افضل احسن رندھاوا دی ناول کاری۔۔۔۔٭رویل تبصرا٭

افضل احسن رندھاوا دی ناول کاری۔۔۔۔٭رویل تبصرا٭

شاعر،کہانیکار،پارکھ تے ترجما کار اعجاز دی کھوج پرکھ ”افضل احسن رندھاوا دی ناول کاری“ نوں ست باباں وچ ونڈیا گیا اے۔رندھاوا ہوریں اجہے ناول کار نیں جہناں نے اپنیاں ناولاں وچ سانجھے پنجاب دے سانجھے وسیب نوں بیانیا اے تے اوہناں دے کردار وی اوس ای سماج دے لئے ہوئے نیں۔اعجاز نے اپنی ایس کتاب وچ افضل احسن رندھاوا دی ناول کاری تے تنقیدی جھات پاندیاں ہویاں مغربی لکھاریاں دا وی حوالا دتا اے تے اوہناں دی ناول کاری نوں موہرے رکھدیاں ہوئیاں افضل احسن رندھاوا دی ناول کاری بارے اپنے وچار وی سانجھے کیتے نیں تے ہورناں پڑچولیاں نوں وی پرکھیا اے۔افضل احسن رندھاوا دی ناول کاری دی گل کردیاں اعجاز ہوراں نے ناولاں دے کرداراں،منظر نگاری،موضوع،زبان و بیان اُتے وی بھرویں گل کیتی اے تے حوالیاں نال ایس نوں ہور مدلل کر دتا اے۔آپ نے اپنے وچاراں نوں انج بیانیا اے:

"افضل احسن دیاں ایہناں لکھتاں توں اسیں کسے طور وی مونہ نہیں پھیر سکدے۔۔۔۔ساڈی جاچے اوہدیاں لکھتاں نوں اجوکی نوجوان پیڑھی دی اکھوں پروکھے کرنا پنجاب دی صدیاں پرانی وسوں،تواریخ ،رہتل تے ورثے دی سُوجھ بُوجھ توں وانجھے رہن دے مترادف اے"ص106

ایس پارکھ نے افضل احسن رندھاوا دیاں ناولاں نوں بڑے سوہنے انداز نال ویکھیا تے فیر اپنے وچاراں نال بیانیا اے جس نال رندھاوا ہوراں دے ناولاں نوں نویں ڈھنگ نال جانن تے سمجھن دا موقعا وی ملدا اے تے تنقیدی اکھ نال کسے لکھت دے نویں رنگ وی ساہویں لیان دا جتن کیتا اے۔اعجاز ہوراں نے ایس اوکڑاں بھرے راہ تے ٹر ن دا جتن کیتا اے تے پنجابی تنقید وچ نویاں منزلاں ول اپنا راہ بنایا اے۔آس کردے آں کہ اوہ اپنے ایس کھوج پرکھ دے سفر نوں جاری رکھدیاں پنجابی ادب وچ نگھر وادھا کردے رہن گے۔

ایس کتاب نوں پنجابی مرکز لاہور ولوں رِیت موجب سوہنی دکھ تے ودھیا کاغذ اُتے چھاپیاگیاا اے کتاب دا مُل تِن سو روپے تے کُل صفحے اِک سو اٹھائی نیں۔