سیالکوٹ دا اِک ٹھَگ جیل وچ اے، کوئی شرم ہوندی اے کوئی حیاء ہوندی اے‘ پیو اِک آمردا غلام جد کہ پُتر آل شریف دا غلام: فردس عاشق اعوان ……٭رویل خبر٭

سیالکوٹ (نیوز ڈیسک) معاون خصوصی وزیر اعلا پنجاب برائے اطلاعات ڈاکٹر فردس عاشق اعوان نے کہیا اے کہ سیالکوٹ دا اِک ٹھَگ وی ایہناں دناں جیل وچ اے‘ اقتدار وچ سی تے نہراں وچ چھالاں ماردا پھردا سی ہُن جیل وچ گیا اے تے سہولتاں دی بھیک منگدا پھر رہیا اے۔ سیالکوٹ وچ صحافیاں نال گلبات کردیاں ہویاں اوہناں نے ہور کہیا کہ بہادری ایہدے وچ وی کُٹ کُٹ کے بھری اے پر منی ٹریل تے مشکوک فنڈ ٹرانسفر دے بارے وچ دَسن توں ڈردا اے‘ جہدا اعتراف کرن دی صورت وچ شاید ایہدے گھروالے ایہنوں گھر وچ ای داخل نہ وڑن دین۔ اوہناں نے کہیا کہ سیالکوٹی ٹھگ نے اہل سیالکوٹ دی عزت خاک وچ رلا کے رکھ دِتی اے‘ لوک پُچھدے نیں کہ اسمبلی وچ بانہواں ٹُنگ کے بھڑکاں مارن تے شیر شیر دے نعرے لان والا اج بھیگی بلی کیوں بنیا بیٹھیا اے۔ کوئی شرم ہوندی اے کوئی حیاء ہوندی اے‘ پیو اِک آمر ضیاء الحق دا غلام جد کہ پُتر آل شریف دا غلام۔ اوہناں نے کہیا کہ فارن فنڈنگ کیس وچ ہُن ن لیگ دیاں توپاں چُپ کیوں ہو گئیاں‘ ظل سبحانی دی امریکا وچ اپنی تعینات کردا اوس ویلے دی سفیر عابدہ حسین دے بیان کہ ن لیگ نُوں اسامہ بن لادن فنڈنگ کردا رہیا‘ ہُن ن لیگ تے پی ڈی ایم نُوں سَپ کیوں سُنگھ گیا اے۔ اوہناں نے کہیا کہ پی ٹی آئی دے فارن فنڈنگ کیس وچ دامن صاف اے‘ اسیں ڈونرز دیاں لسٹاں الیکشن کمیشن وچ جمع کروا دِتیاں نیں ک۔ ہُن جواب ایہناں نے دینا اے جہڑے اسامہ بن لادن‘ قذافی تے صدام توں فنڈنگ لیندے رہے۔ فارن فنڈنگ کیس وچ پی ٹی آئی سرخرو ہو کے نکلے گی تے مخالف سیاسی جماعتاں لئی ایہ معاملا گلے دا طوق ثابت ہووے گا۔ اوہناں نے کہیا کہ پی ڈی ایم دا آگو جہنوں کہندا سی کہ ساڈے راہ توں ہٹ جاؤ تے ایہ کہ حالے اسیں سوچنا اے لانگ مارچ اسلام آباد ول ہووے گا یاں پنڈی ول ہووے‘ ہُن کہندے نیں کہ ساڈی کسے نال کوئی لڑائی ای نہیں۔ لگدا اے مولانا دا سافٹ ویئر وی ہُن اپ ڈیٹ ہو گیا اے۔ اوہناں نے کہیا کہ راجکماری‘ پرچی شہزادے تے مولانا نُوں اج وی کھلا چیلنج اے کہ ایہ گھوڑا تے ایہ گھوڑے دا میدان‘ لیاؤ استعفے‘ کرو پارلیمنٹ دا بائیکاٹ‘ کرو لانگ مارچ‘ کرو آر یاں پار پر این آر او نہ ملیا سی نہ ملے گا۔ اوہناں نے کہیا کہ راجکماری نے اِک ٹویٹ وچ کہیا اے کہ حق تے سچ اُتے سٹینڈ لینا‘ ظلم سَہنا تے فیر وی ڈٹے رہنا بزدل ولکاں دا کم نہیں۔ اوہناں نے کہیا کہ میں راجکماری تے ایہدیاں کنیزاں توں پُچھنا چاہندی آں کہ ایہ پیغام کہدے لئی اے؟ ظلِ سبحانی لئی‘ ببلو ڈبلو لئی یاں منشی اسحاق لئی کیوں جے بزدل بن کے ملک توں ایہو نَسے ہوئے نیں‘ کپتان تے اوہدی ٹیم تے ڈَٹ کے میدان وچ کھلوتی اے۔ ایہ لوک جدوں اقتدار وچ ہوندے نیں تے سیر ہو جاندے نیں‘ اقتدار توں باہر ہون تے ڈھیر ہو جاندے نیں‘ ملک توں فرور ہو کے انقلابی بن جاندے نیں تے جیل وچ جان تے روگی بن جاندے نیں‘ حکومت پاکستان خاص طور اُتے پنجاب وچ قبضا مافیا دے نال کسے قسم دی رعایت نہیں ورتے گی۔اوہناں نے ہور کہیا کہ خواجا آصف دی ہاؤسنگ سوسائٹی وچ ناجایز قبضا مافیا دے خلاف اپریشن کیتا گیا‘ مالکان مسرت آصف زوجا خواجا محمد آصف‘ توحید اختر‘ زاہد مقبول‘ شاہد مقبول‘ نوید اختر تے سائرہ اقبال دختر محمد اقبال رقبا گنتی 137 کنال دی منظوری 2017 وچ حاصل کیتی۔