خدارا آؤ‘ منفی درج حرارت وچ بیٹھے لوکاں دے سر اُتے ہتھ رکھو‘ ریاست ماں اے:مریم نواز  دا ہزارا  برادری نال گلبات۔۔۔٭رویل خبر٭

کوئٹہ (نیوز ڈیسک) پاکستان مسلم لیگ (ن) دی نائب صدر مریم نواز شریف نے وزیراعظم عمران خان نُوں مخاطب کردیاں ہویاں کہیا اے کہ میں سیاسی اختلافات نُوں پچھے سُٹ کے تہانوں کہندی آں کہ خدارا آؤ‘ منفی درج حرارت وچ بیٹھے لوکاں دے سر اُتے ہتھ رکھو‘ ریاست ماں اے تے لوکائی دی جان تے مال دا تحفظ ایہدی ذمے داری اے‘ ہزارا برادری نے وطن دی ترقی‘ خشحالی تے دفاع لئی قربانیاں دِتیاں‘ اج ریاست دی وڈی ذمے داری اے کہ اوہ ایہناں مظلوماں دے پھٹاں اُتے مرحم رکھے۔ ایہناں خیالاں دا اظہار اوہناں نے جمعرات نُوں کوئٹہ وچ مچ واقع دے لواحقین تے ہزارا برادری ولوں جاری دھرنے دے رلتیاں نال خطاب کردیاں ہویاں کیتا۔ ایس موقع اُتے پاکستان مسلم لیگ (ن) دے قائدین احسن اقبال‘ رانا ثناء اللہ‘ مریم اورنگزیب‘ انجینئر خرم دستگیر‘ سینیٹر پرویز رشید‘ جمال شاہ کاکڑ‘ رحیم کاکڑ تے ہور وی موجود سن۔ مریم نواز نے کہیا کہ ہزارا برادریتوں جہڑے اہناں دے پیارے کھوہے گئے نیں تے تہاڈے اُتے جہڑی قیامت ٹُٹی اے ایہناں اُتے میاں نواز شریف‘ شہباز شریف تے مسلم لیگ (ن) ولوں تعزیت دا اظہار کردی آں‘ مینوں سمجھ نہیں آ رہیا پچھلے 5 دناں توں ایہ غم ٹی وی اُتے ویکھ رہے نیں تے میں اپنی گل کتھوں شروع کراں‘ جہنوں پِیڑ ہووے اوہد ا انداز اوہدے توں بہتر کوئی نہیں لا سکدا‘ اسیں تکلیف تے غم وچ رلتی ہو سکدے آں پر ایہناں دُکھاں تے غم دا احساس نہیں کر سکدے‘ اوہناں نے کہیا کہ میرے توں ایہناں قتل ہون والے لوکاں دیاں اوہ تصویراں نہیں ویکھیاں گئیاں‘ بچے ٹی وی اُتے اِک بے حس نُوں پکار رہے سن کہ جدوں تک تُسیں نہیں آؤ گے اسیں میتاں نُوں نہیں دفناواں گے‘ اِک پڑھیار جہڑا کالج فیس جمع کرن لئی کان وچ کم کرن لئی گیا سی‘ ایتھے اوہدی میت وی ہے جہدے خاندا وچ دفناون لئی کوئی مرد نہیں اے‘ ہزارا برادری نُوں دو میٹر دی ریڈیس تک لئی محدود کر دِتا گیا اے‘ ایہناں نُوں روزگار‘ کالج سکولاں وچ ازادانا نقل دی ازادی نہیں‘ 2 ہزار شہداء لئی میرے الفاظ نہیں‘ ایتھے بیٹھا ہر بندا دُکھ تے درد دی داستان اے۔ سارے سیاسی اختلافات بھُلا کے ایہ کہنا چاہندی آں کہ عمران خان آؤ ریات دا کم تحفظ دینا اے‘ کہندے نیں ریاست ماں وانگوں اے مینوں احساس اے کہ ماں نے اپنا حق ادا نہیں کیتا‘ جے تُسیں اپنی ذمے داری وچ ناکام او تے تُسیں ہمت کرو چل کے آؤ تے ایہناں لواحقین دی دا درسی کرو‘ لواحقین لاشاں رکھ کے تہاڈے منتظر نیں‘ کہیا جاندا اے کہ ایہدے اُتے سیاست نہ کرو‘ اسیں لاشاں اُتے سیاست نہیں کردے جے تُسیں سیاست سیاست کَہ کے اپنی ناکامی لُکان دی کوشش کرو گے تے ایہ اسیں ہون نہیں دواں گے‘ تہانوں آنا پوے گا‘ لواحقین منفی درجا حرارت وچ لاشاں رکھ کے احتجاج اُتے بیٹھے نیں ایہناں دا کوئی وڈا مطالبا نہیں صرف تہانوں آن تے گل کرن دا کَہ رہے نیں تاں جے اوہ لاشاں دفناون‘ میں ہزارا برادری دا نمایندا بن کے سوال پُچھن لئی حق اُتے آں کہ تُسیں اپنے لوکاں دے غم وچ رلت کرو ایہناں دے سر اُتے ہتھ رکھ کے دُکھونڈو‘ اوہناں نے اپیل کیتی کہ اللہ دی مخلوق اُتے رحم کیتا جاوے‘ ارباب اختیار تے اقتدار دی کرسی اُتے بیٹھے بندے دی بے حسی اُتے افسوس اے‘ مینوں اِک ماں‘ دھی تے اِک بھین دی حیثیت نال ہزارا برادری دے دُکھاں دا احساس ا‘ اوہناں نے کہیا کہ ہزارا برادری قوم جہناں نے ایس ملک دی خدمت تے وطن دا دفاع کیتا اے سگوں ملک دی ترقی وچ اپنا کردار ادا کیتا اے۔جے حکمران ایتھے نہیں آندے تے اوہ سن لین ایہ قوم ایہنوں کرسی اُتے بَہن دی اجازت نہیں دیوے گی‘ پاکستان مسلم لیگ ن دیاں ساریاں ہمدردیاں ہزارا برادری تے لواحقین دے نال نیں۔