kraamaat@gmail.com
+ +92 333-430-6384


پی ڈی ایم توں کوئی خطرا نہیں، ماضی  دیاں حکومتاں قومی خزانے نُوں لُٹدیاں رہیاں نیں‘ موجودا حکومت ترقی دی راہ اُتے اے: وزیراعظم عمران خان۔۔۔٭رویل خبر٭


نمائندا رویل January 05, 2021


اسلام آباد (نیوز ڈیسک) وزیراعظم عمران خان دا کہنا اے کہ حکومت نُوں پی ڈی ایم توں کوئی خطرا نہیں‘ اپوزیشن دی پوری تحریک این آر او لئی اے جہڑا نہیں دواں گے‘ وزیراعظم نے ہور کہیا کہ سستی بنیادی صحت دیاں سہولتاں دی ہر شہری تک رسائی حکومت دی پہلی ترجیح اے‘ حکومت سرکاری ہسپتالاں وچ نظام دی بہتری دے نال نال نجی ہسپتالاں نُوں سستی زمین فراہم کر کے ایس گل نُوں یقینی بنان جا رہی اے کہ غریب گھرانیاں وچ بیماری دی صورت وچ وسایل دی عدم دستیابی اُتے کوئی علاج توں محروم نہ رہوے۔ وزیراعظم نے ایہناں خیالاں دا اظہار پارٹی ترجماناں دے اجلاس سنے صوبائی وزیر صحت پنجاب ڈاکٹر یاسین راشد دی اوہناں نال ملاقات دے دوران کیتا۔ ملاقات وچ معاون خصوصی برائے صحت ڈاکٹر فیصل سلطان وی رلتی سن۔ ڈاکٹر یاسمین راشد نے وزیراعظم نُوں پورے پنجاب دے 2 کروڑ 22 لکھ خانداناں نُوں ہیلتھ کار ڈ دے اجراء اُتے ٹورا کاری توں اگاہ کیتا۔ اوہناں نے دَسیا کہ وزیراعظم دیاں ہدایتاں دے عین مطابق پنجاب دے 100 فیصد خانداناں نُوں 12 مہینیاں دے اندر فی خاندان 7 لکھ 20 ہزار دے ہیلتھ کارڈ دا اجرا مکمل کر لیا جاوے گا۔ چالو مالی سال جون تک پنجاب دی 45 فیصد ابادی جہدے وچ ساہیوال تے ڈیرا غازی خان ڈویژن دے 7 ضلعے شامل نیں وچ ہیلتھ کارڈ دا اجرا مکمل ہو جاوے گا۔ وزیراعظم نے ایہناں اقدامات نُوں خُش آیند متھدیاں ہویاں کہیا کہ سستی بنیادی صحت دیاں سہولتاں دی ہر شہری تک رسائی حکومت دی پہلی ترجیح اے۔ ایس توں وکھ پارٹی ترجماناں دے اجلاس دی صدار دوران وزیراعظم عمران خان نے اپوزیشن نُوں ٹف ٹاین دین دی ہدایت کردیاں ہویاں کہیا کہ پی ڈی ایم فارغ ہو چکی اے تے اپنی مَوت آپ مر رہی اے‘ حکومت نُوں پی ڈی ایم توں کوئی خطرا نہیں‘ ایہناں نے کرونا دے دناں لوکائی دی زندگی نال کھیڈن دی کوشش کیتی‘ اپوزیشن دی پوری تحریک این آر او لئی ا جہڑا نہیں دواں گے۔ سینیٹ دیاں چوناں وچ اپوزیشن نُوں بھرواں جواب دین اُتے اتفاق کردیاں ہویاں عمران خان دا کہنا سی کہ کوئی وی معاشرا احتساب دے بغیر اگے نہیں ودھ سکدا‘ اپوزیشن دا احتساب شروع ہویا تے سبھ اکٹھے ہو گئے‘ کجھ وی ہو جاوے احتساب دا عمل جاری رہوے گا۔وزیراعظم نے کہیا کہ ماضی دیاں حکومتاں قومی خزانے نُوں لُٹدیاں رہیاں نیں‘ موجودا حکومت ترقی دی راہ اُتے گامزن اے‘ کمزور معیشت نُوں درست ٹریک اُتے لا دِتا اے‘ سارے معاشی اشاریے درست سمت وچ نیں‘ نویں سال وچ کمکاری ہور بہتر کرن تے ڈیلیوری اُتے توجا ہووے گی۔ ایس توں پہلاں سماجی رابطے دی ویب سائٹ ٹویٹر اُتے اپنی ٹویٹ وچ وزیراعظم عمران خان دا کہنا سی کہ ریاستی اداریاں نُوں سیاسی مداخلت دے بغیر ازادانا طور اُتے کم کرن دی اجازت ہووے تے قوم نُوں فایدا ہوندا اے۔ وزیراعظم نے مثال دیندیاں ہویاں کہیا کہ نیب نے ساڈے دور وچ پچھلے دو سال وچ 389 ارب رُپئے دی وصولی کیتی‘ جد کہ ایسے نیب نے 2008 توں 2018 دے 10 سالا دور وچ صرف 104 ارب رُپئے ریکور کیتے‘ ایہ کرپٹ حکمراناں دے کالے دور دے 10 ورھے سن۔