مفاد پرست ٹولے نُوں لوکائی دی کوئی پرواہ نہیں، عوامی خدمت دا سفر جاری اے: سردار عثمان بزدار۔۔۔٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار نے کہیا اے کہ وزیراعظم عمران خان دی قیادت وچ محنت تے اخلاق دے نال عوامی خدمت دا سفر جاری اے۔ پی ڈی ایم پاکستان دی ترقی تے خشحالی دی دشمن اے۔ عقل توں عاری ایہ ٹولا پاکستان دی معیشت نُوں نقصان پہنچان دے در اُتے اے۔ ایہناں عناصر دی ترقی دے سفر وچ رکاوٹ پان دے مذموم عزایم کدی کامیاب نہیں ہون گے۔ اوہناں نے کہیا کہ منتخب وزیراعظم توں استعفا منگنا غیر آئینی تے غیر قانونی مطالبا اے۔ پی ڈی ایم سن لوے کہ 2023 تک عمران خان ای وزیراعظم رہن گے تے 2023 وچ عام چوناں وچ پاکستان دی لوکائی اِک واری فیر تحریک انصاف نُوں پذیرائی دیوے گی۔ سازشاں کرن والے پہلے وی ناکام رہے تے اگے وی ناکام رہن گے۔ وزیر اعلا عثمان بزدار نے کہیا کہ کرونا وباء دے دوران لوکائی دیاں جاناں نُوں خطرے وچ پا کے اجتما ع کرنا سیاسی حماقت اے۔ لوکائی دی گل کرن والیاں نُوں اپنے منفی رویے اُتے نظرثانی کرنی چاہیدی اے کیوں جے کوئی ذی شعور موجودا حالات وچ اجتماع دی گل نہیں کر سکدا۔ اوہناں نے کہیا کہ اپوزیشن دوغلے پن دا مظاہرا کر رہی اے۔ اپوزیشن ولوں کرونا دی پہلی لہر وچ سخت لاک ڈاؤن دا مطالبا کیتا گیا تے ہُن جدوں کہ کرونا دی دوجی لہر وچ شدت آ رہی اے پر ایہدے باوجود اپوزیشن جلسے کر رہی اے۔ انسانی جاناں نُوں خطرے وچ پان والے لوکائی دے خیر خواہ نہیں ہو سکدے تے ایس مفاد پرست ٹولے نُوں لوکائی دی کوئی پرواہ نہیں۔ اوہناں نے کہیا کہ انسانی جاناں دا تحفظ مقدم اے تے لوکائی دیاں زندگیاں دے تحفظ لئی ہر ضروری اقدام چُکیا جاوے گا۔