نواز شریف حکومتی وسائل نُوں لُٹدے رہے،(ن) لیگی آگوواں توں 24 ارب دیاں زمیناں واپس لے لئیاں گئیاں نیں: شہزاد اکبر……٭رویل خبر٭

اسلام آباد (نیوز ڈیسک) معاون خصوصی احتساب شہزاد اکبر دا کہنا اے کہ (ن) لیگی آگوواں توں 24 ارب دیاں زمیناں واپس لے لئیاں گئیاں نیں۔ ملکی سیاست وچ مختلف لاہ چڑھا آندے رہے‘ سیاست وچ لوک نظریاتی طور اُتے آندے سن‘ پر 80 دے دہاکے وچ سیاستداناں دی بجائے اِک گرُپ نے قدم رکھیا‘ تے ایہناں لوکاں نے نظریاتی لوکاں نُوں پچھے چھڈ دِتا‘ نواز شریف دا کوئی سیاسی نظریا ہے ای نہیں‘ ایہناں دا نظریا صرف پیسا اے‘ ایہناں نے چھانگا مانگا دی سیاست تے پیسے دی سیاست نُوں فروغ دِتا تے سیاست وچ ویچ وٹک دا سلسلا شروع ہویا۔ شہزاد اکبر دا کہنا سی کہ نواز شریف حکومتی وسائل نُوں لُٹدے رہے جہڑا اِک مافیا دا کم ہوندا اے‘ سپریم کورٹ نے ایہناں لئی مافیا دا لفظ استعمال کیتا‘ نواز شریف توں اج وی پُچھ لوو کہ ایہناں دا نظریا کیہ اے تے اوہ نہیں دَس سکدے‘ ایہناں دی دھی انج ای سیاسی مافیا دے گھر اُتے کھلو کے ریاست نُوں للکار رہی سی‘ مریم نواز نے لاہور وچ کہیا کہ اسیں کرپشن دی سیاست جاری رکھاں گے۔ معاون خصوصی نے کہیا کہ اپوزیشن کَہ رہی اے کہ اوہناں توں سیاسی انتقام لیا جا رہیا اے‘ ایہناں دا رونا دھونا اپنے بچاء لئی اے‘ اپوزیشن نال جدوں وی گل کرن دی کوشش کیتی ایہناں نے صرف این آر او کہیا‘ 36 ن لیگی آگوواں توں 24 ارب دیاں زمیناں واپس لئیاں گئیاں نیں‘ ن لیگ دی ساری چیک و پکار دے پچھے ایہ چوری دیاں زمیناں نیں‘ زمین واگزار کروان اُتے لینڈ مافیاز واویلا مچا رہے نیں۔ شہزاد اکبر نے دَسیا کہ صرف پنجاب وچ دو ورھیاں دے دوران 210 ارب رُپئے توں ودھ دی ریکوری ہوئی اے‘ کھوکھر برادران اُتے 3 ایف آئی آرز نیں تے ایہناں نے سرکاری زمیناں اُتے قبضا کیتا جہدی مالیت ڈیڈھ ارب رُپئے بندی اے‘ دو مہینے پہلے 80 کنال 2 مرلے تھاں واپس لئی گئی‘ خرم دستگیر توں 9 کروڑ دی زمین واپس لے کے پارک بنا دِتا گیا اے‘ تے ایہناں توں ہُن 5 کروڑ رُپئے لینا باقی اے‘ خواجا آصف نے وی سوسائٹی اُتے قبضا کیتا ہویا اے‘ جہدے خلاف اج اپریشن ہون جا رہیا اے۔ معاون خصوصی دے مطابق چودھری تنویر توں 7 ارب دی بے نامی پراپرٹی‘ دانیال عزیز دے والد توں (ڈھائی ارب رُپئے مالیت) دی 2400 کنال زمین واگزار کروائی گئی‘ جاوید لطیف نے میاں فلور ملز وچ 8ک نال 2 مرلے تھاں شامل کیتی ہوئی سی‘ تے اِک اڈا واپس لیا گیا‘ احسان اللہ باجوا توں 664 کنال سرکاری زمین تے مظہر رشید دے 25 ایکڑ اوقاف دی زمین واپس لئی گئی‘ جہدی مالیت 7 کروڑ رُپئے بندی اے‘ میر ہزار کھیترانی 36 ہزار کنال تھاں اُتے قابض نیں ایہناں توں 1 ہزار کنال تھاں واپس لئی گئی اے‘ عابد شیر علی توں 2 ارب مالیت دی سرکاری زمین‘ مائدہ حمید دے خاوند توں 10 کروڑ دی زمین تے اعجاز احمد توں 50 کروڑ دی زمین واگزار کروائی جا رہی اے۔