kraamaat@gmail.com
+ +92 333-430-6384


ڈاکٹر جاوید کنول دا شعری پراگا '' کاواں ہتھ سُنیہا''۔۔۔٭رویل تبصرا٭


خاص لیکھ December 13, 2020


ڈاکٹر جاوید کنول دا شعری پراگا '' کاواں ہتھ سُنیہا''۔۔۔٭رویل تبصرا٭

جویں جویں ترقی ہو رہی اے انسانی جیون گنجھلاں دا شکار ہو رہیا اے تے اوہ جذباتی تے نفسیاتی طورتے وی متاثر ہوونوں نہیں رہ سکیا اے۔ڈاکٹر جاوید کنول دا شعری پراگا ”کاواں ہتھ سنیہا“ وچ اجوکے سمے وچ وسدے انسان دی حالت نوں وی بیان کیتا گیا اے تے اوس دے اندر دی گل کیتی اے۔ ایس شعری پراگے وچ بیاسی غزلاں تے گیارھاں چو مصرعے بیان کیتے نیں تے ڈھیر سارے موضوعات نوں چھوہیا اے۔انسانی رشتیاں نوں تے اوس دی ٹُٹ بھج نوں موضوع بناندیاں ہوئیاں اوہناں نے اپنے آل دوال نوں اکھوں اولھے نہیں کیتا اے۔شاعر نے ودھدی بھکھ تے غریباں نوں اپنے آل دوال ویکھیا اے تے تگڑے لوک کویں ماڑیاں نوں اپنے پیراں ہیٹھ لتاڑدے نیں اوس بارے انج لکھدے نیں:

بھکھ نوں پیراں ہیٹھ لتاڑن اُچیاں پگاں

ہر ماڑے دے حق نوں مارن اُچیاں پگاں

یاں فیر اوہ انج کہندے نیں:

بھکھ نچدی اے آل دوال

روندے ویکھن جان نہ بال

آپ نے رہتل نوں وسارن والے لوکاں دی گل وی کیتی اے کیوں جے شاعر حساس طبعیت دا مالک ہوندا اے تے اوس نوں جیون ڈھنگ وچ وساریاں جاون والیاں گلاں چنگیاں نہیں لگدا اے کیوں جے اوہ قدراں دا چاہیوان ہوندا اے۔ایسے لئی جاوید کنول گواچے ہاسیاں دی گل کردے شعراں وچ ایس دا اظہار وی کردے نیں اوہناں دا مننا اے کہ جو سچ بولدے نیں اوہناں نوں زہر پیالا تاں پینا ای پیندا اے

ایس شاعری وچ جاوید کنول ہوریں کدھرے کدھرے شاعری دی تھاں پوری دی پوری بیان بیازی لگدی اے جو خطیانا انداز نال کردے نیں

شہر تے جنگل ہو گئے سارے

بندے کتھے مو گئے سارے

دولت دی بہتات نال کیہ ہوندا تے کویں ہوندا اے اوس دے حوالے نال اک شعر

سانوں فکراں پاگل کیتا ہر ساہ دُکھ ہنڈائے نیں

عقلاں سمجھاں والا تُوں ایں تیری کوٹھی دانے نیں

اک پیو دے جذبات اپنی دھی بارے درشاندیاں جاوید کنول چومصرعے وچ کہندے نیں:

دل دے ٹوٹے ہو جاندے نیں

پلکیں ہنج کھلو جاندے نیں

دھی دے بارے جد وی سوچاں

کنول ہوش ای کھو جاندے نیں

جاوید کنول ہوراں دی شاعری بارے پنج دیباچے ،فٹ نوٹ تے فلیپ لکھیا گیا اے جہدے وچ آپ دی شاعری بارے بھرویں گلبات کیتی گئی اے۔آس کرنے آں کہ اوہ پنجابی زبان نوں اپنے شعری پراگیاں نال شنگاردے رہن گے تے اپنے شعری سفر نوں ودھیا ڈھنگ نال جاری رکھن گے تے فنی طور سچجے ڈھنگ نال ساہمنے لیاون گے۔ایس شعری پراگے دا مُکھ پنا سلیکھ نے بنایا اے جد کہ ورتارے کتاب ترنجن لاہور والے نیں شعری پراگے دے کُل صفحے دو سو پندرھاں تے مُل تِن سو پنجاہ روپے اے۔