مریم نواز اپنی ساکھ بچان لئی چاہندے نیں کہ اوہناں نُوں پھڑ کے جیل گھل دِتا جاوے:عثمان بزدار ۔۔۔٭رویل خبر٭

لاہور (نمایندا رویل) وزیر اعلا پنجاب عثمان بزدار دی معاون خصوصی اطلاعات فردوس عاشق اعوان نے کہیا اے کہ مریم نواز فیس سیونگ لئی گرفتار ہونا چاہندے نیں‘ کیپٹن صفدر تے مولانا فضل الرحمان نُوں اِک دوجے دے پَیر چُمدیاں ہویاں وی ویکھاں گے۔ پی ڈی ایم نے آصف زرداری دے ہتھ اُتے بیعت کیتی‘ پر آصف زرداری نے ہتھ جھٹک لیا‘ مولانا وی جھٹک لین گے۔ لاہور وچ میڈیا نال گلبات کردیاں ہویاں معاون خصوصی دا کہنا سی کہ مریم نواز اپنی ساکھ بچان لئی چاہندے نیں کہ اوہناں نُوں پھڑ کے جیل گھل دِتا جاوے۔ لیہ وچ 100 میگا واٹ دا منصوبا شروع کر رہے آں جہدے نال سستی بجلی حاصل ہووے گی‘ حکومت لوکائی نُوں ریلیف دین دی ذمے داری نبھائے گی‘ پچھلی حکومت نے توانائی دے مہنگے منصوبیاں نال نقصان اپڑیا ترقی دا سفر رائیونڈ تک محدود سی‘ ہُن پورے ملک وچ کھلر گیا اے۔ معاون خصوصی نے کہیا کہ پی ڈی ایم جلسے وچ مولانا فضل الرحمان نُوں بطور ڈھال استعمال کر کے مدرسے دے پڑھیار لیاندے گئے‘ تُسیں حالے کیپٹن صفدر نُوں مولانا فضل الرحمان دے ہتھ چُمدیاں ہویاں ویکھیا اے‘ ایہناں نُوں اِک دوجے دے پَیر چُمدے ہوئے وی ویکھو گے۔ ڈاکٹر فردوس عاشق اعوان نے کہیا کہ ووٹ نُوں عزت دو دا نعرا لان والیاں نے لُٹ مار نُوں عزت دا بیانیا اپنا لیا‘ پیپلز پارٹی نے ن لیگ دے نال ہتھ کر دِتا‘ ایہناں لوکاں دیاں آپس وچ اکھاں مل رہیاں نیں نہ نظریا‘ مریم بی بی تے شوبا ز شریف پہلے اِک پیج اُتے آن‘ بلاول بھٹو لُکا چھپتی دی وجھا توں ویڈیو لنک اُتے آ گئے نیں‘ ہُن اِک دوجے نال اکھ ملان دے قابل نہیں رہے۔ فردوس عاشق اعوان نے ہور کہیا کہ آصف زرداری دا استعفا نہ دین دا اعلان پی ڈی ایم اُتے خنجر بن کے چلیا‘ مریم بی بی تاریخاں دیندے رہن گے‘ ایہناں نُوں لوکائی دی پذیرائی نہیں ملے گی‘ مریم بی بی چاہندے نیں ایہناں نُوں گرفتار کیت جاوے تاں جے فیس سیونگ ملے۔