نیوزی لینڈ ہوم کنڈیشنز وچ مضبوط ٹیم اے: مصباح الحق۔۔۔٭رویل نیوز٭

لاہور (نمایندا رویل) قومی کرکٹ ٹیم دے ہیڈ کوچ مصباح الحق نے کہیا اے کہ نیوزی لینڈ دی ٹیم اپنی ہوم کنڈیشنز وچ اِک مضبوط ٹیم اے‘ اکلاپے دی مدت مکمل ہون دے بعد سبھ کجھ پچھے رہ جاوے گا۔ اپنے بیان وچ قومی کرکٹ ٹیم دے ہیڈ کوچ مصباح الحق نے کہیا کہ اوہ مشکل حالات وچ صبر تے برداشت دا بہترین مظاہرا کرن والے ایہناں سارے کھڈاریاں تے ٹیم مینجمنٹ دے مشکور نیں کہ جہناں نے کووڈ 19 دی عالمی وباء دے دوران کرکٹ دیاں سرگرمیاں دی بحالی وچ اپنا اہم کردار ادا کیتا۔ اوہناں نے کہیا کہ دنیا دے ہر مایا ناز ایتھلیٹ نُوں اپنے ملک دی نمایندگی توں پہلاں اِک مخصوص ماحول درکار ہوندا اے کہ جتھے اوہ کھیڈ دے اغاز توں پہلاں ا پنی تیاری مکمل کر سکے‘ اسیں لوکائی دی صحت تے حفاظت لئی بنائے گئے نیوزی لینڈ دے قوانین دا مکمل احترام کردے آں پر ایس دوران ایس حقیقت توں وی انکار نہیں کیتا جا سکدا کہ کئی قاعدیاں ضابطیاں دے نفاذ نے ساڈے کھڈاریاں نُوں ذہنی تے جسمانی طور اُتے متاثر کیتا اے۔مصباح نے کہیا کہ اگلے 2 ن وچ جدوں اکلاپا مُکے گا تے ایہ سبھ کجھ پچھے رہ جاوے گا۔