دنیا بہت بدل چکی‘ ویلا آ گیا کہ اسیں اپنی سوچ  بدلیے: اقراء عزیز ……٭رویل خبر٭

کراچی (نیوز ڈیسک) اداکارا اقراء عزیز کہندے نیں کہ ٹی وی اُتے اینی پذیرائی ملی اے کہ اوہناں نُوں فلماں وچ کرن دی لوڑ محسوس ای نہیں ہوندی۔ غیر ملکی ویب سائٹ نُوں دِتے گئے انٹرویو وچ اقراء عزیز نے کہیا کہ اوہناں دی سوچ دے مطابق ٹی وی اِک بہت وڈا میڈیم اے۔ ایہو جہے دور دُراڈے علاقے جتھے کیبل یاں سینما نہیں ہوندے‘ اوتھے ٹی وی ہوندا اے۔ لوک ایہدے راہیں اپنے پسندیدا فنکاراں دے نال جڑے رہندے نیں‘ چھوٹی سکرین اُتے اینی پذیرائی ملی اے کہ ایہناں نُوں فلماں وچ کم کرن دی لوڑ محسوس ای نہیں ہوندی۔ مداحاں ولوں تنقید اُتے اقراء عزیز دا کہنا سی کہ جہڑے لوک سانوں پسند کردے نیں اوہ ساڈے کم نُوں سلاہندے نیں۔