بد عنوانی  توں پاک دیس دی آس اے،آون والے دِناں وچ سیاسی دباو وچ گھاٹا ویکھیا جا ئے گا: صدر مملکت عارف علوی۔۔۔٭رویل نیوز٭

اسلام آباد (نیوز ڈیسک) صدر مملکت عارف علوی نے کہیا اے کہ پی ڈی ایم دا حکومت توں مستعفی ہون دا مطالبا بلا جوا ز اے‘ دو ورھیاں توں سیاسی نظام نُوں عدم استحکام دا شکار کیتا جا رہیا اے‘ انتخابی اصلاحات اُے قومی ڈائیلاگ دی ضرورت اے‘ کدوں تے کہدے نال ڈائیلاگ کرنا اے ایہ وزیراعظم طے کرن گے‘ پی ٹی آئی حکومت دا کلا نقطا کرپشن توں پاک پاکستان اے‘ قومی ڈائیلاگ نیب تے بدعنوانی دے خاتمے دے ایجنڈے دے بغیر ناممکن اے۔ سینئر صحافیاں نال ملاقات دے دوران سیاسی حالات اُتے گلبات کردیاں ہویاں صدر مملکت دا کہنا سی کہ 2014 وچ اسیں آئین دیاں حداں وچ رہ کے عسکری قیادت نال ملاقات کیتی۔ نہ ای حکومت مستعفی ہووے گی تے نہ ای اسمبلیاں تحلیل ہون گیاں۔ آن والے دناں وچ ملک وچ سیاسی تناء وچ کمی آئے گی۔ وزیراعظم دے نال روزانا دی بنیاد اُتے گل ہوندی اے۔ صدر عارف علوی نے کہیا کہ صدر تے وزیراعظم وچ روزانا رابطے برقرار نیں۔ وزیراعظم تے میں اسلامی تواریخی کتاباں پڑھ رہے آں۔ وزیراعظم دا میرے نال مزاح دا پہلو وی رہندا اے۔ اکثر معاملات اُتے وزیراعظم مینوں سمجھاندے نیں۔ انتخابی اصلاحات اُتے قومی ڈائیلا گ دی اہم ضرورت اے۔ بلوچستان وچ گڑ بڑ تے تخریب کاری دے واقعات وچ 99 فیصد بھارت دا ہتھ اے۔ بھارت کھل کے سی پیک دے خلاف اے‘ ایسے لئی ایہدے خلاف سازشاں کیتیاں جا رہیاں نیں۔ صدر عارف علوی نے کہیا اسرائیل نُوں تسلیم نہ کرن دے حوالے توں ساڈ ا مؤقف واضح اے۔ حکومت اُتے اسرائیل نُوں منن دے حوالے توں کوئی غیر ملکی دباء نہیں۔ حکومتی نمایندے ولوں اسرائیل دا دورا کرن دیاں اطلاعواں بے بنیاد نیں۔ وزیراعظم کَہ رہے نیں کہ اپوزیشن این آر او منگ رہی اے۔ اپوزیشن کَہ رہی اے کہ اسیں این آر او نہیں منگ رہے‘ این آر او اُتے بحث سخت ہو گئی اے۔