حسد کرن والا کدی خُش نہیں رہندا،لوکاں لئی اَسانیاں پیدا کرنیاں چاہیدیاں نیں: ریشم۔۔۔٭رویل نیوز٭

لاہور (نمایندا رویل) نامور اداکارا ریشم نے کہیا اے کہ کسے دی دل ازاری کر کے انسان کدی خُش نہیں رہ سکدا‘ خُش کلامی دے 2 بول تہاڈا مرتبا بلند کر دیندے نیں۔ اِک انٹرویو وچ گلبات کردیاں ہویاں اداکارا نے کہیا کہ شوبز دی دنیا وچ حسد عام جہی شے اے پر حسد کرن والا کدی خُش نہیں رہندا سگوں اوہنوں نقصان چُکنا پیندا اے‘ چار دن دی مختصر جہی زندگی وچ جے اسیں اِک دوجے لئی چنگا سوچیے تے معاشرے وچ بڑی مثبت تبدیلی آ سکدی اے۔ اوہناں نے کہیا کہ دین اسلام اخلاق دی بنیاد اُتے پوری دنیا وچ کھلریا تے اج پوری دنیا وچ اسلام روشنی وانگوں کھلر چُکیا اے تے ایہدا بنیادی کارن صرف اخلاقیات اے کیوں جے اسلام وچ جبر دی کوئی گنجایش نہیں۔