جنوبی افریقا خلاف ٹی 20 سکواڈ دا اعلان،محمد حفیظ‘ عماد تے وہاب ریاض نُوں ڈراپ کر دِتا گیا……٭رویل خبر٭

لاہور (نیوز ڈیسک) جنوبی افریقا دے خلاف قومی ٹی 20 سکواڈ دا اعلان کر دِتا گیا جہدے وچ محمد حفیظ‘ عماد وسیم‘ عبداللہ شفیق تے وہاب ریاض نُوں ڈراپ کر دِتا گیا اے۔ لاہور وچ پریس کانفرنس کردیاں ہویاں چیف سلیکٹر محمد وسیم نے کہیا کہ ٹی 20 سیریز نُوں ورلڈ کپ نُوں ساہمنے رکھدیاں ہویاں کھڈاریاں نُوں سلیکٹ کیتا گیا اے‘ سارے منڈیاں نے بہترین پرفارم کیتا امید اے ایہو تسلسل برقرار رہوے گا‘ کھڈاریاں دے ٹیم وچ کردار نُوں ویکھدیاں ہویاں سلیکشن کیتی گئی اے۔ چیف سلیکٹر محمد وسیم نے کہیا کہ کجھ اہم شیواں نوٹ کیتیاں نیں جہناں اُتے کم کرن دی ضرورت اے‘ پاور پلے وچ اٹیکنگ کرکٹ کھیڈن والے منڈے چاہیدے نیں تے مڈل آرڈر وچ میچ نُوں ختم کرن والے بلے بازاں دی ضرورت اے‘ آل راؤنڈر ز نُوں وی توجا دِتی گئی اے۔ چیف سلیکٹر دا کہنا سی کہ عثمان قادر تے زاہد محمود 20 رکنی سکواڈ وچ شامل نیں‘ محمد حفیظ ٹی ٹین لیگ تے عماد وسیم فیملی وجھاں کارن ٹیم نُوں دستیاب نہیں‘ شاداب خان انجری کارن منتخب ہ ہو سکے جد کہ فخر زمان‘ عبداللہ شفیق‘ وہاب ریاض تے محمد موسیٰ نُوں ڈراپ کیتا گیا اے۔بابر اعظم کپتان‘ حیدر علی‘ خوشدل شاہ‘ حسین طلعت‘ دانش عزیز‘ آصف علی‘ افتخار احمد‘ ظفر گوہر‘ محمد نواز‘ فہیم اشرف‘ عامر یامین‘ عماد بٹ‘ محمد رضون‘ سرفراز احمد‘ حارچ رؤف‘ شاہین شاہ آفریدی‘ حسن علی‘ محمد حسنین‘ زاہد محمود‘ عثمان قادر ٹی 20 سکواڈ دا حصا ہون گے۔