جدوں تک پنجاب نہیں جاگے گا پاکستان دے لوکاں نُوں حقوق نہیں ملن گ: خواجا سعد رفیق۔۔۔٭رویل نیوز٭

لاہور (نیوز ڈیسک) پاکستان مسلم لیگ ن دے آگو خواجا سعد رفیق دا کہنا اے کہ ساڈیاں لتاں کھِچیاں گئیاں‘ اِک ہتھ نال حکومت چلاندے رہے‘ ایہ جمہوریت نہیں جمہوریت دا چربا اے‘ جمہوریت دے ناں اُتے فراڈ اے۔ لاہور وچ پارٹی کارکناں نال خطاب کردیاں ہویاں سعد رفیق نے کہیا کہ رُپئے دی قیمت تھلے‘ ڈالر دی قیمت اُتے تے ہر شے دی قیمت ودھا دِتی گئی‘ بجلی دی لوڈشیڈنگ کئی علاقیاں وچ دُبارا شروع ہو چکی اے‘ آئین تے قانون دی اُچیرتا دا فیصلا پنجاب کرے گا۔ خواجا سعد رفیق نے کہیا کہ بڑے جھوٹھے ویکھے ایہناں توں وڈا جھوٹھا نہیں ویکھیا‘ جدوں تک پنجاب نہیں جاگے گا پاکستان دے لوکاں نُوں حقوق نہیں ملن گے‘ پاکستان وچ آئین جمہور دی اُچیرتا دا فیصلا ایس وار پنجاب کرے گا۔ اوہناں نے کہیا کہ بحران ختم کرنا اے تے شفاف الیکشن کروانا‘ ووٹ دا فیصلا مننا پوے گا‘ 13 دسمبر نُوں لاقانونیت دی مذمت کرن والے اکٹھے ہون گے‘ 13 دسمبر نُوں ایس حکومت نُوں اِک ہور دھکا دواں گے۔ سعد رفیق نے کہیا کہ سوا 2 سال ہوئے ایس ملک وچ الیکشن دے ناں اُتے فراڈ کیتا گیا‘ لوکاں نے ووٹ نواز شریف نُوں دِتا نتیجا عمران خان دے حق وچ کڈھیا گیا‘ کدی ساڈے ایمان تے کدی کردار اُتے حملا کیتا گیا‘ کدی چور ڈاکو بنایا گیا۔ آگو مسلم لیگ نے کہیا کہ 2013 توں 2018 تک ریکارڈ ترقی کیتی گئی‘ کم نہیں کرن دِتا گیا‘ فیر وی اسیں کم کر گئے‘ ایہناں نے جیلاں بھر دِتیاں‘ جھوٹھے مقدمے بنائے گئے‘ عدالتاں توں سرخرو ہو کے اسیں واپس آئے‘ ججاں نُوں ٹارگٹ کیتا گیا۔