بھارت وچ کسان احتجاج شدید،فایرنگ نال 1 کسان ہلاک تے کئی زخمی ……٭رویل خبر٭

نویں دِلی (نیوز ڈیسک) بھارت وچ کسان احتجاج شدید ہو گیا‘ سکھاں نے لال قلعے اُتے خالصتان دا جھنڈا لہرا دِتا۔ غیر ملکی خبر رساں ادارے دے مطابق بھارت دے لکھاں کسان جہناں وچ سکھاں دی گنتی سبھ توں ودھ اے‘ بھارت دے ناں نہاد جمہورا دیہاڑ نُوں کالا دیہاڑ بنا کے مودی سرکار دی ارتھی ساڑ دِتی۔ بھارتی فوج تے پولیس دا نہتے کساناں اُتے تشدد اوہناں دے جذبے نُوں نہ روک سکیا‘ لکھاں بھارتی کسان گھوڑیاں‘ کریناں تے ٹریکٹرز اُتے سوار ہو کے ساریاں رکاوٹاں توڑدے ہوئے دِلی وچ داخل ہو گئے تے پولیس دیاں گولیاں تے سوٹیاں دا ساہمنا کردیاں ہویاں سِدھا لال قلعے اُتے دھاوا بول دِتا تے لال قلعے اُتے خالصتان دا جھنڈا لہرا دِتا۔ بھارت دے جمہوریا دیہاڑتے اُتے بھارتی فوج دی پریڈ دے جواب وچ کساناں دی متوازی پریڈ دا انعقاد کر کے پوری دنیا نُوں حیران کر دِتا اے۔ دِلی وچ کرفیو ورگی صورتحال پیدا ہو گئی‘ مودی سرکار لال قلعا بند کر کے پریڈ دا روٹ گھٹ کرن اُتے مجبور ہو گئی۔ وسیلیاں مطابق بھارتی متنازع زرعی قوانین منسوخ نہیں ہوئے پر مشتعل کساناں نُوں روکن لئی بھارتی پولیس نے گولیاں چلا دِتیاں‘ فایرنگ نال 1 کسان ہلاک تے کئی زخمی وی ہوئے پر ایہدے باوجود کساناں دا کہنا اے متنازع قوانین منسوخ نہ کیتے تے پہلی فروری نُوں بھارتی پارلیمنٹ ول مارچ ہووے گا۔