ہزارا برادری دے تحفظ لئی  سیکیورٹی نظام بنایا جاوے، وزارت داخلا مستقبل وچ ایہو جہے واقعات دے مُکاون لئی مستقل حل کڈھے:عمران خان ۔۔۔٭رویل خبر٭

اسلام آباد (نیوز ڈیسک) وزیراعظم عمران خان دی صدارت ہیٹھ سینئر وفاقی وزیراں دے اجلاس وچ ملکی سیاسی تے سیکیورٹی صورتحال اُتے وچار وٹاندرا کیتا گیا جد کہ وزیراعظم دے دورا کوئٹہ بارے کوئی فیصلا نہیں ہو سکیا۔ وسیلیاں دے مطابق اجلاس وچ وزیر داخلا شیخ رشید نے مچ دُکھانت دے حوالے توں بریفنگ دِتی پر اجلاس وچ وزیراعظم دے دورا کوئٹہ دے حوالے توں کوئی فیصلا نہیں کیتا جا سکیا۔ وسیلیاں دے مطابق اجلاس وچ حکومتی قاعدیاں دے مطابق متاثرین دی مالی امداد کرن دا فیصلا کیتا گیا تے وزیراعظم نے ہدایت جاری کیتی کہ وزارت داخلا مستقبل وچ ایہو جہے واقعات دے مُکاون لئی مستقل حل کڈھے۔ وزیراعظم نے کہیا کہ ہزارا برادری دے تحفظ لئی خصوصی سیکیورٹی نظام بنایا جاوے۔ بلوچستان وچ امن ملکی ترقی دی ضمانت اے۔ وسیلیاں دے مطابق کابینا اجلاس وچ سینیٹ چوناں اُتے مشاورت کیتی گئی تے مثبت معاشی آنکڑیاں اُتے وی اعتماد دا اظہار کیتا گیا۔ دوجے پاسے وفاقی وزیر اطلاعات شبلی فراز نے صحافیاں نال گلبات وچ کہیا اے کہ وزیراعظم چالو ہفتے ای کوئٹہ جان گے‘ دھرنے دے خاتمے لئی مذاکرات جاری نیں۔ اوہناں دا کہنا سی کہ مچ واقع اُتے سیاست نہیں کرنی چاہیدی‘ مچ وچ جو کجھ وی ہویا اوہ بہت غلط ہویا‘ ملزماں نُوں کیفر کردار تک پہنچانا چاہیدا اے۔ ماضی وچ وی ایہو جہے دل خراش واقعات ہوندے رہے نیں۔ کئی لوکاں ولوں ایہو جہے واقعات اُتے پیچیدگیاں پیدا کیتیاں جاندیاں نیں‘ متاثرین ولوں کوئی غیر مناسب گل نہیں کیتی گئی‘ حکومت چاہندی اے کہ واصل ہون والے بندیاں نُوں دفنایا جاوے تے اوہناں دی ویلے سر مالی مدد کیتی جاوے۔