اپوزیشن دے استعفیاں نُوں ہُن ٹھنڈ لگ گئی اے:شہباز گِل۔۔۔٭رویل نیوز٭

اسلام آباد (نیوز ڈیسک) وزیراعظم دے معاون خصوصی برائے سیاسی رابطے شہباز گل نے کہیا اے کہ دو تِن دن توں نان ایشو نُوں ایشو بنایا جا رہیا اے‘ اپوزیشن دے استعفیاں نُوں ہُن ٹھنڈ لگ گئی اے‘ ایہناں دی بُری قسمت ویکھو ایہ ہمیشا کہندے نیں جے اسیں بُرے او تے دوجے وی بُرے نیں‘ سیاسی یتیماں دی فوج کہندی اے حکومت نے درجناں ترجمان رکھے نیں‘ وزیراعظم دے گھر نوں ناجایز گھر متھیا جا رہیا اے‘ اصل وچ ایہناں دے کئی لوکاں توں قبضا واگزار کروایا اے۔ ایہناں خیالاں دا اظہار اوہناں نے میڈیا نال گلبات کردیاں ہویاں کہیا۔ شہباز گل نے کہیا کہ اسلام آباد دے کل 5 زون نیں۔ زون تھری وچ کوئی بلڈنگ نہیں بن سکدی۔ زو فور وچ کئی سوسائٹیاں نیں‘ ایتھے لکھاں گھر وی نیں۔ زون فور وچ کدی ماسٹر پلان بنیا ای نہیں۔ ایہناں نے اپنی حکومت وچ کدی ماسٹر پلان بنایا ای نہیں۔ زون فور دے چک شہزاد وچ کئی فارم ہاؤسز وی نیں۔ سی ڈی اے دے مطابق 20 فیصد حصا رہایش لئی رکھ سکدے آں باقی ایریا گرین ہووے۔ شہباز گل نے کہیا کہ عمران خان نے اپنے پیسیاں نال گھر خریدیا تے سپریم کورٹ نے صادق تے امین متھ دِتا۔ عمران خان رولز دے مطابق 300 کنال دی زمین وِچوں 60 کنال اُتے رہایش اختیار کر سکدے نیں۔ وزیراعظم نے صرف 2 کنال دی زمین اُتے رہایشگاہ بنوائی۔ سی ڈی اے نے زون فور دے حوالے توں 60 ہزار بنائے گھراں دے مالکاں نُوں کہیا کہ اوہ اپنے گھراں نُوں لیگل کرن لئی اپلائی کر دین۔ سی ڈی اے نے ایس حوالے توں فیس وی مختص کر دِتی۔ شہباز گل دا کہنا سی اج پنجاب اسمبلی دا اجلاس اے‘ سپیکر تہاڈے استعفیاں دا انتظار کر رہے نیں۔ معاون خصوصی دا ہور کہنا سی کہ پہلے 60`60 لوکاں دے نال واشنگٹن دے دورے کیتے جاندے سن۔ آصف علی زرداری کابل وچ اِک دن دے دورے اُتے 45 ہزار ڈالر خرچ کر کے آئے۔ نواز شریف نے اپنے دورے اُتے 58341 ڈالر خرچ کیتے۔ عمران خان دے دورے اُتے صرف 9937 ڈالر خرچ ہوئے‘ ایہ پیسے تہاڈے پیسے نیں جو تُسیں ٹیکس دیندے او۔ یوسف رضا گیلانی اپنے بیرونی دورے اُتے 400 لوکاں نُوں لے کے گئے۔ کیہ شہباز شریف نے نواز شریف دا جہاز استعمال نہیں کیتا؟ کیہ تہاڈے درجن توں ودھ کیمپ آفس نہیں سن؟۔ کیہ نواز شریف 4 سالاں وچ سینکڑے بیرونی دورے نہیں کیتے؟۔ کیہ نواز شریف نے لندن دے 20 ذاتی دورے نہیں کیتے سن؟ کیہ نواز سریف نے مری وچ اپنے فارم ہاؤس وچ سرکاری پیسے خرچ نہیں کیتے؟ اوہناں نے جہاز نُوں چنگچی بنایا ہویا سی۔ ایہناں نُوں پنڈ وچ کوئی ویاہ اُتے وی نہ بلائے‘ موجودا وزیراعظم اِک اِک ٹکے دا حساب دیندا اے۔