kraamaat@gmail.com
+ +92 333-430-6384


ہزارا برادری دے دُکھاں تے منگاں دا احساس اے،بلوچستان وچ بیرونی طاقتاں دی دخل اندازی دا ساریاں نُوں پتا اے: وزیراعظم عمران خان ---٭رویل خبر٭


نمائندا رویل January 07, 2021


اسلام آباد/ کوئٹہ (نیوز ڈیسک) وزیراعظم عمران خان نے کہیا اے کہ ہزارا برادری دے دُکھاں تے منگاں دا احساس اے‘ جاندے آں گوانڈھی ملک فرقا وارانا دہشتگردی نُوں ہوا دے رہیا اے‘ اپنی لوکائی دے اعتماد توں خیانت نہیں کراں گا‘ میں پہلے وی مشکل ویلے وچ ہزارا برادری دے کول آیا آں تے مچ واقع دے لواحقین نال چھیتی تعزیت لئی آواں گا۔ بدھ والے دن وزیراعظم عمران خان نے سماجی رابطے دی ویب سائٹ اُتے ٹویٹ کردیاں ہویاں کہیا کہ مچ دے سفاکانا دہشتگرد حملے وچ اپنے پیاریاں نُوں گنوان والے ہزارا خانداناں نُوں میں دُبارا یقین دہانی کروانا چاہندا آں کہ میں اوہناں دیاں تکلیفاں تے منگاں توں اگاہ آں۔ مستقبل وچ ایہو جہے حملیاں دے تدارک لئی اسیں اقدامات چُک رہے آں تے جان لوو کہ ساڈا گوانڈھی ایس فرقا وارانا دہشتگردی نُوں ہوا دے رہیا اے۔ میں تہاڈا درد ونڈدا آں تے غم دے ایہناں لمحیاں وچ اکسُرتا دے اظہار لئی پہلے وی تہاڈے کول آ چُکیا آں۔ شہداء دے لواحقین نال دُعا تے تعزیت لئی میں ذاتی طور اُتے دُبارا وی چھیتی حاصر ہوواں گا۔ میں اپنے لوکاں دے اعتماد نُوں کدی ٹھیس نہیں پہنچاواں گا۔ مہربانی کر کے اپنے پیاریاں نُوں د فن کرو تاں جے اوہناں دیاں روحاں آسودگی پان۔ دوجے پاسے مچ واقع دے لواحقین تے دھرنے دے رلتیاں نال وزیر اعلا بلوسچتان تے وفاقی وزراء دے اِک واری فیر مذاکرات ناکام ہو گےء‘ دھرنا منتظمین نے وزیراعظم دے آن نال میتاں دفناون تے دھرنا ختم کرن نُوں مشروط کر دِتا۔ بدھ والے دن وزیر اعلا بلوچستان جام کمال دی قیادت وچ وفد نے مغربی بائی پاس شاہراہ اُتے مچ واقع دے لواحقین تے مجلس وحدت المسلمین ولوں جاری دھرنے دے منتظمین نال مذاکرات کیتے ایس موقع اُتے وفاقی وزیر علی زیدی‘ وزیراعظم دے معاون خصوصی سید عباس بخاری‘ ڈپٹی سپیکر قومی اسمبلی قاسم خان سوری‘ صوبائی وزراء میر ضیاء اللہ لانگو‘ انجینئر زمرک خان اچکزئی‘ پارلیمانی سیکرٹری بشریٰ رند‘ چیف سیکرٹری کیپٹن (ر) فضیل اصغر تے ہور وی موجود سن۔ وزیر اعلا نے دھرنے دے رلتیاں نال خطاب کردیاں ہویاں کہیا کہ میں مچ واقع توں اِک پہلاں دبئی گیا سی‘ میڈیا اُتے غلط خبراں چلائیاں گئیاں‘ بلوچستان نُوں سڑدیا ں سبھ نے ویکھیا اے‘ 10 سال پہلے کوئٹہ دی حالت کہو جہی سی ساریاں نُوں پتا اے پر اسیں محنت کیتی تے ڈھائی سالا حکومتی مدت دے دوران اسیں کئی شیواں نُوں بہتر کیتا اے‘ صوبائی راجدھانی کوئٹہ ساڈا ساریاں دا سانجھا شہر اے‘ اسیں ہمیشا ساریاں دا سوچیا کدی اِک کمیونٹی دا نہیں سوچیا‘ جے ایتھے حالات خراب ہون گے تے ایہدے نتیجے اسیں سارے بھگتاں گے‘ مچ واقع نال بلو چستان اِک واری فیر لہو لہان ہو گیا اے جہدے نال ساڈا ساریاں دا نقصان ہویا اے‘ مَوت انسان دے ہتھ وچ نہیں سگوں اللہ دے ہتھ وچ اے غفلت اُتے میں تے میری کابینا دا ہر بندا جواب دہ اے‘ بلوچستان وچ بیرونی طاقتاں دی دخل اندازی دا ساریاں نُوں پتا اے اسیں ایتھے سیاست کرن نہیں آئے آں‘ بلوچستان نے ہمیشا توں مشکل حالات دا مقابلا کیتا اے‘ امام بارگاہ فاتحہ خوانی لئی گیا سی‘ صوبے دے مسئلے اسیں تے تُسیں رَل کے حل کرنے نیں‘ جے اسیں نیت ٹھیک کراں گے تے مسئلے حل کرن وچ اسانی ہووے گی‘ ٹیکنالوجی دا دور اے کوئی شے لُک نہیں سکدی‘ مچ واقع بہت ناخشگوار واقع اے‘ میں بحیثیت وزیر اعلا اِک ذمے دار آں‘ میری تہاڈے توں اپیل تے التجا اے کہ لواحقین میتاں نُوں دفنا کے دھرنا ختم کرن‘ وزیراعظم‘ گورنر سنے سارے آن گے تے تہاڈے نال اپنے احساسات شیئر کرن گے‘ مسئلے شروع دن توں آخر دن تک رہن گے پر جے کوشش کیتی جاوے تے ایہناں مسئلیاں نُوں حل کیتا جا سکدا اے۔نیتاں وچ فطور نال کدی وی مسئلے حل نہیں ہون گے‘ لواحقین جہڑے غم توں لنگھ رہے نیں ایہناں احساسات وچ میں نہیں دَس سکدا‘ جے عمران خان دے آن نال ایتھے مسئلے حل ہوندے تے اوہ دو منٹ نہ لاندے ایتھے آن وچ‘ جے آئے تے اوہ کہن گے کہ ایہ مسئلے صوبائی حکومت دے نیں‘ چاغی دے روٹ توں لنگھنا زائرین لئی بہت وڈا عذاب سی پر اج حالات قدرے بہتر نیں۔ وزیراعظم عمران نال نال میری گل ہوئی اے وزیراعظم نے اعلان کیتا اے کہ اوہ وارثاں دے کول آپ آن گے‘ حالات جویں دے وی ہون وزیراعظم نُوں آنا چاہیدا اے‘ ایس توں پہلاں صدر پاکستان وی آئے سن۔ ایس توں وکھ مچ دُکھانت اُتے قائت ملت جعفریا دے حکم اُتے شیعا علماء کونسل ولوں جمعے نُوں پورے ملک وچ احتجاج دا اعلان کر دِتا گیا اے۔ علاما عارف واحدی دا کہنا اے کہ گیشتری وچ لرزا خیز واردات وچ 11 معصوم بے گناہ محنت کشاں نُوں ہتھ پَیر بنھ کے بے دردی نال قتل کرنا سفاکیت دی بد ترین مثال اے‘ ہزارا قبیلے دے بندیاں دا قتلام کرن والیاں خلاف فیصلا کن ٹارگٹڈ اپریشن کیتا جاوے‘ سفاک قاتلاں نُوں قانون دے شکنجے وچ جکڑ کے انصاف دے کٹہرے وچ لیاندا جاوے۔