نواز شریف دا پاسپورٹ فروری 2021 وچ ختم،نواں پاسپورٹ نہ بنیا تے بے وطن ہو جان گے: وکیل قمر بلال ہاشمی۔۔۔٭رویل نیوز٭

لندن/ اسلام آباد (نیوز ڈیسک) پچھلے وزیراعظم تے مسلم لیگ ن دے قائد میاں نواز شریف دے پاسپورٹ دی معیاد اگلے سال فروری وچ ختم ہو رہی اے جہدے بعد اوہناں نُوں بیرون ملک قیام جاری رکھن لئی نویں سفری دستاویز دی ضرورت ہووے گی۔ میڈیا رپورٹاں دے مطابق پارٹی دے اِک آگو نے ناں ظاہر نہ کرن دی شرط اُتے تصدیق کیتی کہ پچھلے وزیراعظم دے پاسپورٹ دی میعاد فروری 2021 وچ ختم ہو رہی اے تے ایہ کہ نواں پاسپورٹ حاصل کرن لئی پارٹی دے اندر تے قانونی ماہرین نال مشاورت جاری اے۔ پاسپورٹ حاصل کرن لئی ذکر کیتے بندے نُوں ذاتی طور اُتے ڈائریکٹوریٹ آف امیگریشن اینڈ پاسپورٹ دے دفتر وچ حاضر ہونا پیند اے۔ دوجی صورت ایہ بن سکدی اے کہ نواں پاسپورٹ حاصل کرن لئی نواز شریف لندن وچ پاکستانی ہائی کمیشن و چ درخاست جمع کروان۔ پاکستانی نژاد وکیل قمر بلال ہاشمی دا کہنا اے کہ موجودا پاسپورٹ دی معیاد ختم تے نواں جاری نہ ہون دی صورت وچ نواز شریف اِک بے وطن بندے بن جان گے تے ایہو جہی صورت وچ اوہناں دے کول ہور دو آپشنز ہون گے۔