حکومت بدلنی اے تے عدم اعتماد لیاؤ:عمران خان دا دوٹوک سنیہا۔۔۔٭رویل نیوز٭

سیالکوٹ/ اسلام آباد (نیوز ڈیسک) وزیراعظم عمران خان نے اپوزیشن نُوں دو ٹوک سنیہا د یندیاں ہویاں کہیا اے کہ گل کرنی اے تے پارلیمنٹ وچ آؤ‘ حکومت بدلنی اے تے عدم اعتماد لیاؤ‘ حکومت کدی ڈائیلاگ توں پچھے نہیں ہٹی۔ این آر او دے سوال ہر معاملے اُتے گلبات لئی تیار آں۔ اپوزیشن جلسیاں دے علاوا کجھ نہیں کر سکدی۔ اوہناں نے کہیا اے کہ کرونا دی دوجی لہر وچ کیسز ودھ رہے نیں‘ سردیاں وچ احتیاط نہ کیتی تے ایہ بہت مشکل ہووے گی‘ مودی دیاں مثالاں دین والی اپوزیشن اج آپ جلسے تے جلوس کر رہی اے۔ سیالکوٹ وچ ائر سیال دے افتتاح دے بعد سیالکوٹ وچ بزنس کمیونٹی نال خطاب کردیاں ہویاں وزیراعظم دا کہنا سی کہ کرونا دے دوران اوکڑاں دا ساہمنا سی‘ ایہو جہی صورتحال وچ روزگار چلانا وڈا چیلنج سی‘ پر اللہ دے فضل نال کرونا دی پہلی لہر کنٹرول وچ رہی‘ اپوزیشن نے تنقید کیتی کہ مودی نے اپنے ملک وچ لاک ڈاؤن کیتا اے سانوں وی لاک ڈاؤن کرنا چاہیدا اے‘ پر حکومت اُتے تنقید کرن والی اپوزیشن اج آپ جلسے تے جلوس کر رہی اے۔ عمران خان نے کہیا کہ کرونا دی دوجی لہر وچ کیسز ودھ رہے نیں‘ سردیاں وچ احتیاط نہ کیتی تے بہت مشکل ہووے گی‘ وایرس نُوں روکن دا بہترین طریقا ماسک اے‘ لوکائی توں اپیل اے ماسک پان تے ایس او پیز اُتے عمل کرن‘ پہلے وانگوں احتیاط کرن نال صنعت تے لوکاں نُوں بچا سکدے آں۔ وزیراعظم دا کہنا سی کہ ماضی دیاں پالیسیاں دیاں دی وجھا توں صنعت متاثر ہوئی‘ جدوں حکومت آئی اودوں ساڈے کول پیسا نہیں سی‘ حکومت نے ٹھوس اقدامات نال جاری کھاتیاں دے کسارے اُتے قابو پایا‘ اسیں اپنے اخراجات نُوں گھٹ کیتا‘ ساڈی حکومت دی پہلی ترجیح ملک وچ غربت نُوں گھٹ کرنا اے‘ جہڑے ملک وچ چھوٹا طبقا امیر ہو جاوے اوہ ترقی نہیں کردا‘ نوجواناں لئی روزگار دے موقعے پیدا کرنے نیں‘ پسماندا علاقیاں دی ترقی وی ترجیحات وچ شامل اے‘ پچھے رہ جان والے علاقیاں اُتے توجا دے رہے آں‘ پائیدار خشحالی لئی اِکو جہی ترقی ضروری اے۔ عمران خان نے کہیا کہ نجی ائر لاین توں پی آئی اُتے کمکاری بہتری بنان دا دباء ودھے گا۔ وزیراعظم دا کہنا سی کہ ملک دی برآمدات ودھانی اے ایہدے لئی سیالکوٹ دی مدد کرنی اے‘ سیالکوٹ ملکی برآمدات دا مرکز بنن جا رہیا اے‘ ہری پور وچ ٹیکنالوجی بنیاد اُتے قایم یونیورسٹی سیالکوٹ وچ وی بناواں گے۔ اوہناں نے کہیا کہ غربت توں نکلن لئی ملکی دولت ودھانا بہت ضروری اے‘ بزنس کمیونٹی نُوں سہولتاں دینا تے رکاوٹاں ختم کرنا حکومت دی پالیسی اے‘ سانوں اپنی ایکسپورٹ ودھانی پوے گی۔ اوہناں نے ہور کہیا کہ مقامی نظام دے تحت شہراں وچ سٹی گورنمنٹ لیا رہے آں‘ اپریل دے بعد مقامی حکومتاں دے الیکشن کراواں گے۔ سیالکوٹ وچ صحافیاں نال گلبات کردیاں ہویاں وزیراعظم دا ہور کہنا سی کہ نیشنل ڈائیلاگ توں پچھے نہیں ہٹیا۔ سیاسی ڈائیلاگ دی بہترین تھاں پارلیمنٹ اے‘ پارلیمنٹ وچ سوالاں دے جوابات دین لئی تیار آں۔ جمہوریت اودوں چلے گی جدوں گلبات ہووے گی۔ اوہناں دا کہنا سی کہ ساڈے لئی سبھ توں وڈا چیلنج ملک نُوں بحران توں کڈھنا سی‘ سانوں ہر شعبے وچ تواریخی کسارا ورثے وچ مِلیا۔ ایہ لوک ملک نُوں مقروض تے ڈیفالٹر چھڈ کے گئے‘ پر ہُن ملکی معیشت درست سمت ول گامزن اے۔ ملک وچ 2 وڈے ڈیمز تے 2 نویں شہر بنا رہے آں۔ سبھ توں وڈی کامیابی ملک نُوں دیوالیا ہون توں بچانا سی۔ سیاسی صورتحال اُتے گل کردیاں ہویاں اوہناں دا کہنا سی کہ اپوزیشن نال گل کریے تے اوہ مقدمے ختم کرن دا کہندے نیں۔ اپوزیشن اُتے مقدمے اوہناں دے اپنے دور وچ درج کیتے گئے سن۔ سانوں کوئی مسئلا نہیں‘ ہر مسئلے اُتے گل کرن لئی تیار آں پر این آر او اُتے گل نہیں کیتی جاوے گی۔ کرپشن مقدمے ختم نہیں کیتے جا سکدے۔ میاں نواز شریف‘ اسحاق ڈار تے اوہناں دے بچے ملک توں نَسّے ہوئے نیں۔ ایس توں پہلاں سماجی رابطے دی ویب سائٹ ٹویٹر اُتے اپنی ٹویٹ وچ وزیراعظم عمران خان دا کہنا سی کہ میں ناجایز دولت نُوں ہدف بنان دے حوالے توں منتخب امریکی صدر جوبائیڈن دے عزائم دا خیر مقدم کردا آں۔ وزیراعظم نے کہیا کہ ترقی پذیر ممالک اپنی بدعنوان اشرافیا دی کرپشن دے کارن غربت دا شکار نیں‘ ترقی پذیر ملکاں دے با اثر بندے منی لانڈرنگ راہیں دولت امیر ملکاں تے ٹیکس چوری دے غیر ملکی ٹھکانیاں وچ منتقل کردے نیں‘ ایہناں دی وجھا توں ایہ ملک مفلسی دا شکار نیں۔