سِنتھیا الیگزینڈر فرنیڈیس توں نیلو تک دا سفر……٭رویل ٭

پاکستان دی منجھی ہوئی اداکارا نیلو دا جنم 30جون1940 اک مسیحی کیتھولک پریوار وچ ہویا جو بھیرہ سرگودھا دے واسی سن آپ دا ناں سنتھیا الیگزنڈر فرنیڈس رکھیا گیا جدوں آپ دا ویاہ فلم ڈایریکٹر شاہد ریاض نال ہویا تے آپ دا ناں عابدہ ریاض رکھیا گیا۔قومانتری پدھر دے بنائی جاون والی فلم جو ہالی ووڈ ولوں بن رہی بھوانی جنکشن وچ آپ نے اپنی اداکاری دے جیون دا مُڈھ رکھیا اوس ویلے آپ دی عمر سولھاں ورھے سی ایس توں اگلے ورھے فلم ”سات لاکھ“ وچ جدوں اک گیت ”آئے موسم رنگیلے سہانے“ تے اداکاری کیتی تاں آپ دی صلاحیت نوں فلمی نقاداں نے سلاہیا۔ایس توں وکھ،صابرہ،انجان،بھولے خان،پاسبان،جٹی،کچی کلیاں،ممتاز تے ہور کئی فلماں راہیں آپ نے نامنا کھٹی ایسے ای شہرت دی ٹیسی اُپر دے ویلے دوران ملک امیر محمد خان نے آپ نوں شاہ ایران نال ناچ کرن لئی سدّیا تے آپ نے انکار کر دتا۔ایہ ای امیر محمد خان بعدوں گورنر وی بنیا تے آپ دے جیون نوں اجیرن بنانا شروع کیتا انکار شاہ ایران نال ناچ کرن دے انکار پاروں آپ نال بھیڑا ورتارا کیتا گیا جس توں تنگ آ کے آپ نے گورنر دے گھر جاون والے راہ تے خُد کشی کرن دی کوشش کیتی پر آپ نوں ویلے سر ہسپتال اپڑا کے بچا لیا گیا۔ حبیب جالب نے ایس اندوہناک واقعے بارے اک نظم لکھی”تو کہ ناواقف آداب غلامی ہے ابھی“ جس وچ تھوڑیاں تبدیلیاں کر کے فلم ”زرقا“ وچ شامل کیتا گیا جس اُتے بہت ای ودھیا پرفارمنس نیلو نے دتی کیوں جے ایہ سبھ اوہناں نے ہنڈایا ہویا سی ایس پرفارمنس نوں لوکائی نے بہت پسند کیتا ایسے ای ورھے دا دیس دا سبھ توں وڈا فلمی ایوارڈ نگار ایوارڈ آپ نوں دتا گیا۔ایس فلم نوں ریاض شاہد ہوراں نے ڈایریکٹ کیتا سی جو آپ دے شوہر سن ریاض شاہد دی وفات 1972نوں ہوئی۔

نیلوفر نوں 1959,1963,1969,1999وچ نگار ایوارڈ نال سنمانیا گیا نیلو نے بھوانی جنکشن توں جہڑا سفر شروع کیتا سی اوہ جاری رہیا تے آپ نے لگ بھگ 136فلماں وچ کم کیتا آپ نے آخری فلم ”وار“ وچ اداکاری کیتی جس دے ہیرو شان آپ دا پُتر ای سی ایس توں مگروں آپ نے کسی فلم وچ حصا نہ لیا۔ایہ منجھی ہوئی اداکارا کئی ورھیاں توں کینسر دے رو گ نال جھوجھ رہے سن،آپ دی وفات ایبٹ آباد وچ تیہ جنوری2021نوں ہویا۔

٭٭٭٭٭