کرک مندر نوں ساڑن دا واقعا،بحالی دی رقم مولوی شریف تے گینگ توں وصول کرو‘ دنیا وچ بدنامی ہوئی، دُبارا اُساری شروع کرن دی ہدایت: ازخُد نوٹس دی سنوائی۔۔٭رویل خبر٭

اسلام آباد (نیوز ڈیسک) سپریم کورٹ وچ کرک وچ مندر ساڑن بارے از خُد نوٹس دی سنوائی دے دوران چیف جسٹس آف پاکستان جسٹس گلزار احمد نے ریمارکس دِتے کہ حکومت دی رِٹ برقرار رہنی چاہیدی اے‘ پولیس اہلکاراں نُوں صرف معطل کرنا کافی نہیں اے‘ اس واقع نال پاکستان دی پوری دنیا وچ بدنامی ہوئی‘ سمادھی دی بحالی دی رقم مولوی شریف تے اوہدے گینگ توں وصول کرو‘ جدوں تک ایہناں لوکاں دی جیب توں پیسے نہیں نکلن گے‘ ایہ دُبارا ایہو کم کرن گے‘ متروکا وقف املاک دے چیئرمین اپنے فرایض خُش اسلوبی نال سر انجام نہیں دے رہے‘ ایہناں دے ادارے دے ملازمین مندر دیاں زمیناں اُتے کاروبار کر رہے نیں۔ معاملے دی سنوائی چیف جسٹس گلزار احمد دی اگوائی 3 رکنی بینچ نے کیتی۔ ایس موقع اُتے چیئرمین اقلیتی کمیشن شعیب سڈل‘ آئی جی کے پی کے‘ چیف سیکرٹری کے پی‘ چیئرمین کے پی مترولا وقف املاک تے چیئرمین ہندو کونسل عدالت وچ پیش ہوئے۔ سنوائی دوران چیئرمین اقلیتی کمیشن شعیب سڈل نے عدالت نُوں دَسیا کہ ایس واقع نال پور ے ملک دی بدنامی ہوئی‘ کے پی متروکا وقف املاک نے مندر دی تھاں دا تحفظ نہیں کیتا‘ کرتار پور وانگوں ایہ تھاں ہندوواں لئی مقدس اے۔ آئی جی کے پی نے عدالت نُوں دَسیا کہ ایس پی تے ڈی ایس پی سنے ڈیوٹی اُتے معمور 92 اہلکاراں نُوں معطل کیتا اے‘ واقع وچ ملوث 109 بندے گرفتار نیں‘ ذکر کیتی تھاں اُتے جمعیت علماء پاکستان دا اجتماع سی‘ ایس موقع اُتے موجود 6 علماء وِچوں صرف مولوی شریف نے لوکائی نُوں احتجاج کرن اُتے اُکسایا۔ چیف سیکرٹری کے پی نے ایس موقع اُتے مؤقف اپنای اکہ کے پی حکومت ہندو سمادھی نُوں نویں سرے توں اُسارے گی‘ سمادھی اُتے 100 پولیس اہلکارں دی نویں نفری تعینات کر دِتی گئی اے۔ چیئرمین کے پی متروکا وقف املاک نے دَسیا کہ کرک وچ واقع ایہ سمادھی ہندو کمیونٹی آپ چلاندی اے‘ ایہ مندر فعال نہیں سی ایس لئی متروکا وقف املاک دا عملا ایتھے نہیں ہوندا۔ چیئرمین ہندو کونسل رمیش کمار نے موقف اپنای اکہ کرک مندر وچ میلے وی لگدے نیں ہر مہینے 3 توں 4 سو ہندو ایس مندر اُتے حاضری دیندے نیں‘ 1997 وچ وی ایسے مولوی شریف نے ایس مندر نُوں توڑیا سی‘ سپریم کورٹ دے احکامات دے باوجود متروکا وقف املاک تے کے پی حکومت نے مندر نہیں اُساریا سی‘ متروکا وقف املاک دے انکار دے بعد ہندو کونسل نے اپنے فنڈ نال مندر لئی پیسے دِتے سن‘ کے پی متروکا وقف املاک وچ بہت زیادا کرپشن اے‘ 1947 وچ لیاقت علی خان تے نہرو نے چیئرمین متروکا وقف املاک بارے معاہدا کیتا سی‘ معاہدے دے تحت پاکستان وچ ہندو جد کہ بھارت وچ متروکا وقف املاک دا چیئرمین مسلمان ہووے گا‘ 73 ورھیاں توں پاکستان وچ ہندو نُوں متروکا وقف املاک دا چیئرمین نہیں بنایا گیا‘ بھارت وچ 1947 دے بعد توں متروکا وقف املاک دا چیئرمین مسلمان اے۔ چیف جسٹس نے ایس موقع اُتے چیئرمین ہندو کونسل نُوں مخاطب کردیاں ہویاں کہیا کہ تُسیں سانوں دستاویزات دوو معاہدا کدوں ہویا صرف گلاں نال کم نہیں چلے گا۔ جسٹس اعجاز الاحسن نے کہیا کہ سوشل میڈیا راہیں ایہ تصویراں ساری دنیا وچ کھلر چکیاں نیں‘ اپنیاں عمارتاں بنان لئی وقف املاک دے کول پیسا ہے پر ہندوواں لئی نہیں‘ پولیس دا موقف اے کہ خون خرابے دی وجھا توں پولیس چُپ کھلوتی رہی۔ عدالت عظمیٰ نے ایس موقع اُتے مندراں تے گردواریاں دیاں زمیناں توں تجاوزات ختم کروان سنے متروکا وقف املاک توں پوریں ملک دے مندراں تے گرو دواریاں‘ متروکا وقف املاک دیاں زمیناں اُتے چلن والے مقدمیاں تے فعال تے غیر فعال مندراں دی 2 ہفتیاں وچ رپورٹ منگ لئی اے۔ عدالت عظمیٰ نے ایس موقع اُتے چیئرمین متروکا وقف املاک نُوں فوری طور اُتے کرک مندر دا دور اکرن تے دُبارا اُساری شروع کرن دی ہدایت کردیاں ہویاں متروکا وقف املاک کے پی نُوں اقلیتی کمیشن نال مشاورت دی ہدایت وی کیتی اے۔ ایس توں بعد از خُد نوٹس کیس دی سنوائی 2 ہفتیاں لئی ملتوی کر دِتی گئی۔ کرونا دے وار جاری59واصل 1900نویں مریض: نیشنل کمانڈ اینڈ اپریشن سینٹر۔۔٭رویل خبر٭ اسلام آباد (نیوز ڈیسک) ملک وچ کرونا نال ہور 59 بندے چلانا کر گئے جد کہ 1900 توں ودھ نویں کیسز وی رپورٹ ہوئے نیں۔ نیشنل کمانڈ اینڈ اپریشن سینٹر (این سی او سی) دے مطابق پچھلے 24 گھنٹیاں دے دوران پورے ملک وچ کرونا دے 35073 ٹیسٹ کیتے گئے جہناں وِچوں 1947 بندیاں وچ کرونا وایرس دی تصدیق ہوئی جد کہ وایرس نال 59 ہلاکتاں ہوئیاں۔ پچھلے 24 گھنٹیاں وچ کرونا مثبت آن دی شرح 5.7 فیصد رہی۔ ملک وچ کرونا نال ہلاکتاں دی گنتی 10409 ہو گئی اے تے مجموعی کیسز 4 لکھ 90 ہزار 476 تک جا اپڑے نیں جد کہ فعال کیسز دی گنتی 35707 اے۔ ایہدے علاوا 24 گھنٹیاں دے دوران پور ے ملک وچ 1903 روگی کرونا توں صحت یاب وی ہوئے نیں جہدے بعد مجموعی طور اُتے صحتیاب ہون والیاں دی گنتی 444360 ہو گئی اے۔ دوجے پاسے پاکستان سول ایوی ایشن اتھارٹی نے نواں سفری ہدایت ناما جاری کردیاں ہویاں سفری پابندیاں 31 جنوری 2021 تک ودھا دِتیاں۔ نوٹیفکیشن دے مطابق برطانیا تے افریقا توں پاکستان آن والے مسافراں اُتے پابندی دا اطلاق ہووے گا۔ برطانیا تے ساؤتھ افریقا وچ مقیم قلیل مدتی ویزے والے پاکستانیاں نوں سفر کرن دی اجازت ہووے گی‘ دُہری شہریت دے حاملے مسافراں نائیکوپ‘ پی او سی کارڈ ہولڈرز تے ورک ویزا والے وی پاکستان دا سفر کر سکن گے۔ برطانیا توں آن وال مسافراں نُوں سفر توں 72 گھنٹے پہلاں کرونا ٹیسٹ لازمی کروانا پوے گا۔ پاکستان پہنچن اُتے مسافراں دا فوری کرونا ٹیسٹ کیتا جاوے گا۔ رپورٹ منفی آن دی صورت وچ مسافراں نُوں 5 دن اکلاپے وچ لنگھانے پین گے۔ برطانیا تے افریقا دے سفارتکاراں تے اوہناں دیاں فیملیاں نُوں پاکستان سفر کرن دی خصوصی اجازت دِتی گئی اے۔