نیپرا نے بجلی دی قیمت وچ 1 رُپئے 11 پیسے فی یونٹ وادھا کر دِتا۔۔۔٭رویل نیوز٭

اسلام آباد (نیوز ڈیسک) نیپرا نے بجلی دی قیمت وچ 1 رُپئے 11 پیسے فی یونٹ وادھا کر دِتا۔ نیشنل الیکٹرک پاور ریگولیٹری اتھارٹی (نیپرا) نے بجلی دی قیمت 1 مہینے لئی 1 رُپئے 11 پیسے فی یونٹ مہنگی کر دِتی اے۔ قیمت وچ وادھا ستمبر دے فیول پرائس ایڈجسٹمنٹ دی مد وچ کیتا گیا تے ایس فیصلے نال بجلی صارفین اُتے 12 ارب رُپئے توں بُہتا وادھو بھار پوے گا۔ نیپرا دے مطابق ستمبر وچ بجلی دی پیداواری لاگت 3 رُپئے 95 پیسے فی یونٹ سیی تے بجلی دی پیشگی پیداواری لاگت 2 رُپئے 84 پیسے فی یونٹ سی۔ نیپرا نے دَسیا کہ صارفین توں وادھو وصولی دسمبر دے بلاں وچ کیتی جاوے گی تے فیصلے دا اطلاق کے الیکٹرک صارفین اُتے نہیں ہووے گا۔ دوجے پاسے حکومت ولوں لوکائی اُتے بجلی دیاں قیمتاں وچ وادھے دے بعد پٹرول بمب سُٹن دیاں وی تیاریاں کیتیاں جا رہیاں نیں‘ پٹرولیم مصنوعات دیاں قیمتاں وچ 3 رُپئے فی لیٹر تک وادھے دا دھڑکو اے‘ پہلی دسمبر توں ہُن تک عالمی منڈی وچ خام تیل دیاں قیمتاں 5 فیصد تک ودھ چُکیاں نیں۔ آنکڑیاں مطابق ایس طرحاں عالمی منڈی دے لحاظ نال ہُن تک پٹرول 6 رُپئے 88 پیسے جد کہ ہائی سپیڈ 5 رُپئے 24 پیسے تک مہنگا ہو چکیا اے۔