ساڈا دشمن بھارت بلوچستان تے وزیرستان وچ انتشار کھلارن دے پورے جتن کردا اے، انقلابی منصوبیاں دا مُڈھ  رکھ دتا :  عمران خان۔۔۔٭رویل خبر٭

وانا‘ جنوبی وزیرستان (نیوز ڈیسک) وزیراعظم عمران خان دا وزیرستان وچ 3G‘ 4G شروع کرن دا اعلان۔ وزیراعظم عمران خان نے کہیا اے کہ بھارتی حکومت پاکستان وچ انتشار کھلارن دی کوشش وچ لگی ہوئی اے‘ جنوبی وزیرستان وچ 3 جی‘ 4 جی معاملے اُتے فوجی قیادت نال گل کیتی تے فیصلا کیتا ایہ سہولت نوجواناں دی اہم ضرورت اے۔ دھڑکو سی کہ 3 جی 4 جی دہشتگردی لئی استعمال نہ ہووے۔ ساڈی حکومت دی کوشش اے کہ اسیں ہیٹھلے طبقے نُوں اُتے لے کے جائیے تے ویلا ثابت کرے گا کہ قبائلی علاقئایں نُوں خیبر پختونخوا وچ ضم کرنا بہترین فیصلا سی۔ جنوبی وزیرستان وچ سکول‘ ٹیکنیکل کالج تے یونیورسٹی کھولاں گے‘ دوجا وڈا چیلنج نوجواناں نُوں روزگار دی فراہمی اے‘ کامیاب نوجوان پروگرام حالے شروعات اے۔ جنوبی وزیرستان دے علاقے وانا وچ جوان پروگرام دی تقریب نال خطاب کردیاں ہویاں وزیراعظم نے کہیا کہ میں 30 سال پہلاں پہلی وار وانا آیا سی تے ایہدے بعد انتخابی مہم تے وزیراعظم بن کے ایتھے آیا‘ پر میں وزیرستان دے لوکاں نُوں پیغام دینا چاہندا آں کہ ساڈی حکومت دا فلسفا ایہ اے کہ پچھے رہ جان والے لوکاں تے علاقیاں نُوں اُتے لیائیے‘ میں ووٹ لین یاں الیکشن وچ کیتے جان والے وعدے کرن نہیں آیا سگوں ساڈی حکومت دی پوری کوشش اے کہ پاکستان دے غریب طبقے نُوں اُتے لیاندا جاوے‘ جتھے ایہناں نُوں تعلیم دیف راہمی دِتی جاوے تے سکول‘ کالجز‘ جامعات تے تکنیکی تعلیمی ادارے کھولے جان۔ عمران خان نے کہیا کہ ساڈی سبھ توں وڈی طاقت نوجوان نیں جے اسیں ایہناں نُوں تعلیم‘ تکنیکی تعلیم دے دِتی تے اوہ نہ صرف اپنے خاندان سگوں ملک نُوں اُتے لے جان گے۔ ایتھوں د ے ہر خاندان نُوں ہیلتھ کارڈ دِتا جاوے گا‘ ہیلتھ کارڈ راہیں 7 لکھ رُپئے تک دا علاج کروایا جا سکدا اے۔ اوہناں نے کہیا کہ دوجا سبھ توں وڈا چیلنج روزگار اے‘ پچھلے 15 سال وچ سبھ توں ودھ تباہی وزیرستان وچ ہوئی‘ ایس لئی ایتھوں دے نوجواناں نُوں روزگار دین دی بہت ضرورت اے‘ اج کامیاب جوان پروگرام دے تحت جہڑے چیک دِتے نیں اوہ شروعات نیں‘ ساڈی پوری کوشش ہووے گی کہ ایتھے تے بلوچستان دے علاقیاں وچ زور لائیے کیوں جے اوتھوں دے لوک وی پِچھے رہ گئے نیں ساڈی پوری کوشش ہووے گی کہ وزیرستان دے لوکاں خاص طور اُتے نوجواناں نُوں روزگاری دی فراہمی یقینی بنائی جاوے‘ لوکاں نُوں اندازا نہیں کہ ایتھوں دے لوکاں نے انگریز دے خلاف سبھ توں ودھ جنگ لڑی سی‘ ایتھے سبھ توں ودھ لوک وی شہید ہوئے تے انگریز وی سبھ توں ودھ ایتھے مرے‘ ہور ایہ 1947 و چ جہڑا مسلماناں اُتے ظلم ہویا پنجاب تے کشمیر وچ تے ایتھوں دے لوک کشمیر وچ لڑن لئی گئے سن‘ ایہ ایس علاقے دی اِک تواریخ اے۔ وزیراعظم دا کہنا سی کہ مینوں پورا اندازا اے کہ تُسیں ہمیشا پاکستان لئی کھلوتے او‘ 1965 دی جنگ وچ ایتھوں بہت لوک گئے تے ملک لئی تہاڈا جذبا جاندا آں‘ قبائلی ضلعیاں دا خیبر پختونخوا نال ضم ہونا بہت مشکل کم سی‘ کئی لوکاں نے کوشش کیتی کہ ایہ ضم نہ ہون پر قبائلی علاقے تے وزیرستان دے لوکاں نے جس طرحاں ایس انضمام نُوں کامیاب کیتا میں اوہناں نُوں خراج تحسین پیش کرنا چاہندا آں۔ اوہناں نے کہیا کہ پاکستان نُوں ایس ویلے گھیو تے آئل باہروں منگوانا پیندا اے‘ دنیا وچ وزیرستان زیتون دی کاشت لئی بہترین علاقا اے‘ ایس علاقے وچ زیتون دا انقلاب لیاواں گے‘ قبائلی علاقیاں وچ وڈیریاں دا کردار اہم ہوندا اے‘ ایس لئی اے ڈی آڑ وچ وی وڈیرے ای بَہن گے تے اوہی فیصلا کریا کرن گے۔ اوہناں نے کہیا کہ ساڈا دشمن بھارت بلوچستان تے وزیرستان وچ انتشار کھلارن دی پوری کوشش کر رہیا اے‘ ایہدے لئی موبائل فون اُتے انٹرنیٹ سروس نُوں استعمال کیتا جا رہیا اے۔ میں فوج نال گل کیتی تے اسیں فیصلا کیتا کہ ایہ سہولت فراہم کیتی جاوے کیوں جے ایہ سروس نوجواناں دی اہم ضرورت اے تے چھیتی وزیرستان چ 3 جی تے 4 جی سروس کھول دِتی جاوے گی۔ایس توں بعد جنوبی وزیرستان وچ صحافیاں نال گل کردیاں ہویاں وزیراعظم نے کہیا کہ فارن فنڈنگ کیس چُکن اُتے اپوزیشن دا شکر گزار آں‘ ایہ سبھ ساہمنے آنا چاہیدا اے کہ تحریک انصاف تے اپوزیشن جماعتاں دی فنڈنگ کتھوں ہوندی رہی‘ ساری دنیا وچ سیاسی جماعتاں فنڈنگ کردیاں نیں‘ فارن فنڈگن کیس دی کھلی سنوائی ہونی چاہیدی اے تے چیلنج کردا آں فارن فنڈنگ کیس ٹی وی اُتے براہ راست وکھایا جاوے‘ پارٹی آگوواں نُوں وی بٹھا کے کیس سننا چاہیدا اے‘ ایس کیس نال ساری قوم نُوں پتا لگے گا کہ کہنے ایس ملک وچ ٹھیک طریقے نال پیسا اکٹھا کیتا۔ اوہناں نے کہیا کہ بیرون ملک پاکستانیاں دے گھلے گئے ترسیلات زر نال ملک چلدا اے‘ میں شوکت خانم ہسپتال دی فنڈنگ سمندر پار پاکستانیاں توں کیتی‘ چیلنج کردا آں سیاسی فنڈ ریزنگ صرف تحریک انصاف نے کیتی‘ اپوزیشن دیاں جماعتاں نُوں پتا اے تے مینوں وی پتا اے کہ فارن فنڈنگ کہڑی اے‘ اوور سیز پاکستانی فارن فنڈنگ نہیں نیں‘ کئی ملک ایہناں جماعتاں نُوں پیسے دیندے رہے‘ ایہناں ملکاں نال تعلقات دی وجھا توں میں دَس نہیں سکدا۔ مولانا فضل الرحمان اُتے تنقید کردیاں ہویاں وزیراعظم نے کہیا کہ مولانا فضل الرحمان مدرسیاں دے بچیاں نُوں استعمال کر کے حکومتاں نُوں بلیک میل کردے نیں‘ ایہناں د ی ارباں رُپئے دی جائیداد کِتھوں آئی‘ اوہ این آر او دے لئی بلیک میل کر رہے نیں‘ لوکائی سمجھدار اے اوہ کسے دی چوری بچان لئی نہیں نکلے گی‘ ایہ ساڈی لوکائی دی سیاسی سوچ نُوں نہیں سمجھدے۔ ملک دے معاشی حالات اُتے وزیراعظم نے کہیا کہ معاشی اوکڑاں دے کارن سانوں اخراجات گھٹ تے آمدنی ودھانی سی‘ اخراجات گھٹ کرن نال لوکائی نُوں اوکڑاں دا ساہمنا کرنا پیا‘ اسیں اصلاحات کرنیاں سن جہدے وچ دیر ہوئی کیوں جے پارلیمانی جمہوریت وچ بھاری اکثریت دے بغیر اصلاحات نہیں ہو سکدے‘ 18 ویں ترمیم دے بعد اسیں صوبیاں نُوں نال رلائے بغیر کجھ نہیں کر سکدے‘ معاشی بد حالی تے کرونا دے باوجود ساڈے معاشی اشاریے ہور ملکاں نالوں چنگ نیں‘ کرونا دے باوجود ساڈی ایکسپورٹ وچ وادھا ہویا‘ فیصل آباد تے سیالکوٹ وچ ورکرز نہیں مل رہے۔