کیس ختم کر دو‘ اپوزیشن سینیٹ دیاں چوناں وچ  بھاگ لوے گی: شیخ رشید۔۔۔٭رویل نیوز٭

اسلام آباد (نیوز ڈیسک) وزیر داخلا شیخ رشید احمد نے کہیا اے کہ آصف علی زرداری نے کریمنالوجی وچ پی ایچ ڈی کیتی ہوئی اے‘ جیل دیاں سختیاں توں بچن لئی کیہ کیہ طریقے اپنائے جاندے نیں‘ اوہ سبھ سیاستداناں توں بُہتا جاندے نیں۔ ایہناں سبھ دی لڑائی عمران خان نالوں ودھ نیب دے نال اے‘ لڑائی ایہ اے کہ کیس ختم کر دو‘ اپوزیشن سینیٹ دیاں چوناں وچ حصا لوے گی۔ لانگ مارچ کہن والیاں نُوں دَسنا چاہندا آں کہ لونگ مارچ تے لانگ مارچ وچ فرق ہوندا اے۔ پیر نُوں اسلام آباد وچ میڈیا نال گلبات کردیاں ہویاں وزیر داخلا نے کہیا کہ اپوزیشن دے جہناں اراکین نے ٹایپ شدا کمپیوٹرائزڈ استعفے بنائے نیں اوہ غیر قانونی نیں ایہناں دی کوئی حیثیت نہیں‘ ہتھ نال لکھنا ہوندا اے کہ میں مسمی فلاں ولد فلاں حلقاں نمبر فلاں بغیر کسے دباء دے استعفا دے رہیا آں۔ مسلم لیگ (ن) دے رکن اسمبلی مرتضی عباسی‘ سپیکر دے کول جان ے کہن کہ میں تے استعفا دِتا ای نہیں‘ ایہ میں امیر مقام نُوں دِتا سی اوہناں نے دُشمنی وچ سپیکر تک پہنچا دِتا۔ شیخ رشید دا کہنا سی کہ مینوں پوری امید اے تے خُشی اے کہ اپوزیشن سینیٹ دیاں چوناں وچ حصا لوے گی تے دعوا کیتا کہ پی ڈی ایم استعفیاں اُتے دُبارا غور کرے گی۔ شیخ رشید دا ہور کہنا سی کہ آصف علی زرداری نے جیلاں بھرن دی گل کیتی جد کہ جیل دا زیادا تر عرص اوہناں نے ہسپتالاں وچ لنگھایا اے‘ اوہ پاکستان دے کلے سیاستدان نیں جہناں نُوں پتا اے کہ جیل دیاں سختیاں توں بچن لئی کیہ کیہ طریقے اپنائے جاندے نیں‘ اوہناں نے کرمنالوجی وچ پی ایچ ڈی کیتی ہوئی اے۔ایہ چاہندے نیں کہ ارباں رُپئے دے جعلی اکاؤنٹس نُوں بھل جائیے‘ معران خان کوئی وی فیصلا کر سکدا اے ایہا وہدی صوابدید اے۔ وفاقی وزیر داخلا دا کہنا سی کہ کل وزیر اعلا سندھ مراد علی شان نے ”وزیراعظم بلاول“ دا نعرا لایا‘ تے جے تُسیں انڈر 19 دے نال ای کھیڈنا اے تے ایس ملک دے حال اُتے رحم کرو۔ اوہناں نے کہیا کہ ایہ لانگ مارچ کَہ رہے نیں پر لونگ مارچ تے لانگ مارچ وچ فرق ہوندا اے۔ اوہناں دا کہنا سی کہ مینوں حالے وی لانگ مارچ دے استقبالیا کیمپ لان دی ہدایت نہیں ملی۔ جے یو آئی (ف) وچ اِک ادھ نُوں چھڈ کے سبھ پرامن لوک نیں۔ پی ڈی ایم دے جلسے دے بارے وچ پُچھے گئے سوال دے جواب وچ شیخ رشید نے کہیا کہ لوکائی نُوں یادداشت اُتے زور پانا چاہیدا اے‘ ایہ ضیاء الحق دا کوئی ناں نہیں لیندے‘ ایہناں نے ضیاء الحق دی تابعداری کیتی اوہناں دیاں جُتیاں پالش کیتیاں‘ ایہ ضیاء الحق دے مالشیے وی سن تے پالشیے وی جد کہ جیء ایچ کیو دے گیٹ نمبر 4 دی پیداوار وی ایہو نیں۔ اِک سوال دے جواب وچ وزیر داخلا نے کہیا کہ 2س ال توں ایہناں نُوں چُپ لگی ہوئی سی‘ ایہناں دا خیال سی کہ کوئی شے وِچوں نکلے گی پر جدوں کجھ نہ ملیا تے ایہناں نُوں سبھ یاد آ گیا تے بھرا بن گئے‘ اِک دوجے دے خلاف ایہناں نے قوم دے 20 سال ضایع کیتے نیں۔