویل) ڈی جی آئی ایس پی آر میجر جنرل بابر افتخار نے گلوبل ویلیج سپیس نُوں انٹرویو دیندیاں ہویاں بھارتی ریاستی دہشتگردی خلاف ڈوزیئر دے اہم نکات اجاگر کر دِتے۔ میجر جنرل بابر افتخار نے کہیا اے کہ بھارت 5 اگست 2019 دے اقدام دے بعد توں ای عالمی سطح اُتے کمزور پوزیشن اُتے اے‘ ڈوزیئر ساہمنے آن دے بعد پاکستان دا دیرینا مؤقف عالمی برادری اُتے ثابت ہویا اے۔ پاکستان دہشتگردی وچ بھارت دے ملوث ہون‘ انسانی حقاں دیاں خلاف ورزیاں ورگے ایشوز اُتے جو کجھ کہندا رہیا‘ ڈوزیئر وچ ثبوت ساہمنے لیایا‘ بھارتی ریاستی دہشتگردی دے ثبوتاں نوں عالمی برادری نے بہت سیریس لیا اے‘ ڈوزیئر ساہمنے آن دے بعد دنیا ہُن بھارتی سپانسرڈ دہشتگردی اُتے کھُل کے گل کر رہی اے‘ بھارتی ساریاں کوششاں دے باوجود عالمی فورمز تے ذرائع ابلاغ اُتے بحث چل پئی اے‘ فارن آفس نے ڈوزیئر نوں پی فائیو وچ پیش کیتا‘ فیر اقوام متحدا سیکرٹری جنرل نُوں پیش کیتا گیا جہدے بعد او آئی سی فورم توں تازا ترین اعلامیا ساہمنے آیا اے‘ اسیں ایتھے رُکاں گے نہیں‘ عالمی سطح اُتے ایس سنگین معاملے نُوں ہور اگے لے جاواں گے۔ ڈی جی آئی ایس پی آر نے پاکستان وچ دہشتگردی‘ خاص کر سی پیک نُوں نشانابنان لئی افغان سرزمین استعمال ہون بارے سوال اُتے کہیا کہ اسیں افغان قیادت نال ایس مسئلے اُتے گل کردے رہندے آں‘ اِک باقاعدا میکنزم موجود اے‘ پر صاف دَساں اسیں افغانستان حکومت دے کیپیسٹی ایشوز نُوں تسلیم کرد ے آں‘ ایس لئی پاکستان دے خلاف افغان سرزمین استعمال ہون اُتے افغان حکومت نُوں بُہتا الزام نہیں دیندے‘ بھارت افغان دھرتی استعمال کر کے سی پیک نُوں نشانا بناندا اے‘ بھارت کول دہشتگرد نیں‘ اوہ سی پیک اُتے کم کرن والی چینی افرادی قوت تے مقامی لیبر نُوں نشانا بناندا اے‘ پر ایہناں خطریاں دے خلاف اسیں مکمل تیاری کر رکھی اے‘ چیلنجز نال نبڑ رہے آں‘ سی پیک دی سیکیورٹی لئی خاص طور اُتے دو ڈویژن فورس تشکیل دِتی اے ایہدے علاوا 8`9 ریگولر رجمنٹس وی راہداری دی حفاظت اُتے مامور نیں۔ ساڈے چینی پارٹنرز سی پیک منصوبے دی سیکیورٹی دے انتظامات توں مکمل مطین نیں‘ سی پیک نُوں نقصان پہنچان دی ہر بھارتی سازش نُوں ناکام بناواں گے تے انشاء اللہ سی پیک ہر دن پہلے توں ودھ ترقی کرے گا۔ ڈی جی آئی ایس پی آر نے لائن آف کنٹرول دی صورتحال ناگروٹا واقع اُتے بھارتی الزام تراشی دا جواب دیندیاں ہویاں ہویاں کہیا کہ بھارت دی ہمیشا ایہ کوشش رہی اے مقبوضا کشمیر دی جدوجہد ازادی نُوں ناں نہاد پاکستانی مداخلت نال جوڑ دِتا جاوے‘ بھارت دنیا دی توجا مقبوضا کشمیر توں ہٹان لئی لاین آف کنٹرول اُتے سیز فائر دیاں خلاف ورزیاں کردا اے‘ فالس فلیگ آپریشنز تے ایہو جہے ڈرامے رچاندا اے‘ ناگوروٹا واقع وچ بھارت کجھ نہیں کر رہیا‘ ایہ بلکل انج ای اے جویں بھارت پچھلے فالس فلیگ اپریشنز وچ کردا آیا اے‘ ناگوروٹا وچ کیہ ہویا‘ کیہ بھارت نے دنیا نال کوئی انفارمیشن شیئر کیتی؟ مقبوضا کشمیر دے اندر جو کجھ ہوندا بھارت ہمیشا ایہدا انکاری رہیا اے‘ ایہ مکمل طور اُتے خُد مختار جدوجہد ازادی اے‘ 70 سال توں جاری اے۔ ایہ ممکن نہیں کہ سرحد پار توں جا کے ایہو جہے واقعات ہون۔ پاکستان ہمیشا حالات نارمل کرنا چاہندا اے‘ وزیراعظم نے کہیا سی بھارت اِک قدم اگے ودھائے اسیں 2 ودھاواں گے‘ خطے دی صورتحال نُوں نارملائز کرن دی ضرورت اے۔