دیس  وچ گیس‘ بجلی‘ کھان پین دیاں شیواں مہنگیاں پر لوکائی دا خون سستا اے:بلاول بھٹو زرداری۔۔۔٭رویل خبر٭

کوئٹہ (نیوز ڈیسک) پاکستان پیپلز پارٹی د ے چیئرمین بلاول بھٹو زرداری نے مطالبا کیتا اے کہ نیشنل ایکشن پلان اُتے اوہدی اصل روح دے مطابق عملدرآمد کیتا جاوے‘ ملک وچ گیس‘ بجلی‘ کھان پین دیاں شیواں مہنگیاں پر لوکائی دا خون سستا اے‘ ریاست اپنی آئینی تے قانونی ذمے داری پوری کردیاں ہویاں لوکائی نُوں جان تے مال دے تحفظ دی فراہمی یقینی بنائے‘ بدقسمتی نال اسیں ایہو جہے ملک وچ رہندے آں جتھے شہداء تے لاشاں نُوں وی احتجاج کرنا پیندا اے‘ پیپلز پارٹی ہزارا برادری دے غم وچ برابر دی رلتی تے مکمل اکسُرتا دا اظہار کردیاں ہویاں لواحقین دی ہر مشکل گھڑی وچ نال کھلوتی ہووے گی۔ ایہناں خیالاں دا اظہار اوہناں نے جمعرات نُوں مچ وچ ہزارا برادری دے جاری دھرنے دے رلتیاں نال خطاب کردیاں ہویاں کیتا۔ ایس موقع اُتے پاکستان پیپلز پارٹی دے آگو سید یوسف رضا گیلانی‘ وزیر اعلا سندھ مراد علی شاہ‘ حاجی میر علی مدد جتک‘ سید اقبال شاہ تے ہور وی موجود سن۔ پاکستان پیپلز پارٹی دے چیئرمین بلاول بھٹو زرداری نے کہیا کہ پاکستان اِک ایہو جہی دھرتی اے جتھے شہیداں تے لاشاں نُوں وی انصاف لئی احتجاج کرنا پیندا اے‘ سبھ کجھ گیس‘ بجلی‘ کھان پین دیاں شیواں مہنگیاں پر لوکائی دا خون سستا اے‘ سیاسی کارکن‘ ہزارا برادری سنے ہر کسے نُوں محسوس ہو رہیا اے کہ اوہناں دا خون سستا ہو گیا اے‘ 1999 توں لے کے اج تک 2 ہزار ہزارا شہید ہو چکے نیں پر اج تک کسے اِک شہید نُوں انصاف نہیں ملیا اے ساڈے وڈکیاں دی حکومت وچ وی احتجاج ہویا سی پاکستان پیپلز پارٹی ہزارا برادری دے ایس غم وچ برابر دی شریک اے‘ میں وی شہیداں دے خاندا ن نال تعلق رکھدا آں تے اج تک اپنے شہیداں لئی انصاف نہیں پا سکے‘ تہاڈے نال وعدا اے کہ دن رات جاری جدوجہد راہیں تہاڈے شہیداں نُوں انصاف دلواواں گے‘ اوہناں نے کہیا کہ بدقسمتی نال سانوں لاشاں دے نال بَہ کے احتجاج کرنا پیندا اے پر کسے شہید نُوں انصاف نہیں دلوا سکے‘ سبھ توں ودھ ایس ملک وچ محب وطن لوک اج ایتھے بیٹھے نیں جے ایہناں محب وطن تے مظلوماں نُوں انصاف نہیں دلوا سکے تے دنیا نُوں کیہ جواب دواں گے کہ اسیں اپنے مزدوراں نُوں تحفظ نہیں دلوا سکے تے نہ ای لوکائی نُوں جین دا حق دلوا سکے‘ اج لوکاں دے آئی ڈی چیک کر کے قتل کیتا جاندا اے ایہ کتھوں دا انصاف اے‘ لوکائی نُوں زندگی دا تحفظ جدوں میسر نہ ہووے ریاست ریاست نہیں کہواندی‘ جدوں تحفظ ہووے تے اسیں معیشت تے ترقی دی گل کر سکاں گے‘ مسئلے بہت نیں پر اج صرف امن‘ جین دے حق دا مطالبا کر رہے آں‘ فرزندکربلا جاندے نیں کہ شہادتاں کویں دِتیاں جاندیاں نیں تے کدی کسے ظالم دے ساہمنے اپنا سر نہیں نیواں نہیں کراں گے پر اج اپنے شہداء لئی انصاف منگن لئی احتجاج اُتے بیٹھے آں پورا پاکستان مظلوم لوکاں دے نال اے‘ پیپلز پارٹی ریاست توں مطالبا کردی اے کہ نیشنل ایکشن پلان اُتے عملدرآمد کرن‘ ملک نُوں دہشتگردی توں پاک کرن‘ آرمی پبلک سکولز دے بچیاں نال عدا کیتا گیا سی پر اج وی دہشتگرد صرف حملے کردے نیں‘ نیشنل ایکشن پلان اُتے عمل نہ ہون دے برابر اے‘ سازشی ملکاں دی کنڈ تھاپڑی ہو سکدی اے پر ایہناں دیاں سازشاں دی کامیابی نال ساڈی ریاستی ناکامی ہووے گی جے شہداء دے خانداناں نُوں انصاف نہیں ملے گا تے ایہناں نُوں یقین نہیں ہووے گا کہ اوہ محفوظ نیں سگوں ایہدے نال لوکائی وچ خوف کھلرے گا سگوں ملک تے وفاق نُوں خطرا ہووے گا‘ پیپلز پارٹی مزدوراں لئی انصاف دی فراہمید ا مطالبا کردیاں ہویا مکمل اکسُرتا دا اظہار کردی اے تے سارے جائز مطالبیاں دی حمایت کردیاں ہویاں وعدا کردے آں کہ ہزارا برادری دے نال جاری نا انصافی‘ ظلم دے خلاف پیپلز پارٹی دُکھ تے مشکل ویلے وچ نال اے۔