بائیو میٹر ووٹنگ نظام پاکستان وچ لیانا اینا سوکھا نہیں،اگلے الیکشن وی بائیو میٹرک نہیں ہونے:الیکشن کمیشن۔۔۔٭رویل خبر٭

اسلام آباد (نیوز ڈیسک) الیکشن کمیشن نے اگلیاں عام چوناں بائیو میٹرک سسٹم دے تحت کروان دی مخالفت کر دِتی تے کہیا اے کہ حالے ایہ سسٹم پاکستان وچ نہیں چل سکدا کیوں جے صرف بائیو میٹرک لئی درکار مشیناں دی خریداری اُتے ای 30 ارب رُپئے خرچ ہون گے تے ایہ مشیناں 5 سال بعد ناکارا ہو جان گیاں۔ قومی اسمبلی دی قائما کمیٹی برائے پارلیمانی امور نے ایس حوالے توں بل وی مؤخر کر دِتا جد کہ سوانیاں نُوں ہر ڈویژن توں قومی تے صوبائی اسمبلیاں دی نمایندگی دین بارے پرائیویٹ ممبر بلز وی ملتوی کر دِتا گیا۔ قومی اسمبلی دی قائما کمیٹی برائے پارلیمانی امور دا اجلاس مجاہد علی دی صدارت ہیٹھ ہویا۔ اجلاس وچ مچ دُکھانت وچ شہید ہون والے بندیاں لئی فاتحہ خوانی‘ دہشتگردیدے واقعات تے وطن دے دفاع لئی جاناں قربان کرن والیاں لئی وی دُعائے مغفرت کیتی گئی‘ اراکین کمیٹی دا ویلے سر ایجنڈے بارے ورکنگ پیپر نہ ملن اُتے احتجاج‘ وزیر پارلیمانی امور اراکین دے احتجاج اُتے اپنے سٹاف اُتے برس پئے۔ علی محمد خان نے کہیا کہ ویلے سر ایجنڈا کیوں نہ دِتا گیا ایہ سبھ برداشت نہیں۔ اگے توں انج ہویا تے فیر وزارت دے سارے افسراں نُوں تبدیل کروا دواں گا۔ ایس موقع اُتے اراکین نے مطالبا کیتا کہ الیکشن قوامین وچ ترامیم اہم معاملا اے ایہدے وچ چھیتی نہ کیتی جاوے ایہ معاملا سپریم کورٹ وچ وی التوا ہیٹھ اے‘ فیصلے دے وی انتظار کیتا جاوے اسیں الیکشن قوانین اُتے اپنیاں جماعتاں توں وی رہنمائی لواں گے۔ علی محمد خان نے کہیا کہ اراکین دی رائے دا احترام اے ترامیم اُتے غور لئی ویلے دے دِتا جاوے‘ الیکشن قوانین وچ ترامیم دے بل دا محرک میں آں‘ بل دے تحت ہر جماعت ہر ڈویژن توں سوانیاں دے ناں دیوے گی‘ پنج فیصد ٹکٹ سوانیاں نُوں دِتے جان گے‘ ہر ڈویژن توں سوانیاں نُوں نمایندگی ملن نال 60 سیٹاں اُتے سوانیاں نال انصاف ہو سکے گا‘ جہناں سوانیاں نُوں ڈویژن توں لیا جاوے گا اوہ اوتھوں دیاں ووٹر ہونیاں چاہیدیاں اے۔ ایس موقع اُتے الیکشن کمیشن حکام نے کہیا کہ سانوں ایس ترمیم اُتے اعتراض نہیں اے‘ ساڈا کم الیکشن کروانا اے جہدے اُتے علی محمد خان نے کہیا کہ ایہ بل اِک سیاسی معاملا اے‘ ایہدے اُتے ساریاں جماعتاں نال مشاورت کرنی پوے گی‘ سوانیاں دی پورے پاکستان توں نمایندگی وی سیاسی معاملا اے‘ ارکاین دے مطالبے اُتے بل اُتے غور مؤخر کر دِتا گیا۔ رکن کمیٹی اسلم خان دا کہنا سی کہ بائیو میٹرک سسٹم حالے پاکستان وچ نہیں چل سکدا ایس نظام نُوں لیان اُتے ارباں رُپئے خرچ ہون گے‘ ٹیکنالوجی کسے وی ویلے خراب ہو سکدی اے‘ پاکستان وچ تے نیٹ سسٹم ڈاؤن ہو جاندا اے‘ ووٹنگ دا جہڑا موجودا مینوئل نظام اے ایہنوں ای برقرار رکھیا جاوے‘ بائیو میٹرک سسٹم لئی صرف مشیناں لان اُتے ای 30 ارب رُپئے خرچ ہون گے تے 5 سال بعد ایہ مشیناں ناکارا ہو جان گیاں‘ نادرا دیاں مشیناں دی کوالٹی وی معیاری نہیں‘ بائیو میٹر ووٹنگ نظام پاکستان وچ لیانا اینا سوکھا نہیں اے‘ بنکاں دیاں بائیو میٹرک مشیناں نُوں ووٹنگ لئی استعمال کرنا سوکھا نہیں ہووے گا‘ ایس معاملے اُتے کمیٹی نُوں اگلے اجلاس وچ تفصیلی بریفنگ دواں گے‘ کمیٹی نے بائیو میٹرک ووٹنگ نظام لیان بارے نجی بل مؤخر کرد ِتا۔