موتی سرکار ۔۔۔۔٭رویل کہانی٭

۱

.... ڈومینک نے اپنے من پسند کُتے (ڈوریک) دے گُردے فیل ہوجاون پاروں اوس دی مرگ مگروںاپنے اک جانن والے نوں دَسیا :

”میں تے ڈوریک اِک دوجے نال ویاہے ہوئے ساں۔ اسیں دوہاں نے گھٹ ودھ تقریبن اَٹھ ورھے اکٹھے گزارے۔“

ایس بارے اوہدا مزید ایہ آکھنا سی کہ ڈوریک اودوں تِناں سالاں دا سی؛ جدوں اوہ اوہنوں اپنے گھر لیائی۔

تے فیر جدوں اوہ یارھاں ورھیاں دا ہویا تاں اوہنے اوس نال ویاہ کر لِتّا۔

اوہدے آکھن مطابق اوہ اپنے پالتو کُتے( ڈوریک) دی موت مگروں بہت ٹُٹ گئی سی۔ اوہنوں اوس نال پیار ہی اِینّا سی کہ اوہ اوس نوں لفظاں وِچ بیان نہیں کرسکدی.... اپنے تے ڈوریک دے سنبندھ دے ایس گُپت راز نوں دوجیاں نال سانجھا کردیاں ہویاں اوہ بہت بھاوک ہورہی سی۔ اوہ اپنے آپ نوں خُش قسمت تصور کررہی سی کہ اوس ڈوریک نال....

فیرکُجھ عرصے مگروںڈومینک لزبریل نوںٹریوس ملیا۔

اوہنوں لگیا کہ اوہدی اوس نال دوستی اچھی رہے گی، پر فیرجدوں اوہنوں ڈوریک دا خیال آیا۔

تے اوس نوں لگیا کہ ایہ تے اوس نال بے وفائی ہووئے گی۔

ٹریوس اوہنوں یونان دے ساحل کول ملیا سی؛ جدوں اوہ اوتھے چھٹیاں مناون گئی ہوئی سی۔

اوہنوں اوہ چنگا لگا اَتے اوہ اوہنوں اپنے نال گھر لے آئی۔

۲

ارجنٹائن دے قصبے وِلا کارلوس پاز دے رہائشی میگوئل گونامی شخص نے کیپٹن ناں دا اک جرمن شیفرڈپالتو کُتا رکھیا ہویا سی۔

میگوئل دی موت مگروں اوس دی گھر والی ویرونیکا اَتے اوس دے بچے اچانک کیپٹن دے لاپتا ہوون تے بہت پریشان سن۔اوہناں سبھناں نے اوس نوں بتھیریا لبھیا، پر اوہ اوہناں نوں ہورکدھرے نہیں؛اوڑک اپنے موئے مالک میگوئل دی قبر کول بیٹھا ہویاملیا۔ اوہ اوہنوں اپنے نال گھر لے آئے، پر مُڑ کُجھ دِناں مگروں اوہ فیر لاپتا ہوگیا۔

ایس وار فیر اوہ اوہناں نوں میگوئل دی قبر کول بیٹھاہویا ملیا۔

ایس توں پچھوں خبرے ویرونیکا اَتے اوس دے بال اوہنوں کِنّی وار اپنے گھر واپس لے کے آئے ،پر اوہ ہر وار لا پتا ہوون مگروں اپنے مالک (میگوئل)دی قبر کول اِی ملیا۔میگوئل نال محبت پاروں ویرونیکا ایس نتیجے تے اپڑی کہ کیپٹن نوں اوہدے حال اُتے چھڈ دِتا جاوے۔ فیر اوہناں دے آکھن تے اوس قبرستان دا عملا کیپٹن دا خیال رکھن لگ پیا۔ پورے پنج ورھے گزرن مگروں کیپٹن اپنے مالک دی محبت پاروں دُنیا بھروِچ ایدھر اودھر مشہور ہوگیا اَتے ویکھدیاں اِی ویکھدیاںاوس دا ایہ انھا عشق اخباراں اَتے ٹی وی چینلاں دی زینت بن گیا۔

میگوئل دی موت نوں دس ورھے ہوون والے نیں تے کیپٹن اجے وِی اکثر اوس دِی قبر دے آل دوالے گیڑیاں کڈھدا رہندااے۔

۳

کہانیکار ایس ویلے ایہناں خبراں نوں پڑھدا ہویااپنے دیش وِچلے کینٹ نیڑلے علاقے دے قبرستان کول بنی اِک بزرگ دی فرضی قبر بارے سوچ رہیا اے۔

اوہنوں اوتھوں دے لوکاں دے انھے یقین اَتے بے پناہ عقیدت مندی دی اُکا سمجھ نہیں آرہی جہناں ویلے دے نال نال سبھ توں پہلاں تے اوس قبردوالے آپ اِی اپنے ورگے کسے ہور دے آکھن تے اِک شاندار دربار تعمیر کروا یا سی ۔ تے فیر آئے دِن دور دراز دے علاقیاں چوں اک دوجے دی ویکھا ویکھی درجناں لوک اوتھے آن کے چڑھاوے چڑھان اَتے نذر نیازاں وَنڈن لگ پئے۔

تے ہُن کُجھ ویلا گزرن مگروں اوہناں تے اوس فرضی قبردا پول کُھلھ گیا سی؛ جس نوںاوہناں وچوں اِی اِک نے موتی سرکار دا ناں دِتا ہویا سی ۔

کہانیکار نوں اوہناں دی من گھڑت سوچ اُتے ہاسا آرہیا سی کہ ہُن اوہ پچھلے کُجھ دِناں توں کسے دے آکھن تے اوس فرضی قبر دی کھدائی کرن بارے سوچنا شروع ہوگئے سن۔

وہناں وِچوں کُجھ دانے بینے ایس حق وِچ سن کہ ایس علاقے دے ’ڈی پی او‘ نوں ایس ساری صورتحال دا نوٹس لینا چاہیدا اے ۔ ایس وِچ زیادا شور شرابا نزدیکی مسجد دے امام صاحب دا سی جہڑے ایس ’موتی سرکار‘ ناں دے دربار دِی مشہوری توں چوکھے بد دل سن۔ کیوں جو ایس دی بہتی نامنا کارن اوہناں دااپنا تعویز گنڈے دا کارویہار ٹھپ ہویا پیا سی۔ امام صاحب دا خیال سی کہ ایس دربار دی انتظامیا دے خلاف سخت توں سخت قانونی کارروائی کیتی جانی چاہیدی اے۔

کہانیکار ہس رہیا سی،شاید اوہنوں لوکائی دا اِنج موجو اُڈن اَتے اوہناں دِی جاہلیت دا پہلے توں چانن سی۔اوہدااِنج ہسنا بندا وِی سی: ’موتی سرکار‘ دِی اوس فرضی قبر دِی کھدائی مگروں اوتھوںاِک مُردا کُتے دی لاش جو برآمد ہوئی سی۔