پی ڈی ایم سارا زور این آر او لئی لا رہی اے،لوکائی ترقی تے خشحالی چاہندی اے‘ افرا تفری نہیں:سردار عثمان بزدار  ---٭رویل خبر٭

لاہور (نیوز ڈیسک) وزیر اعلا پنجاب سردار عثمان بزدار نے کہیا اے کہ پی ڈی ایم سارا زور این آر او لئی لا رہی اے پر وزیراعظم عمران خان دے ہوندیاں ہویاں ایہناں نُوں این آر او ں کدی نہیں ملے گا۔ اپوزیشن دی تحریک دا کوئی مقصد نہیں۔ پی ڈی ایم دا ایجنڈا صرف تے صرف ذاتی مفادات دا تحفظ اے۔ پاکستانوی ناعاقبت اندیش عناصر دے جھانسے وچ نہیں آئے گی۔ معیشت درست ٹریک اُتے آ چکی اے۔ وزیر اعلا عثمان بزدار نے اپنے بیان وچ کہیا کہ کرونا دے باوجود کاروباری سرگرمیاں وچ تیزی آ رہی اے۔ لوکائی ترقی تے خشحالی چاہندی اے‘ افرا تفری نہیں۔ اوہناں نے کہیا کہ 22 کروڑلوکائی بے مقصد احتجاج نال لا تعلقی کر چکی اے تے پاکستانی لوکائی کسے نُوں ترقی دے سفر وچ رخنا نہیں پان دیوے گی۔ دوجے پاسے وزیر اعلا پنجاب دی معاون خصوصی برائے اطلاعات ڈاکٹر فردوس عاشق اعوان نے اپنے بیان وچ کہیا اے کہ ’کرپشن دے مگر مچھ‘ پی ڈی ایم دی چھتری ہیٹھ جمع نیں۔ ایہ اوہ عناصر نیں جہناں نے اپنے دور حکومت وچ پاکستان دیاں نینہاں نُوں کھوکھلا کیتا۔ راجکماری تے شہزادے دے ابا جان دی کرپشن دیاں داستاناں بچے بچے دی زبان اُتے نیں‘ ایہناں دے وڈیاں نے اِک دوجے نُوں مسٹر 10پرسنٹ تے علی بابا چالھی چور دے خطاب دِتے تے اِک دوجے دے خلاف کرپشن دے مقدمے بنان والے اج اِک ای گھاٹ توں پانی پی رہے نیں۔ اوہناں نے کہیا کہ پاکستانی لوکائی ایہ سوال پُچھن دا حق رکھدی اے کہ کل دے دشمن اج کویں شیر و شکر ہوئے‘ ایہناں وچ رتی جنی وی شرمہوندی تے ایہ چُلو بھر پانی وچ ڈُب مردے۔