پاکستان کس ڈگر اُتے؟ ۔۔۔۔۔٭رویل کالم٭

پاکستان ایس ویلے ان گنت مسئلیاں نال دوچار اے‘ ساڈے سیاسی قائدین دی نا اہلی تے بدعنوانیاں دی وجھا توں ملک دن بدن غربت تے جہالت دے انھیریاں وچ ڈُبدا جا رہیا اے۔ الیکشن توں پہلے سارے سیاستدان ملک دی دن دُگنی تے رات چوگنی ترقی دے اُچے اُچے دعوے کردے نظر آندے نیں پر اقتدار وچ آندیاں ای ملک تے ترقی کردا نہیں پر ایہ آپ ترقی کر جاندے نیں۔ موجودا حالات نُوں ویکھ کے بہت دُکھ ہوندا اے۔ ویلا کس رفتار نال چل رہیا اے تے اسیں کس رفتار نال؟ انسانی زندگی دی کوئی اہمیت نہیں۔ ہر پاسے نفسا نفسی دا عالم اے۔ کہدے اُتے اعتبار کریے تے کہدے اُتے نہ کریے۔ پاکستان جہڑا اسلام دے ناں اُتے بنیا ایہدے وچ غیر اسلامی کم انج ہو رہے نیں جویں کوئی گناہ نہیں۔ فحاشی دی گل کریے تے ہر دن اخباراں دے صفحے بدفعلی دے لفظاں نال بھرے ہوندے نیں۔ کسے رشتے دار‘ محلے دار تے تعلق دار اُتے اعتبار کرن دی گنجایش ختم ہوندی جا رہی اے۔ کدھرے چاچا بھتیجی‘ کدھرے متریا پیو دھی‘ کدھرے محلے دے منڈے تے کڑی ہور تے ہور منڈے نال بدفعلی دی خبر سنن تے ویکھن نُوں ملدی اے۔ کیہ پاکستان ایس لئی قایم ہویا سی؟ اسیں تے بچپن توں سندے آ رہے آں تے سوچدے آں کہ کیہ ایہ اسلامی جمہوریا پاکستان ای اے؟ ایتھے اسلامی کم تے شیطانی کم بُہتے ہو رہے نیں۔ اسیں اپنے رب تے پیغمبر دے تابع گھٹ تے شیطان دے تابع بُہتے وکھائی دے رہے آں۔

پاکستان وچ کرپشن ختم کرن د اموجودا حکومت نے علم چُکیا ہویا اے پر افسوس کہ کرپشن ختم ہون دی بجائے ودھ بُہتی رہی اے۔ کہڑا محکما اے جتھے رشوت دا بازار گرم نہیں۔ اسلام وچ رشوت لین تے دین والا دوویں جہنمی نیں پر ساڈے موجودا حالات وچ تے جہنمی ہون توں ڈرا یا وی نہیں جا رہیا سگوں کھلم کھلا آفر ہو جاندی اے کہ اینے پیسے دوو تہاڈا کم ہو جاوے گا۔ میں کسے دی آپ بیتی نہیں دَس رہیا سگوں میں اکھاں نال ویکھیا وی تے سنیا وی اے۔ جایز کم لئی وی ناجایز طریقا استعمال کرنا پیندا اے۔ پیسے دی حوس نے انسان نُوں انھا کر کے رکھ دِتا اے۔ مَوت دی پرواہ نہیں تے دنیا دی پرواہ ہے جہدے لئی سبھ کجھ کرن نُوں تیار نیں۔

جے اسیں اداریاں دیاں گلاں کریے تے اوتھے سیٹ اُتے بیٹھے افسر اپنے آپ نُوں ناخدا سمجھدے نیں۔ پولیس تے بدنام سی کہ ایہناں دا لوکائی دے نال رویا چنگا نہیں ہوندا پر ہُن تے تقریبن ہر محکمے وچ انج ای وکھائی دے رہیا اے جہڑے لوکائی نُوں اپنا غلام سمجھدے نیں۔ مینوں بذات خُد کئی اداریاں دے افسراں نال ملاقات دا شرف حاصل ہویا پر جدوں اوہناں دا رویا ویکھیا تے مایوسی دے سوا کجھ حاصل نہیں ہویا۔ پچھلے دن اِک ہسپتال دا وزٹ کیتا تے اوتھے ڈاکٹر حضرات پہلے تے روگیاں دی بجائے موبائل اُتے مصروف نظر آئے تے جدوں روگی چیک کرن دی واری آئی تے اوہناں دا رویا ایہو جہیا سی کہ جویں اوہ روگی چیک کر کے احسان کر رہے نیں۔ کئی روگیاں نُوں تے انج جھڑک رہے سن جویں اوہنے اپنے روگ بارے پُچھ کے کوئی کبیرا گناہ کر لیا اے۔ ن لیگ دے دور وچ جدوں ہسپتال وچ روگی آندا سی تے اوہدا فون نمبر اندراج ہوندا سی تے ایہدے اُتے سرکاری ہسپتال دے عملے دے رویے تے دوائیاں دے بارے وچ پُچھ گِچھ لئی سی ایم دی ہدایت اُتے روگی دے کول کال وی آندی سی جہدا ہسپتال دے عملے نُوں ڈر ہوندا سی کہ ساڈے خلاف کوئی ایکشن نہ ہووے پر ہُن تے کھلی بدمعاشی ہوندی اے۔

ایسے طرحاں اِک ٹاؤن کمیٹی وچ جان دا اتفاق ہویا تے اوتھے موجود کمیٹی دے ملازم اپنی من مرضی نال لوکائی دا کم کر رہے سن کسے نُوں ٹرخایا جا رہیا سی تے کسے توں 50 رُپئے توں ہزار رُپئے فیس دی مد وچ لئے جا رہے سن۔ برتھ سرٹیفکیٹ‘ نکاح نامے دی فیس حکومت نے کیہ رکھی ہوئی اے تے اوتھے جھوٹھی کہانی سنا کے بُہتے پیسے بٹور کے اپنی جیب گر کیتی جا رہی سی۔

ساڈے پی ایم صاحب نے اِک پورٹل سیٹیزن متعارف کروایا اے جہدے اُتے کَمپلین درج کروائی جا سکدی اے تے ایہدا حکومتی سطح اُتے بڑا چرچا وی کیتا جا رہیا اے پر افسوس کہ ایہ پورٹل سیٹیزن صرف اِک خانا پوری اے۔ میں آپ کئی وار کَمپلین درج کروائی پر اج تک جہڑے محکمے د ے خلاف کمپلین درج کروائی اوہدے بارے وچ کوئی گل یاں پُچھ گِچھ میرے توں نہیں کیتی گئی سگوں آپ ای فیصلا کر کے آن لائن جواب دے دِتا تے ایہدے وچ سارے فیصلے اوس محکمے دے حق وچ ہوندے نیں جہدے خلاف درخاست کیتی۔ حال ای وچ اِک درخاست این ایچ اے دے ٹھیکے دے خلاف کیتی جتھے را میٹریل استعمال کیتا جا رہیا سی تے اوہ ٹھیکا مکمل ہون نُوں ہووے گا پر ایہدے اُت یکوئی خاص ایکشن حالے تک نہیں ہویا۔ جد کہ سیٹیزن پورٹل اُتے درخاست کرن دے بعد 48 دن دا ٹایم لکھ کے آندا اے تے اودھر کئی مہینے لنگھ جاندے نیں پر درخاست پئی ہوندی اے۔ اِک درخاست پہلی اکتوبر نُوں کیتی جہڑی حالے تک چل رہی اے تے حالے تک کوئی فیصلا نہیں ہو سکیا۔

پاکستان سرکار جے ملک نُوں کرپشن توں پاک کرنا چاہندی اے تے ایہناں نُوں پہلے ہیٹھلی سطح اُتے ویکھنا پوے گا جتھے غریب نُوں کجھ سو رُپئے رشوت دے طور اُتے دینا عذاب نظر آندا اے۔ ساڈے وزراء اکثر اپنے اپنے محکمیاں دی تعریف کردے نظر آندے نیں کہ اسیں اپنے اداریاں توں کرپشن ختم کر دِتی پر اوہ اُنج دی اُنج اے۔ ریلوے نُوں ویکھ لوو کوئی وی مسافر ریلوے پولیس یاں ریلوے دے عملے دی جیب گرم کرکے اپنا سفر مکمل کر سکدا اے جد کہ اوہنوں ٹکٹ تک نہیں دِتا جاندا۔ سوئی گیس وچ بل ونڈن لئی ٹھیکے اُتے بندے رکھے ہوئے نیں پر اوہناں دا کارناما ایہ اے کہ اوہ کجھ گھراں وچ بل دے کے باقی کسے ہوٹل‘ چوراہے اُتے رکھ کے غایب ہو جاندے نیں‘ میں ایہدے خلاف وی سیٹیزن پورٹل اُتے درخاست دِتی پر ایہدااینڈ ایہ ہویا کہ ٹھیکے دار دی گارنٹی اُتے درخاست بند کر دِتی گئی پر بل اج وی سانوں مختلف دُکاناں تے چوراہیاں توں لبھ کے لیانے پے رہے نیں تے ساڈے حکمران کہندے نیں سیٹیزن پورٹل اُتے درخاست دین نال کرپٹ لوکاں دے خلاف ایکشن لیا جا رہیا اے۔ شہراں تے پنڈاں وچ گٹر لائناں بند ہو جاوے تے کمیٹی ملازماں نُوں گٹر کھلوان لئی وی بطور رشوت جیب گرم کرنی پیندی اے۔

پاکستان دی ترقی لئی حکومت دے نال نال لوکائی نُوں وی سوچنا پوے گا کہ کرپشن دی سیونک ساڈے ملک نُوں کس طرحاں چَٹ رہی اے۔ ایہدے لئی سانوں اپنے ملک دی بقاء لئی متحد ہو کے کرپشن دے خلاف لڑنا پوے گا‘ شرط ایہ اے کہ کرپٹ بندے دی نشاندہی ہون اُتے ادارے اوہدے خلاف بھرواں ایکشن لین تے اوہنوں ایہو جہی سزا دین کہ دُبارا کوئی ہور ایہو جہی حرکت نہ کر سکے نا کہ اوہدی طرف داری کر کے اوہدی حوصلا افزائی کرن۔

*****