پیپر جھنگ جاندے۔۔۔۔۔۔۔۔٭رویل کالم٭

پیپر جھنگ جاندے۔۔۔۔۔۔۔۔٭رویل کالم٭

کاسنی

پی پی ایس سی دے پیپراں دی ویچ وٹک دے سلسلے وچ جھنگ شہر دے کجھ لوک ساہمنے آئے نیں جہناں اُتے تفتیش توں بعد جُرم ثابت ہو چکے نیں ایس خبر دے آون نال اوہ لوک جہڑے حقدار سن تے اپنے آپ نوں کسے طرحاں وی جہڑے چُنے گئے سن اوہناں توں ہینا سمجھ رہے سن اوہناں واسطے ایہ خبر کئی نویں انکشافات لے کے آئی۔ایس دِل دہلا دین والی خبر نے اوس چُنے ہوئے مافیے نوں وی ساہمنے لیاندا اے جو ”غلط“ طریقے نال ساہمنے آئے سن تے کئی ورھیاں تو ں اوہ وڈے عہدیاں تے قبضا کیتی بیٹھے نیں۔

ایہ پیپر گھٹو گھٹ چھے لکھ توں سٹھ لکھ تیکر ویچے خریدے جا رہے سن تے ایہناں دے پچھے اِک وڈا ٹولا وی ساہمنے آیا اے جہناں وچ مرکزی کردار اِک غضنفر ناں دا اینٹی کرپشن دا آفیسر ایس گھناؤنے دھندے دا وڈا مجرم اے ایہ مجرم پہلے نمبر تے لیاندا گیا جو لکھاں دی کھیڈ سی تے جہدے وچ پی پی ایس سی دے کلرکاں دا وی ہتھ سی، غضنفر ناں دا اینٹی کرپشن دا ٹاپرآفیسر، اِک ملحہ خان حیدری ناں دے پروفیسر دے دو مُنڈے اورنگزیب تے جہاں زیب وی ایس وچ شامل نیں ایہ اوہی پروفیسر اے جو کالجاں دے انتظامی عہدیاں تے وی ایسے خاطر ای رہیا اے تاں جو ”اختیارات“ دا غلط ورتارا کیتا جاوے تے ایس سلسلے وچ اوہ کامیاب وی رہیا اے۔ اوس پروفیسر دے ایس جُرم وچ شامل ہوون بارے وی انکوائری ہو رہی اے جو پچھلے دساں بارھاں ورھیاں توں پیپراں دی ویچ وٹک دے نال نال انٹرویو لین وچ وی ایہ مافیا اگے اگے سی اجہیاں لیکچراراں نوں اگے لیاندا جاندا جو آون والی پِیڑھی واسطے اُکا ای چنگے نہیں سن تے ایہناں نے نویں پِیڑھی نوں کیہ سِدھے راہ تے لانا سی۔۔۔جے گوہ کیتا جائے تے اجہے لیکچراراں دی پوزیشن ویلے وی ڈنڈی ماری جاندی رہی تے حق دار نوں اوہدے حق توں وانجھا رکھیا جاندا ہور تے ہور ایہ گلاں وی کیتیاں جا رہیاں نیں کہ کجھ یونیورسٹیاں دے پروفیسروی ایس مافیے وچ سانجھی وال سن تے اوہ اپنے ”خاصاں“ نوں لیکچرار لوان لئی ہر گھناؤنی حرکت وی کر جاندے سن اجہی سوچ تے اجہیا مافیا ٹولا ایس قوم دا سبھ توں وڈا دُشمن اے۔پیپر جھنگ جاندے تے فیر اوتھوں دے ای لوکاں نوں اگے لیایا جاندا رہیا ایہدے وچ ہر قسم دادباء ورتیا جاندا تے اپنے علاقیاں نوں ”محروم“ آکھ اکھوا کے مظلوم جہیا بنا کے پیش کیتا جاندا رہیا تے اندروں اندری حقداراں نوں اوہناں دے حقاں توں وانجھا رکھن والیاں نوں جدوں سوشل میڈیا تے ویکھا گیا تے اوہناں تے حدوں ودھ لعنتاں وی پائیاں گئیاں مجرماں دا پورا جتھا بے نقاب ہوندا جا رہیا اے پچھلے دیہاڑ اِک سونیا ناں دی سوانی وی ایس مجرماں دے جتھے وچ ساہمنے آئی اے۔۔۔۔پہلاں ٹانگے جھنگ جاندے سی تے ہُن پیپر۔۔۔۔۔۔۔ایہناں تیک اپڑن لئی وٹس ایپ ڈیٹا تے فون دے سارے ریکارڈ توں لابھ چُکیا گیا سی۔

ایس سمے تے ایہ گل سرکار ولوں ہونی چاہیدی اے کہ اوہ ایہناں مجرماں نوں کرڑی توں کرڑی سزا دیوے تے ایہناں نوں آون والیاں لئی عبرت دا نشان بنا دیوے صرف ملازمت توں برطرف کر دیون نال کجھ نہیں ہون لگا ایس توں ودھ وی ایس مافیے تے ٹولے نوں بے نقاب ہونا چاہیدا اے تاں جو پیپر کد ے وی جھنگ نہ جاون۔۔۔۔۔۔ محفوظ رہون تے سبھ نال انصاف ہونا چاہیدا اے تے ایہ اودوں ای ممکن اے جدوں سارے کم میرٹ تے ہوون تے ایہناں سماج دُشمناں نوں سزا ملے۔۔۔

٭٭٭٭٭