پی ڈی ایم نے قوم نُوں ازادی تے جمہوریت دا راہ وکھایا اے:  مولانا فضل الرحمان ---٭رویل خبر٭

لاہور (نیوز ڈیسک) پاکستان ڈیمو کریٹک موومنٹ (پی ڈی ایم) دے آگو مولانا فضل الرحمان دا کہنا اے کہ اوہ نیب دے ساہمنے کسے قیمت اُتے سرنڈر نہیں کرن گے۔ اوہناں دے وڈکیاں نے وی کدی کسے دے اگے سر نہیں جھُکایا اے۔ بنوں وچ پی ڈی ایم دے جلسے نال خطاب کردیاں ہویاں اپوزیشن ایکے دے آگو نے کہیا کہ بلوچستان وچ ہزارا برادری دا قتلام بدامنی دا سبھ توں وڈا ثبوت اے۔ مولانا فضل الرحمان نے کہیا کہ پی ڈی ایم نے قوم نُوں ازادی تے جمہوریت دا راہ وکھایا اے‘ بنوں دے لوکاں نے اج حکومت دے خلاف بغاوت دا اعلان کر دِتا اے۔ فضل الرحمان نے کہیا کہ ساڈی جدوجہد ملک وچ جمہوریت‘ قانون دی عملداری لئی اے۔ اوہناں نے کہیا کہ حکومت نے ہر لحاظ نال ملک نُوں تباہ کر دِتا اے‘ ہزارا برادری دا قتلام کیتا گیا‘ بدامنی دا ایس توں ودھ کے ثبوت کیہ اے۔ مولانا فضل الرحمان نے کہیا کہ ایتھ دہشتگرد ازاد نیں‘ جدوں چاہن شہریاں نُوں قتل کر دین‘ اسلام آباد وچ 22 سالا نوجوان نُوں پولیس نے گولیاں مار کے شہید کر دِتا‘ اج ڈکیتیاں دی سبھ توں ودھ شرح اسلام آباد وچ اے۔ اوہناں نے کہیا کہ وزیراعظم کہندا اے کہ کم دے لوک نہیں‘ لوک کم دے نیں تُسیں کم کرنا نہیں جاندے‘ ایہ نا اہل آئے تے معیشت تباہ کر دِتی‘ اگلے سالاں وچ وی بہتری دے کوئی اشارے نہیں‘ اِک کروڑ نوکریاں کس بنیاد اُتے دوو گے؟۔ مولانا فضل الرحمان نے کہیا کہ اج غریب بندے دی قوت خرید جواب دے چکی اے‘ لوک خُد کشیاں اُتے مجبور نیں‘ ملک ڈُب رہیا اے تے ایہ ترقی دیاں گلاں کر رہیا اے‘ عمران خان نُوں ایسے لئی لیاندا گیا اے تاں جے پاکستان وچ ترقی نُوں روکیا جا سکے‘ اج لوکائی بیدار ہو چکی اے۔ آگو پی ڈی ایم نے کہیا کہ امن و امان‘ معیشت ایہناں دے ہتھوں تباہ‘ قبائلی علاقیاں وچ کوئی نظام نہیں اے‘ اج پاکستان اُتے کسے دا اعتماد نہیں‘ سار ے دوست ناراض ہو چکے نیں۔