حکومت مخالف تحریک وچ کوئی جان نہیں: سردار عثمان بزدار۔۔۔٭رویل نیوز٭

لاہور (نیوز ڈیسک) وزیر اعلا پنجاب سردار عثمان بزدار نے کہیا اے کہ قوم پچھلے ادوار وچ ہون والی ارباں رُپئے دی لُٹ مار نہیں بھُلی۔ لوکائی دے خون پسینے دی کمائی اُتے ڈاکا مار کے ذاتی محل اُسارے گئے۔ لوکائی دے ٹیکساں اُتے عیش کرن والے آگو نہیں راہزن نیں۔ حکومت مخالف تحریک وچ کوئی جان نہیں۔ اداریاں دے خلاف مہم سوچی سمجھی سازش اے۔ اپوزیشن دا اداریاں دے خلاف بیانیا اپنی مَوت آپ مر چُکیا اے۔ ادارے ساڈا فخر نیں تے اداریاں دا احترام ساریاں اُتے لازم اے۔ وزیر اعلا عثمان بزدار نے اپنے بیان وچ کہیا کہ ملک تے قوم نُوں اوکڑاں توں کڈھن لئی پُرعزم ہو کے کم کر رہے آں۔ تحریک انصاف دی حکومت لوکائی نُوں بنیاد ی سہولتاں دی فراہمی اُتے توجا دے رہی اے۔ خلوص نیت نال کیتی گئی دن رات محنت نال لوکائی دیاں زندگیاں وچ بہتری لیا رہے آں تے ملک سدھے پاسے رواں دواں ہو چکیا اے۔ مختصر عرصے وچ مختلف شعبیاں وچ اصلاحات کر کے نویں مثال قایم کیتی اے۔ صوبے دی لوکائی دی خشحالی تے ترقی توں ودھ کے کوئی شے عزیز نہیں اے۔ ماضی دیاں حکومتاں نے لوکائی دے اصل مسئلیاں توں مونہ پھیریا۔ وزیراعظم عمران خان تے اوہناں دی ٹیم نے معیشت نُوں درست کرن لئی ٹھوس اقدامات کیتے نیں۔ اوہناں نے کہیا کہ سمت درست تے نیت نیک اے۔ ملک و قوم دی بہتری لئی کیتے گئے فیصلیاں دے مثبت اثرات ساہمنے آنا شروع ہو گئے نیں۔ انشاء اللہ فلاح عاما دے انقلابی پروگراماں اُتے عملدرآمد کردیاں ہویاں اہداف حاصل کراں گے۔ عوامی خدمت دا شروع ہون والا سفر رُکے گا نہیں‘ چلدا رہوے گا۔ اوہناں نے کہیا کہ پچھلے حکمراناں نے اپنے دور وچ لوکائی لئی کجھ نہیں کیتا۔ اپوزیشن دے کول کوئی ایجنڈا نہیں۔ بدعنوان عناصر نُوں صرف لُٹ مار نال اکٹھی کیتی گئی دولت بچان دی فکر اے۔ کرپشن دے ناسور نے پاکستان نُوں پچھے رکھیا اے۔