منی لانڈرنگ کیس دی سنوائی، اپوزیشن لیڈر شہباز شریف تے حمزہ شہباز نُوں جیل حکام نے عدالت وچ پیش کیتا۔۔۔٭رویل نیوز٭

لاہور (نیوز ڈیسک) نیب نے شہباز شریف دی گھروالی نصرت شہباز‘ پُتر سلیمان شہباز تے دھی رابعہ عمران سنے 6 ملزماں دیاں جائیداداں قرق کرلئیاں نیں۔ لاہور دی احتساب عدالت وچ شہباز شریف تے اوہناں دے گھروالیاں د ے خلاف منی لانڈرنگ کیس اُتے سنوائی ہوئی‘ قومی اسمبلی وچ اپوزیشن لیڈر شہباز شریف تے حمزہ شہباز نُوں جیل حکام نے عدالت وچ پیش کیتا۔ عدالت دے ساہمنے شہباز سریف نے کہیا کہ میرے لَک دی تکلیف دے حوالے توں کل ڈاکٹر آیا‘ میں کینسر دا روگی آں‘ میرے معدے تے کینسر دے حوالے توں چیک اپ نہیں ہو رہیا‘ مینوں میریاں میڈیکل رپورٹاں وی اِک مہینے بعد دِتیاں گئیاں‘ زندگی مَوت اللہ دے ہتھ وچ اے پر ایہ صرف سیاسی انتقام اے تے کسے دے کہن اُتے کیتا جا رہیا اے۔ جہدے اُتے احتساب عدالت دے فاضل جج نے ریمارکس دِتے کہ تہاڈی گل سن لئی اے‘ تہاڈا جہڑا مسئلا اے تُسیں لکھ کے مکمل طور اُتے عدالت نوں اگاہ کرو‘ تُسیں جدوں درخاست دوو گے تے ایہدے اُتے علیحدا سنوائی کراں گا۔ سنوائی دوران ڈی جی نیب نے تفتیشی افسر راہیں عدالت وچ رپورٹ پیش کیتی‘ رپورٹ دے مطابق نیب نے شہباز شریف دی گھروالی نصرت شہباز‘ پُتر سلیمان شہباز‘ دھی رابعہ عمران تے جوائی ہارون یوسف دے اثاثے وی قرق کر لئے نیں۔ سنوائی دوران کمرا عدالت وچ رؤلا پان اُتے جج نے برہمی دا اظہار کیتا‘ اوہناں نے ریمارکس دِتے کہ جہڑے لوک شہباز سریف نال ملاقات کرن آئے نیں ہُن اوہ باہر چلے جان‘ تہاڈے رؤلے نال سنوائی وچ مشکل آ رہی اے‘ اِک اِک سوال ملین ڈالر دا اے‘ جے تُسیں باز نہیں آؤ گے تے میں اُٹھ کے چلا جاواں گا۔ شہباز شریف دے وکیل امجد پرویز ایڈووکیٹ نے نیب دے گواہ اُتے جرح شروع کیتی تے گواہ دے وار وار سینے اُتے ہتھ رکھ کے جواب دین اُتے عدالت نے دلچسپ ریمارکس دِتے کہ وار وار سینے اُتے ہتھ رکھ کے جواب دیندے ارطغرل غازی لگ رہے او عدالت دے ریمارکس اُتے وکلاء تے گواہ ہس پئے۔ شہباز شریف تے حمزہ شہباز دے وکیلاں نے نیب دے گواہ اُتے جرح مکمل کر لئی‘ جہد ے اُتے عدالت نے نیب دے ہور 2 گواہ ابراہیم ملک تے محمد شریف نُوں بیان ریکارڈ کروان لئی سددیاں ہویاں‘ ہور سنوائی 4 جنوری تک ملتوی کر دِتی۔-