حکو متی کوشش تے پولیس دا قبلا………٭رویل کالم٭

انعام غنی ایس ویلے پنجا ب پولیس دے 50ویں آئی جی نیں قیام پاکستا ن دے بعد پنجاب دے پہلے انسپکٹر جنرل پولیس خان قربان علی خان توں لے کے ہُن تک پولیس داقبلا درست نہیں ہوسکیا جویں جویں ویلا لنگھدا گیا ایہ محکما بدتوں بدتر ہوندا چلا گیا پولیس وچ بہتر ی دی اُمید تے آس لے کے آن والے وی ایسے رنگ وچ ڈھل دے گئے پچھلے دن چودھری پرویز الٰہی نے اسمبلی اجلاس دی صدارت کردے ہویاں پاکپتن دے رُکن اسمبلی احمد شاہ کھگا دے نال پیش آون والی ڈکیتی دے بعد کہیا کہ میں اپنی 40سالا سیاسی زندگی وچ چوریاں‘ڈکیتیاں تے راہزنیاں دے اینے واقعات نہیں ویکھے جِنے ہُن شروع ہوچکے نیں۔

چودھری صاحب دا اپنی حکومت دے خلاف ایہ اعتراف جرم سی حقیقت سی یاں کوئی ہور اشارا سی اوہ ای بہتر جاندے نیں۔ چودھری صاحب ایس ویلے اپنی جماعت دیاں 10سیٹاں دے نال سپیکر شپ دامزا لے رہے نیں تے نال ای نال وزارت اعلیا دا خاب وی ویکھ رہے نیں‘ ایس واسطے اوہ اکثر اوقات وزیر اعظم دے احکامات نوں وی کُجھ نہیں سمجھدے‘اپوزیشن دے نال پینگاں پروان چڑھان وچ مصروف نظر آوندے نیں‘ حمزہ شہباز دے پروڈکشن آرڈر ایسے واسطے جاری کردِتے جاندے نیں کہ اوہناں دی سیاست داتسلسل نہ ٹُٹے‘ ہورتے ہور اَجے نویں اسمبلی دی عمارت مکمل نہیں ہوئی تے چودھری صاحب نے اپنے ووٹ پکے کرن واسطے تقریباََ 400توں ودھ افراد نوں بھرتی کرلیا جہڑے سارا دن اسمبلی دیاں با لکونیاں وچ بیٹھے موبائل تے گیماں کھیڈ رہے ہوندے نیں‘ جہناں دے کول کوئی کم نہیں مفت وچ تنخاہواں کھارہے نیں‘ جہڑا ہال ایس ویلے اسمبلی دا بنیا ہویااے اوہی ساڈی پنجاب پولیس دا اے جتھے اک وی کم کرن والا مشکل نال ملے گا سارے دے سارے اپنیاں اپنیاں پوسٹاں واسطے کسے نہ کسے دے پچھے لگے ہوئے نظر آون گے‘ سفارش تے بھرتی ہون والے‘سفارش تے ترقیاں لین والے تے فیر سفارش تے ای تعینا تیاں لین والے پولیس دے ایہ جوان چودھری بردران تے میاں بردران دے دور وچ ای پولیس وچ آئے نیں۔

کہڑا ایسا دور سی جہدے وچ چرس‘افیون‘شراب‘آئس‘کوک تے بے شمار نشے سرعام نہیں وکدے رہے تے ہُن وی اُنج ای وِک رہے نیں دُنیاں بدل گئی وارداتاں ٹریس کرنا ہُن کوئی مشکل کم نہیں رہیا ایسا جدید نظا م آگیا اے ہُن کسی چور تے ڈاکو دا لُکنا ممکن ای نہیں رہیا ایہناں نوں لبھنا دناں دی نہیں سگوں گھنٹیاں دی وی ہُن گل نہیں رہی صرف کجھ منٹاں وچ واردات کرن والے منظر عام تے آسکدے نیں ایس واسطے محنت کرنی پیندی اے پولیس نوں اپنیاں دیہاڑیاں توں فرصت ملے تے کوئی کم کرن‘ جہڑے ساڈے ملک وچ کم کرن والے نیں اوہناں نوں ساڈے سیاستدان روز گھسیٹدے نیں۔ جے خدانخواستا ساڈے اوہ ادارے وی ایہناں سیاستداناں دے کنٹرول وچ آگئے تاں فیر اسیں دنیادیاں سازشاں دامقابلاکِویں کراں گے اپنے دشمن دی پلاننگ نوں سمجھ کے اوس دے دند کھٹے کنج کراں گے تے جو سازشاں اپنے ای اپنیاں دے خلاف تیار کررہے نیں اوہناں نوں کویں تلاش کراں گے۔

ایس ویلے ساڈی ایجنسیاں آئی ایس آئی‘آئی بی تے ایم آئی بہترین کم کررہیاں نیں اگر ایہ ادارے وی پولیس دی طرحاں کم کرنا شروع کردین تے فیر اک دن وچ کئی کئی بم دھماکے کدی نہ رُکدے۔ غداراں دی وجھا توں ملکی حالات کدی نہ سنبھلدے‘ اودھر تُسیں ایدھر اسیں دے نعرے لان والے ہر شہر وچ نمودار ہوندے تے پاکستان اِک بنانا ریاست بن چکی ہوندی اوہ تے خیر نال پولیس نے بنان وچ کوئی کسر نہیں چھڈی۔ اللہ بھلا کرے ساڈے دوجے دوجے اداریاں وچ بیٹھے ہوئے بندیاں دا جہناں دی وجھا توں ملک وچ سلامتی تے امن اے۔ رہی گل چودھری پرویز الٰہی دی جنے بُرے حالات ایس ویلے صوبے دے نیں اوہ ماضی وچ نہیں ویکھے‘ کیوں نہیں ویکھے؟ ایس لئی کہ قانون نے جہناں رسا گیراں‘ بدمعاشاں تے ڈاکوواں نُوں پھڑنا ہوندا سی اوہ آپ یاں فیر اوہناں دا کوئی سرپرست حکومت وچ موجود ہوندا سی‘ اوہی جاگیر دار‘ سرمایا دار تے مال دار بندے پنجاب دے تقریبن 700 توں ودھ تھانیاں نوں اپنی مرضی نال چلاندے سن۔

تُسیں پنجاب نُوں چھڈو ایس ویلے صرف لاہور وچ 238 سرٹیفائیڈ قاتل‘ بدمعاش‘ قبضا گرُپ‘ ڈکیت‘ چور‘ رسا گیر‘ منشیات فروش‘ ناجایز فروش تے زنا دے اڈے چلان والے موجود نیں جہناں دی لسٹ ہر تھانے دے نال نال ہُن تقریبن ہر شہری دے کول وی موجود ا جی ہاں ایہ شہر اقتدار اے جتھے پولیس دا ہیڈ کوارٹر اے‘ پولیس زرا ہمت کرے تے 238 بدنام زمانا بندیاں نُوں اپنی گرفت وچ ای لے کے وکھا دیوے‘ رہی گل پنجاب دے دوجے شہراں دی اوتھے پولیس تے رسا گیر رَل کے حکمرانی کردے نیں‘ نوٹ بناندے نیں فیر ایہناں نوٹاں نال ووٹ خریددے نیں تاں جے لُٹ مار دا سلسلا انج چلدا رہوے‘ عمران خان یاں عثمان بزدار نے آپ جا کے ایہناں چوراں تے ڈاکوواں نُوں نہیں پھڑنا‘ پولیس نے ای ہمت‘ بہادری تے جرات وکھانی اے جس طرحاں ہُن لاہور پولیس نے بدمعاساں دی لسٹ جاری کیتی تے قبضا گرُپاں توں ارباں رُپئے دی تھاں واپس لئی امید اے پنجاب سرکار ہُن پولیس ول وی توجا دیوے گی۔

جس طرحاں پی ٹی آئی نے ملک وچ سیاحت نُوں فروغ دین لئی اقدامات کیتے نیں حکومت دیاں بہتر پالیسیاں دی بدولت ملک وچ سیاحت دی صنعت فروغ پانا شروع ہو گئی اے۔ اِک پاسے لاہور دنیا دیاں 50 خوبصورت سیاحتی تھاواں وچ شامل ہو چکیا اے تے دوجے پاسے ساڈے شمالی علاقات جات دے حسن دا جادو سر چڑھ کے بول رہیا اے‘ وزیراعظم عمران خان دی کوشش اے کہ دنیا سیرو تفریح لئی پاکستان دا رُخ کرے‘ ایسے سلسلے وچ حکومت نے سیاحاں لئی نویں ویزا پالیسی دا اعلان کیتا سی‘ جہدے تحت 50 ملکاں دے سیاحاں نُوں آن آرائیول تے 175 نُوں ای ویزا سہولت فراہم کیتی جاوے گی جہدے بعد سیاحاں تے اوور سیز دیاں پاکستان لئی ویزے دیاں آن لائن درخاستاں وچ کئی گنا وادھا ہو گیا۔ پاکستان آن دے خاہمشند بندے ای ویزے دی سہولت متعارف کروان دے بعد آن لائن ویزے وچ گوڑھی دلچسپی لے رہے نیں‘ چالو سال جنوری وچ آن لائن درخاستاں دی گنتی 31197 ہو گئی‘ پچھلے سال 14 مارچ نُوں وزیراعظم عمران خان نے نویں ویزا پالیسی دا اعلان کیتا سی جہدے تحت پہلے مرحلے وچ 5 ملکاں دے شہریاں نُوں ای ویزا ملن گے‘ جہناں وچ برطانیا‘ چین‘ ترکی‘ ملائیشیا تے یو اے ای دے شہریاں نُوں سہولت میسر ہووے گی جد کہ 50 ملکاں دے شہریاں نُوں آن آرائیول ویزا جاری کیتا جاوے گا‘ حکومت ملک وچ سیاحت دے فروغ لئی 66 ملکاں لئی پاکستان دا ویزا ختم کر رہی اے تاں جے ایہناں ملکاں توں لوک آن تے پاکستان وچ منعقد ہون والے فیسٹیولز نُوں انجوائے کرن تے ایہ کوششاں اودوں تک کامیاب نہیں ہو سکدیاں جدوں تک ساڈی پولیس دا قبلا درست نہیں ہو جاندا۔