اچکزئی ہوراں دی گھڑوس۔۔۔٭رویل کالم٭

اچکزئی ہوراں دی گھڑوس۔۔۔٭رویل کالم٭

پی ڈی ایم دے لاہور والے جلسے وچ محمود اچکزئی ہوراں اپنی ٹھونہے دی فطرت مطابق اوہی کجھ آکھیا جو اوہناں دے موہوں نکل سکدا سی۔سٹیج اُتے بیٹھے ہوئے لیڈراں (ودھیرے پنجابی) وچوں کسے نوں وی وضاحت کرن دی توفیق نہ ہوئی کہ گل انج نہیں انج اے۔ تردید دا تے کیہ سوال۔

اصل مسئلا بعد وچ ہون والے ردء عمل دا اے۔ پنجابی پیاریاں نوں تے گل دی تکلیف ہونی ای سی‘ حکومتی وڈیاراں دی وی دُم اُتے پیر آ گیا۔ اوہناں دی پنجابیت وی ”غیرت“ وچ آ گئی۔ اک فقرے نوں پھڑ کے چاہ دی پیالی وِچ طوفان چُکیا جان لگیا۔

پنجابی پیاریاں دا مسئلا تے سمجھ وچ آوندا اے۔ پنجابی ساڈے وقار تے پیار دی علامت اے۔ اسیں پنج ہزار سال توں پنجابی آں۔ ساڈی پنجابیت نال چھیڑچھاڑ سانوں پریشان تے دُکھی کردی اے‘ غُصّا دواندی اے جہڑا اگلے لئی خطرناک وی ہو سکدا اے۔ سو پنجابیاں نے اپنا ردء عمل دتا۔ کجھناں نے بہت مناسب طور اُتے‘ کجھناں نے گالھاں دی زبان وچ۔ ایہناں سبھناں دا پیار سچا اے۔ گالھاں کڈھن والیاں دا ردء عمل ناپسندیدا ہو کے وی اوہناں دے پیار دا ثبوت اے۔

حکومتی ٹولے ولوں پیش کیتا جان والا ردء عمل بہرحال ”سیاسی“ تے وقتی اے۔ ایہ اوہی پارٹی اے جہدے اک سابقا وزیر ہوراں پنجابیت نوں جُتی دی نوک اُتے رکھن دا کالا بیان دے کے اپنے اندرلے گند دا اظہار کیتا سی تے پنجابی سیوکاں کولوں گالھاں دے ہار پوائے سن۔ سیاسی مفاد لئی اج ایہ اچکزئی بارے جو وی کہندے رہن‘ جے کل نوں کوئی ایسا سیاسی اتحاد بن جاوے جہدے وچ اچکزئی وی شامل ہووے تاں کیہ ایہ سارے رلت کرن توں انکار کر دین گے؟ ممکن ای نہیں۔ اچکزئی دے بیان نال جہناں دی غیرت اچانک جاگ پئی اے‘ چیتے رکھنا چاہیدا اے کہ ایہو ای نیں جہڑے اج وی پنجاب دی ونڈ کرن نوں تیار نیں۔ اجہی گل کرن ویلے ایہناں دی غیرت مر گئی ہوندی اے؟

عین اوسے طرحاں جویں سٹیج اُتے بیٹھے پی ڈی ایم دے‘ سارے دے سارے ”غیرتمنداں“ نے چُپ چپیتے گل سُن لئی تے کسے نوں نہ تے تردید دی جرئت ہوئی‘ نہ ای وضاحت دی۔ مریم بی بی تاں لاہور دے ای نیں۔ ایتھے دے جم پل‘ ایتھے دے ای تعلیم یافتا۔ کجھ دن پہلاں پنجابی پیارے اوہناں دی ایس گل اُتے ای خُشی منا رہے سن کہ اوہناں نے پنجابی دا کوئی فقرا بول دِتاسی۔ اج خُش ہون والیاں دِیاں اکھاں وی کھل گئیاں۔

اچکزئی ہوراں جو کجھ وی کہیا‘ یقینن غلط کہیا۔ ایہ اوہناں دی جاہلیت تے تعصب دا ثبوت اے۔ اوہ پنجابیاں دے خلاف پہلاں وی ایہو جہیاں گلاں کردے رہے نیں۔ تسیں ٹھونہے کولوں چنگیائی دی توقع نہیں کر سکدے۔ پنجاب دا لون اُنج وی کھوٹا اے کہ ایہنوں کھان والا سبھ توں پہلاں پنجاب بارے ای موہوں گند بکدا اے۔ اچکزئی دِیاں گھڑوساں پاروں جے کجھ پنجابیاں وچ جاگرتی آئی اے تاں ایہو ایس مسئلے دا مثبت پکھ اے۔