اوپننگ مسئلے قومی ٹیم مینجمنٹ لئی سر پِیڑ بن گئے،راولپنڈی ٹیسٹ وچ اظہر علی نُوں اوپنر وجوں گھلن دا آپشن موجود……٭رویل خبر٭

لاہور (نیوز ڈیسک) اوپننگ مسئلے ٹیم مینیمنٹ لئی سر پِیڑ بن گئے جد کہ پچھلے 2 سال وچ چھیویں جوڑی دا تجربا وی ناکام ہو گیا۔ قومی ٹیسٹ ٹیم وچ مختلف تجربے ہو چکے پر اوپننگ دے مسئلے بدستور حل طلب نیں‘ ایہدے وچ تازا وادھا جنوبی افریقا خلاف کراچی ٹیسٹ وچ ویکھن وچ آیا‘ پچھلے 2 سال وچ پاکستان نے چھیویں اوپننگ پلیئر نُوں میدان وچ لاہیا‘ جنوری 2019 وچ دورا جنوبی افریقا وچ امام الحق دے نال فخر زمان نُوں کھڈان دا تجربا کامیاب نہ ہون اُتے دوجے میچ وچ جارحانا مزاج اوپنر نُوں باہر بٹھا کے شان مسعود نُوں شامل کیتا گیا۔ ایسے سال نومبر وچ دورا آسٹریلیا وچ شان تے اظہر علی نے اننگز دا اغاز کیتا‘ دوجے ٹیسٹ وچ کپتان اظہر علی دی تھاں امام الحق آئے‘ دسمبر وچ سری لنکا خلاف ہوم سیریز دے اِک میچ وچ عابد علی تے دوجے وچ شان مسعود نے سنچری بنائی‘ پچھلے سال فروری وچ بنگلا دیش خلاف وی اوپنر نے تھری فیگر اننگز کھیڈی‘ عابد کھاتا نہ کھول پائے‘ دورا انگلینڈ وچ شان مسعود نے اِک سنچری بنائی پر ہور میچاں وچ ناکام رہے‘ عابد علی نے ڈِگدیاں ڈگاندیاں اِک ففٹی بنائی۔ دسمبر‘ جنوری دے دورا نیوزی لینڈ وچ دوویں ا وپنرز ناکام رہے‘ عابد نے تھوڑا ویلا کریز اُتے لنگھایا‘ شان مسعود بلکل ناکام رہن دی وجھ توں سکواڈ توں ای باہر ہو گئے‘ جنوبی افریقا خلاف کراچی ٹیسٹ وچ عابد علی دے نال ڈومیسٹک پرفارمر عمران بٹ نُوں موقع دِتا گیا پر دوویں پہلی اننگز دے بعد دوجی وچ وی ناکام رہے‘ مجموعی طور اُتے دوہاں واریاں وچ عابد علی نے 14 تے عمران بٹ نے 21 سکور بنائے۔ سیریز توں پہلاں عابد علی دے نال اظہر علی توں اننگز دا غاز کروان دی تجویز غور ہیٹھ آئی سی پر فیصلا ایہدے اُلٹ ہویا‘ راولپنڈی ٹیسٹ وچ وی ایہدا موقع ہووے گا پر حالے کجھ فائنل نہیں ہویا۔ ایس حوالے توں پچھلے ٹیسٹ کرکٹر رمیز راجا دا کہنا اے کہ اوپنرز دی ناکامی دے کارن پہلے ای اظہر علی نُوں چھیتی کریز اُتے آنا پے جاندا اے‘ بہتر ہووے گا کہ ایہناں نوں اننگز دے اغاز لئی ای گھل دِتا جاوے‘ اوہناں نے بطور اوپنر کھیڈدیاں ہویاں ویسٹ انڈیز خلاف ٹرپل تے آسٹریلیا وچ ڈبل سنچری بنائی سی‘ تجربا کار بیٹسمین اننگز دا اغاز کرن لئی آن تے مڈل آرڈر اُتے دباء وی گھٹ ہووے گا۔دوجے پاسے پچھلے کپتان انضمام الحق نے کہیا اے کہ دوجے ٹیسٹ توں پہلے پاکستان نُوں اوپننگ دے مسئلیاں اُتے قابو پانا ہووے گا‘ بلا شبا کراچی دی پِچ بیٹنگ لئی بُہتی سازگار نہیں سی پر اوپنرز نُوں سکور کرنے پین گے تاں جے اگلے میچاں وچ مڈل آرڈر اُتے دباء گھٹ ہووے‘ اوہناں نے عابد علی تے عمران بٹ نُوں ہور موقع دین دی حمایت کر دِتی‘ اوہناں دا کہنا اے کہ سینئر اوپنر وڈا سکور کرن دا ہنر جاند ے نیں جد کہ عمران بٹ نے حالے اِک ای میچ کھیڈیا اے۔