سجناں دی نذر کجھ ٹپے…..٭رویل شاعری٭

سجناں دی نذر کجھ ٹپے…..٭رویل شاعری٭

انجم رانا

پھلیاں ،پھلیاں،پھلیاں

دن رات طواف کراں

مینوں کعبہ یار دیاں گلیاں

٭

ٹوکے،ٹوکے،ٹوکے

اوکھا ہویا دن کٹنا

کوئی دردی رات نوں روکے

٭

تانا،تانا،تانا

بدل قنون چھڈو

لُولھا لنگڑا تے اکھوں کانا

٭

چھلیاں،چھلیاں،چھلیاں

ریت رُسی پیراں توں

گلوں رُسیاں ڈاچی دے ٹلیاں

٭

جندرے،جندرے،جندرے

کسے کٹی رات رو رو

کوئی سڑ گیا اندرو اندرے

٭

چھولے،چھولے،چھولے

بک بک رون تارے

چن ہوگیا انبروں اولھے

٭

والی،والی،والی

ٹِکا پیا لشکدا سی

ہل چھڈ کے بہ گئے ہالی

٭٭٭٭٭