براڈ شیٹ تحقیقات لئی انکوایری کمیشن دین دی منظوری،کابینا ولوں ڈونرز نُوں کرونا ویکسین دان  کرن دی وی اجازت دے دِتی۔۔۔٭رویل خبر٭

اسلام آباد (نیوز ڈیسک) وفاقی کابینا نے براڈ شیٹ تحقیقات لئی انکوایری کمیشن تشکیل دین دی منظوری دے دِتی۔ انکوایر ی کمیشن دی اگوائی جسٹس عظمت سعید شیخ ای کرن گے‘ اِک رکنی انکوایری کمیشن براڈ شیٹ دے معاملے ے دی جامع تحقیقات کرے گا۔ وزیراعظم عمران خان نے اجلاس نال خطاب کردیاں ہویاں کہیا کہ براڈ شیٹ دے معاملے اُتے کسے نُوں نہیں چھڈاں گا‘ کرپشن اُتے کسے قسم دا سمجھوتا نہیں ہووے گا‘ کرپشن کرن والیاں نُوں بے نقاب کیتا جاوے گا‘ براڈ شیٹ دا معاملا بہت سنجیدا اے۔ منگل والے دن وزیراعظم دی دصارت ہیٹھ وفاقی کابینا دا اجلاس ہویا‘ اجلاس وچ ملکی سیاسی‘ معاشی تے اقتصادی صورتحال سنے براڈ شیٹ کیس وچ ٹورا کاری دا وی جایزا لیا گیا۔ دَسیا گیا اے کہ انکوایری کمیشن ایہناں اہم لوکاں دے اوہ کیس وی کھولے گا جہڑے کسے وی مصلحت دے تحت بند کیتے گئے‘ ایس سلسلے وچ راؤ سکندر اقبال‘ آفتاب احمد شیر پاؤ ورگے وڈے ناواں دے کیس اِک واری فیر کھولے جان گے۔ براڈ شیٹ معاملے اُتے انکوایری کمیشن ایکٹ 2017 دے تحت تشکیل دِتا جاوے گا۔ کمیشن نہ صرف براڈ شیٹ دے معاملے دی جامع تحقیقات کرے گا سگوں حدیبیہ پیپر ملز تے سرے محل دی وی انکوایری کرے گا۔ کابینا اجلاس وچ ملک دی سیاسی تے معاشی صورتحال اُتے غور کیتا گیا تے ایف نائن پارک اسلام آبا دے بدلے سکوک بانڈز اجرا لئی وزارت خزانا دی سمری اُتے وی بحث ہوئی‘ پر کابینا نے ایف 9 پارک دی زمین دے بدل سکوک بانڈز اجرا دی سمری رَد کر دِتی۔ وفاقی کابینا نے قرض لین لئی بطور ضمانت ایف نائن پارک دی بجائے اسلام آباد کلب نُوں گروی رکھن دی منظوری دے دِتی۔ وسیلیاں مطابق وفاقی کابینا وچ اِک رکن نے طنزن تجویز دِتی کہ ایوان صدر وچ کیہ ہوندا اے؟ ایہنوں گروی رکھ دوو‘ جہدے اُتے سارے اراکین قہقہے لاندے رہے۔ کابینا نے اقتصادی رابطا کمیٹی دے فیصلیاں دی توثیق کر دِتی۔ کابینا نُوں بریفنگ وچ دَسیا گیا کہ کرونا دے باوجود ملکی ایکسپورٹس وچ وادھا ہویا‘ کرونا ویکسین دی خریداری وچ پرائیویٹ سیکٹر نُوں شامل کرن دی منظور دے دِتی اے‘ کابینا نے ویکسین خریدن دے طریقا کار دی وی منظوری دے دِتی‘ اجلاس وچ اتفاق کیتا گیا کہ ویکسین دی قیمت خطے وچ ہور ملکاں توں بُہتی نہیں ہونی چاہیدی اے‘ کابینا ولوں ڈونرز نُوں کرونا ویکسین ڈونیٹ کرن دی وی اجازت دے دِتی گئی۔کابینا اجلاس بعد پریس بریفنگ دوران وفاقی وزیر اطلاعات و نشریات سینیٹر سبلی فراز نے کہیا کہ وزیراعظم سینیٹ چوناں اوپن بیلٹ راہیں کروانا چاہندے نیں‘ آئین وچ ترمیم لئی پارلیمنٹ وچ قانون سازی کروا سکدے نیں‘ براڈ شیٹ دی شفاف تحقیقات کراواں گے‘ سینیٹ دے شفاف انتخابات کروا کے ملک دا وقار بحال کراں گے‘ حکومت نے سود دی مد وچ 6 ٹریلین رقم ادا کیتی اے‘ حکومت نے براڈ شیٹ معاملے اُتے بنن والے کمیشن دا آگو جسٹس (ر) عظمت سعید نُوں بنایا اے‘ شفاف تحقیقات ہووے گی‘ کابینا نے براڈ شیٹ دے معاملے اُتے اوپن کمیشن بنان دی منظوری دِتی اے‘ جسٹس (ر) عظمت سعید نُوں کمیشن دا آگو بنن اُتے انکار نہیں اے‘ سینی الیکشن وچ ممبران دی ویچ وٹک نہیں ہون دواں گے‘ براڈ شیٹ اُتے 45 دن دے اندر ساری کرپشن دی تحقیقات ساہمنے آ جاوے گی‘ این آر او دا کلچر ملک نُوں پسماندگی ول لے گیا‘ اعلا طبقیاں نُوں این آر او دے ناں اُتے راہ فراہم کیتا گیا‘ کرپٹ تے بددیانت بندیاں نُوں سزاواں نہیں دِتیاں گئیاں‘ مفاہمت دے ناں اُتے کرپٹ لوکاں نُوں معاف کیتا گیا۔