بہاولپور دی لوکائی نے میرا دل جت لیا‘ لوکائی میرے نال پیدل چلی‘شاندار استقبال کیتا :مریم نواز ۔۔۔۔٭رویل خبر٭

بہاولپور (نیوز ڈیسک) مسلم لیگ (ن) دی نائب صدر مریم نواز دا کہنا اے کہ عمران جے عزت نال جان اُتے راضی نہیں تے لوکائی دے نال رَل کے کجھ فیصلا کراں گے۔ بہاولپور وچ رانا طارق دے گھر میڈیا نال گلبات کردیاں ہویاں مسلم لیگ (ن) دی نائب صدر مریم نواز دا کہنا سی کہ پچھلے دن بہاولپور دی لوکائی نے میرا دل جت لیا‘ لوکائی میرے نال پیدل چلی‘شاندار استقبال کیتا‘ تے اوتھوں دی لوکائی نے سیاسی مزاج توں ہٹ کے اپنا ای ریکارڈ توڑیا‘ کیوں جے ریلیاں ایتھوں دا کلچر نہیں‘ میں حیران آں کہ اینی وڈی گنتی وچ لوک کدی گھراں توں نہیں نکلے‘ ایسے لئی میں نے کل کہیا سی پنجاب جاگ گیا اے۔ مریم نواز دا کہنا سی کہ لانگ مارچ ضرور ہووے گا پر پی ڈی ایم ایہدی تاریخ دا اعلان لوکائی تے موسم دی سہولت نُوں ساہمنے رکھ کے کرے گی‘ اسیں استعفے وی دواں گے تے عمران خان نے استعفا نہ دِتا تے 31 جنوری نُوں ویکھاں گے‘ عمران جے عزت نال جان اُتے راضی نہیں تے لوکائی دے نال رَل کے کجھ ہو ر فیصلا کراں گے۔ایس توں پہلاں مَچ واقع دی مذمت کردیاں ہویاں سماجی رابطے دی ویب سائٹ ٹویٹر اُتے اپنی ٹویٹ وچ مریم نواز دا کہنا سی کہ مَچ وچ دہشتگردی مذمت جوگ‘ واردات وفاقی تے صوبائی حکومت دی سنگدلی اے‘ بے حسی تے نا اہلی دا مونہ بولدا ثبوت اے‘ حکومت نُوں نہ کم آندا اے تے نہ ای زخماں اُتے مرحم رکھنا آندا اے‘ ایہو جہی حکومت نُوں لوکائی اُتے مسلط رہن دا کوئی حق نہیں۔