دیس وچ تعلیمی ادارے 18جنوری توں مرحلا وار کھولے جاون گے بورڈ دے پرچے مئی تے جون وچ ہون گے: صوبائی وزیراں ولوں تعلیم کانفرنس۔۔۔٭رویل خبر٭

اسلام آباد (نیوز ڈیسک) حکومت نے 9 ویں توں 12 ویں تک تعلیمی ادارے 18 جنوری توں کھولن دا اعلان کر دِتا اے۔ پہلی توں 8 ویں تک تعلیمی ادارے 25 جنوری توں کھولے جان گے جد کہ پہلی فروری توں یونیورسٹیاں وچ پڑھائی دا عمل شروع ہووے گا۔ تفصیلات دے مطابق پیر نُوں بین الصوبائی وزرائے تعلیم کانفرنس ہوئی جہدے وچ پورے ملک وچ تعلیمی ادارے کھولن بارے مشاورت کیتی گئی۔ وفاقی وزیر تعلیم شفقت محمود دی قیادت ہیٹھ بین الصوبائی وزرائے تعلیم کانفرنس وچ چاراں صوبیاں دے وزرائے تعلیم رلت کیتی جہدے بعد وفاقی وزیر تعلیم شفقت محمود تے وزیراعظم دے صحت دے اُچیچے معاون فیصل سلطان نے سانجھی پریس کانفرنس کردیاں ہویاں دَسیا کہ اجلاس وچ تعلیمی ادارے 11 جنوری توں کھولن دا فیصلا کیتا گیا اے‘ 9 ویں توں 12 ویں تک تعلیمی ادارے 11 جنوری توں کھولے جان گے۔ پہلی توں 8 ویں تک تعلیمی ادارے 25 جنوری توں کھولے جان گے۔ جد کہ پہلی فروری توں یونیورسٹیاں کھولن دا فیصلا وی کیتا گیا اے۔ استاد تے انتظامیا 11 جنوری نُوں تعلیمی اداریاں وچ جا سکن گے۔ مارچ تے اپریل وچ ہون والے بورڈز دے امتحانات ملتوی کر دِتے گئے نیں۔ بورڈ دے پرچے ہُن مئی تے جون وچ ہون گے۔ شفقت محمود نے دَسیا کہ 15 تاریخ نُوں اِک ہور اجلاس ہووے گا جہدے وچ صورتحال نُوں ساہمنے رکھدیاں ہویاں ہور فیصلے ہو سکدے نیں‘ مارچ وچ ہون والے امتحانات مؤخر ہون گے تے موسم گرما دیاں چھٹیاں وی ایس سال گھٹ ہون گیاں۔ معاون خصوصی صحت نے دَسیا کہ کرونا دی دوجی لہر دی شدت وچ کمی تعلیمی اداریاں دی بندش دے کارن ہوئی۔ اوہناں دا کہنا سی کہ ایس معاملے وچ سانوں احتیاط دی ضرورت اے کیوں جے دوجی لہر حالے ختم نہیں ہوئی۔ ایس توں پہلاں تعلیمی ادارے 11 دی بجائے 25 جنوری نُوں کھول دین دا امکان وی ظاہر کیتا گیا سی‘ سکولاں نُوں مرحلا وار کھولن دیاں تجویزاں وی دِتیاں گئیاں سن۔ 25 جنوری توں پہلے مرحلے وچ صرف پرائمری سکول کھولن‘ دوجے مرحلے وچ مڈل تے سیکنڈری سکولز تے تیجے مرحلے وچ اعلا تعلیمی ادارے کھولن دیاں تجویزاں دِتیاں گئیاں سن۔ 4 جنوری دے اجلاس وچ ایہناں ساریاں تجویزاں اُتے مشاورت دے بعد 9 ویں جماعت توں 12 ویں تک سکولز 11 جنوری توں کھولن دا فیصلا کیتا گیا اے۔ وفاقی وزیر تعلیم نے کہیا کہ پچھلے سال پاکستان سنے پوری دنیا وچ ہر شے بدل گئی‘ 2020 دا سال پوری دنیا لئی مشکل سال رہیا‘ تعلیمی ادارے‘ دفاتر‘ صنعتاں تے مارکیٹاں بند رہیاں‘ کرونا دے کارنس کول حاضری دی بجائے آن لاین نظان اُتے جانا پیا‘ کرونا کارن بہت سارے پیارے وی ساڈے توں وِچھڑ گئے پر ساریاں اوکڑاں دے باوجود اِک نصاب تعلیم اُتے کم جاری اے۔ اِک نصاب تعلیم لئی کرونا دے باوجود سارے عملے نے کم جاری رکھیا‘ اِک نصاب پورے ملک لئی مثبت اقدام ہووے گا‘ ایس لئی ساڈی کوشش اے اِک تعلیمی نصاب ماڈل بن جاوے‘ آن لاین نظام اُتے آن دے بعد کئی شہراں وچ پڑھیاراں نُوں اوکڑاں دا ساہمنا رہیا‘ پر تعلیم دے سارے چیلنجاں نُوں قبول کر کے ایہناں اُتے کم کیتا جاوے گا۔