kraamaat@gmail.com
+ +92 333-430-6384


حکومت نُوں پی ڈی ایم توں کوئی خطرا نہیں: وزیر خارجا شاہ محمود قریشی ……٭رویل خبر٭


نمائندا رویل February 01, 2021


ملتان (نیوز ڈیسک) وزیر خارجا شاہ محمود قریشی نے کہیا اے کہ براڈ شیٹ معاہدا کدوں ہویا؟ کہنے کیتا؟ پی ٹی ئی ایہدی ذمے دار نہیں‘ جدوں انکوایری کمیشن بیٹھے گا تے سبھ کجھ بے نقاب ہو جاوے گا‘ با شعور لوکائی نے پی ڈی ایم نُوں رَد کر دِتا اے‘ حکومت نُوں پی ڈی ایم توں کوئی خطرا نہیں‘ عدم اعتماد دی تحریک لیان دا شوق وی پورا کر لےن‘ اسیں تے ساڈے حلیف ایہدا مقابلا کرن گے‘ ڈھائی اسلاں وچ سفارتی سطح اُتے کامیابیاں مِلیاں‘ چین توں آن والی ویکسین آپ وصول کراں گا‘ فرنٹ لائن ورکرز نُوں سبھ توں پہلے ویکسین لائی جاوے گی۔ ڈینیئل پرل دے معاملے اُتے نظرثانی دی درخاست دایر کیتی۔ ایہناں خیالاں دا اظہار وزیر خارجا نے ملتان وچ صحافیاں نال گلبات کردیاں ہویاں کیتا۔ وزیر خارجا نے کہیا کہ پی ڈی ایم حکومت نُوں گھر گھلن چلی سی تے ہُن اپنی بقاء دی جنگ لڑ رہی اے‘ پی ڈی ایم دے غیر فطری تے مصنوعی ایکے دی قلعی کھل چُکی اے‘ اپوزیشن دے اندر خاصی بے چینی اے‘ پی ڈی ایم وچ جِنیاں جماعتاں اونے بیانیے‘ ایہناں وچ کوئی یکسوئی نہیں‘ اپوزیشن ایکے دا مؤقف تضادات نال بھریا ہویا اے۔ وزیر خارجا نے کہیا کہ باشعور لوکائی نے پی ڈی ایم دے کھوکھلے نعریاں تے جلسے جلوس دی احتجاجی سیاست نُوں بلکل رَد کر دِتا اے۔ اوہناں دا کہنا سی کہ سفارتی سطح اُتے پچھلے ڈھائی سالاں وچ سانوں بہت کامیابیاں مِلیاں نیں۔ سعودی عرب دے نال ساڈے تواریخی برادرانا تعلقات نیں۔ اوہناں نے کہیا کہ ملک وچ موجودا مہنگائی دی ذمے دار مسلم لیگ (ن) دی پچھلی حکومت اے جہنے معیشت لئی بارودی سرنگاں وِچھا رکھیاں سن‘ جہناں نُوں پی ٹی آئی حکومت صاف کر رہی اے تے ہُن معیشت بہتری ول گامزن ہو چکی اے‘ لوکائی نُوں اگلے کجھ مہینیاں وچ مہنگائی توں چھٹکارا ملے گا۔