میت دیاں کُجھ نظماں ـــ رویل
باڈی سپرے خریددیاں
بھلا تینوں چیتے کرنا
میرا بندا تے نہیں سی ناں ……
بس ایویں ای تیری سگندھ
مینوں شاپنگ مال وچ وی
کلیاں نہیں چھڈدی
کئی واری چیٹ باکس تک
اپڑدیاں اپڑدیاں
کُجھ آف لاین مسیج
جیون دا اوہ رنگ دیندے نیں
جو انیکاں آن لاین
مِتراں توں وی نہیں ملدا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈکشنری وچ
تیرے سٹار دا اکھر ویکھیا
اوہدا معنی لبھیا،تے فیر
بُک شاپ تے جا
اوس سٹار بارے بُک لبھی
توں سگویں انجے دی ایں
جویں ایس سٹار بُک وچ لکھیا
ہاں! میرا سٹار……
کدے وی نال نہیں جڑن لگا
اگ یاں‘ پانی وانگوں
دوویں اپنی اپنی تھاں تے
ہلدے تے وگدے رہن گے
۔۔۔۔۔۔ ۔۔۔۔۔۔۔۔۔۔۔۔۔۔۔۔۔
خزانا
اوہدے ہونٹھاں تے اُبھرے
کُجھ لفظ…………
میرے ناں نہیں ہن
پر اوہدے ہونٹھاں نے
جہڑے لفظ معتبر کیتے
اوہ من اندر
کئی جذبے پیدا کر رہے نیں
جس کر کے ہُن توں بعد
میرے کول معتبر لفظاں دا خزانا رہے گا
٭
پُرانی کتاب
پُرانی کتاب وچ
تیری وینی نالوں ٹُٹی ونگ نے
جو اثر چھڈیا اے
اوہ پورے دیوان وچ نہیں اے
٭
