ووٹر کسے نُوں جواب دہ نہیں اے،میثاق جمہوریت وچ سیاسی جماعتاں نے ووٹاں دی ویچ وٹک روکن اُتے اتفاق رائے کیتا:سپریم کورٹ ۔۔۔٭رویل خبر٭

اسلام آباد (نیو ز ڈیسک) سپریم کورٹ نے سینیٹ چوناں اوپن بیلٹ پیپر راہیں کروان بارے حکومتی ریفرنس دی سنوائی دے موقع اُتے کئی قانونی سوال چُکدیاں ہویاں ملک دیاں ساریاں اکائیاں نُوں نوٹس جاری کر دِتے جد کہ ملک دیاں وڈیاں سیاسی جماعتاں نُوں ایس اہم معاملے اُتے دلچسپی دی صورت وچ فریق بنن لئی درخاست دایر کرن دا حق دیندیاں ہویاں کیس دی سنوائی 11 جنوری تک لئی ملتوی کر دِتی اے۔ ریفرنس دی سنوائی چیف جسٹس گلزار احمد دی اگوائی وچ 5 رکنی لارجر بینچ نے کیتی۔ سنوائی دوران جسٹس اعجاز الاحسن نے اٹارنی جنرل توں پُچھیا کہ جے آئین کہوے الیکشن سیکریٹ بیلٹ نال کروایا جاوے تے ماتحت قانون ایہنوں کویں تبدیل کر سکدا اے‘ کیہ پارلیمنٹ ایہ وی کَہ سکدا اے قومی اسمبلی دا انتخاب اوپن بیلٹ راہیں کروایا جاوے۔ اٹارنی جنرل صاحب تُسیں ایس معاملے اُتے ساریاں سیاسی جماعتاں دے وچکار قومی اتفاق رائے کیوں پیدا نہیں کردے‘ میثاق جمہوریت وچ سیاسی جماعتاں نے ووٹاں دی ویچ وٹک روکن اُتے اتفاق رائے کیتا سی۔ جسٹس یحییٰ آفریدی نے ایس موقع اُتے نکتا چُکیا کہ سپریم کورٹ ایس جھیڑے وچ کیوں مداخلت کرے؟ آرٹیکل 66 کہندا اے مقننا دے امور عدالتاں وچ بحث ہیٹھ نہیں لیاندے جا سکدے۔ اٹارنی جنرل نے ایس موقع اُتے عدالت نُوں دَسیا کہ حکومت نے ایس بارے اِک آئینی ترمیمی بل پیش کر دِتا اے‘ آئین نے قومی اسمبلی دے الیکشن لئی قانون سازاں اُتے انحصار کیتا اے‘ بھارت وچ ایہو جہی صورتحال دا ساہمنا رہیا‘ ووٹر کسے نُوں جواب دہ نہیں اے۔عدالت عظمیٰ نے ایس موقع اُتے چیئرمین سینیٹ‘ سپیکر قومی اسمبلی‘ چاراں صوبائی اسمبلیاں دے سپیکرز‘ صوبائی ایڈووکیٹ جنرلز نُوں نوٹس جاری کردیاں ہویاں ملک دیاں وڈیاں سیاسی جماعتاں نُوں ایس اہم معاملے اُتے دلچسپی دی صورت وچ درخاست راہیں فریق بنن‘ قومی اخباراں وچ اشتہار دین دا حکم دیندیاں ہویاں معاملے دی سنوائی 11 جنوری لئی ملتوی کر دِتی اے۔