کوئی لابی کسے وزیر راہیں دباء پائے ایہ قبول نہیں،فیصلے شفاف تے میرٹ اُتے کراں گے: وزیراعظم عمران خان۔۔۔٭رویل نیوز٭

اسلام آباد (نیوز ڈیسک) وزیراعظم عمران خان نے کہیا اے کہ کوئی لابی کسے وزیر راہیں ساڈے اُتے دباء پائے ایہ قبولن جوگ نہیں۔ وزیراعظم عمران خان دی اگوائی وچ وفاقی کابینا دا اجلاس ہویا‘ جہدے وچ 12 نکاتی ایجنڈے اُتے غور کیتا گیا۔ کابینا اجلاس وچ سیاسی‘ معاشی تے سیکیورٹی دی صورتحال دا جایزا لیا گیا‘ کابینا نُوں کرونا دی حالیا صورتحال بارے تفصیلی بریفنگ دِتی گئی‘ ایہدے علاوا پی ڈی ایم دی تحریک تے سینیٹ چوناں دیاں تیاریاں اُتے وی تفصیلی مشاورت ہوئی۔ وفاقی کابینا نے ٹربائن فیول ایوی ایشن ہائی فلیش دی درآمد‘ سی ڈی اے آرڈیننس 1980 وچ ترمیم‘ یوٹیلٹی سٹور کارپوریشن دے ملازماں اُتے لازمی سروسز ایکٹ دی توسیع‘ ڈی جی نیشنل انسٹیٹیوٹ آف بحری سائنس‘ زرعی ترقیاتی بینک دے بورڈ دی تشکیل نو تے ایس ٹی ای ڈی ای سی دے ایم ڈی دی تقرری دی منظوری دے دِتی۔ ایہدے علاوا الیکٹرک وہیکل تے موبائل مینو فیکچرنگ پالیسیاں دی وی منظوری دِتی گئی۔ اجلاس دے دوران وزیراعظم نے کہیا کہ وفاقی کابینا دا ہر فیصلا جتماعی حیثیت وچ ہوندا اے‘ کوئی لابی کسے وزیر راہیں دباء پائے ایہ قبولن جوگ نہیں‘ کسے وزیر نُوں کوئی لابی تنگ کرے تے اوہ کابینا نُوں یاں مینوں وکھرا دَسّے‘ اسیں فیصلے کسے لابی دے دباء وچ نہیں سگوں شفاف تے میرٹ اُتے کراں گے۔ وفاقی کابینا نے آدم شماری اُتے وزیراں کمیٹی دی رپورٹ پیش کیتی گئی‘ ایم کیو ایم پاکستان نال تعلق رکھن والے وفاقی وزیر امین الحق نے رپورٹ نُوں رَد کر دِتا‘ وفاقی کابینا نے ایم کیو ایم دے اختلافی نوٹس دے نال رپورٹ نُوں منظور کر لیا‘ اختلافی نوٹ وچ ایم کیو ایم ولوں مطالبا کیتا گیا اے کہ نویں آدم شماری فوری طور اُتے کروائی جاوے۔ وفاقی کابینا وچ 7 ویں آدم شماری لئی وی گلبات کیتی گئی جہدے اُتے وزیراں ولوں رائے دِتی گئی کہ آئین دے تحت حکومت کسے وی ویلے آدم شماری کروا سکدی اے‘ اگلی آدم شماری وچ مرکزی کردار نادرا دا ہونا چاہیدا اے‘ وفاقی کابینا نے آدم شماری دے معاملے اُتے ہور مشاورت لئی وزارتی کمیٹی قایم کر دِتی۔ ایس توں وکھ وزیراعظم نے وفاقی وزارتاں نُوں اہداف سونپن بارے تقریب نال خطاب کردیاں ہویاں کہیا وزارتاں پرفارم نہیں کرن گیاں تے بہتر گورننس نہیں دے سکدے۔ حکومت دے کول سوا دو سال نیں‘ سانوں اپنی کمکاری وکھانی پوے گی۔ عمران خان دا کہنا سی کہ ہُن ساڈے کول کوئی عذر نہیں کہ کہیے حالے اسیں سکھ رہے آں‘ ساڈے لئی پرفارمنس دا ویلا آ گیا اے۔ اوہناں دا کہنا سی کہ 25 جولائی نُوں الیکشن ختم ہون دے بعد اتحادی حکومت بنانی سی۔ 25 جولائی توں لے کے 18 اگست تک دا ویلا سانوں اتحادی حکومت بنان وچ گا۔ سبھ توں پہلے ساڈی کوشش رہی کہ حکومت بنان لئی اپنے نمبرز پورے کریے۔ اوہناں نے ایس موقع اُتے امریکی نو منتخب صدر جوبائیڈن دی مثال دیندیاں ہویاں کہیا کہ اوہناں نُوں اپنی ٹیم سلیکٹ کرن لئی ڈھائی مہینے ملے۔ وزیراں نُوں اپنیاں وزارتاں بارے پوری بریفنگ ملنی چاہدی اے۔ حکومت نُوں تیاری دے بعد آنا چاہیدا اے۔ عمران خان نے کہیا کہ 18 ویں ترمیم دے تحت وفاق تے صوبیاں وچ کجھ مسئلے حل طلب نیں۔ 18 ویں ترمیم دے بعد آٹا جے کسے نُوں نہیں ملدا تے ذمے داری وفاق اُتے سُٹ دِتی جاندی اے۔ اسیں اپنے سسٹم دا جایزا لینا اے۔ کئی شیواں ہولی ہولی اسیں سکھدے جا رہے آں۔ وزیراعظم نے اپنے مستقبل دے اہداف بارے دَسدیاں ہویاں کہیا کہ اسیں ترقیاتی منصوبے چھیتی توں چھیتی مکمل کرنا تے پنشن دے نظام نُوں بہتر بنانا چاہندے آں۔ ساڈی اکانومی بہتر ہو رہی اے‘ پر ایکسپورٹ ودھان تک اوکڑاں توں نہیں نکل سکدے اوہناں دا کہنا سی کہ ساڈی حکومت دا نمبر ون چیلنج پاور سیکٹر اے۔ پاور سیکٹر بہت وڈا چیلنج اے۔ کئی وار مینوں ایس وجھا توں رات نُوں نیندر نہیں آندی۔ پاور سیکٹر نُوں بہتر بنان دی ضرورت اے۔ پاور سیکٹر وچ کئی فیکٹر ساڈے کنٹرول تے کئی نہیں نیں۔ ایہدے علاوا مہنگائی وی اِک چیلنج اے۔ سانوں اپنی کمکاری ہور بہتر بنانی پوے گی۔ 5 سال دے بعد لوکائی فیصلا کرے گی کہ حکومتی کمکاری کویں رہی۔ ایس توں وکھ وزیراعظم عمران خان نے ٹویٹر بیان وچ کہیا کہ کرونا دے باوجود معیشت بارے چنگی خبر اے‘ نومبر وچ کرنٹ اکاؤنٹ سرپلس 447 ملین ڈالر رہیا‘ مالی سال وچ ہُن تک کرنٹ سر پلس 1.6 بلین ڈالر رہیا جد کہ پچھلے سال ایسے مہینے کرنٹ سر پلس کسارا 1.7 ملین ڈالر سی‘ سٹیٹ بینک دے زرمبادلا ذخایر 13 بلین ڈالر نیں تے ایس طرحاں سٹیٹ بینک دے ذخایر 3 سال دی اُچی ترین سطح اُتے نیں۔